رد زيد ودخل خيمه هزاع وناظرهم نيام كان اقرب واحد له ذيب ركله برجله وفز ذيب يصخر : الغزو الغزو
ضحك زيد لما شاف البقيه كل واحد فز ومغمض عيونه مايدري وين يمشي هزاع داس على جاسم وجاسم الي مسك يد متعب كانه سيف وكنعان الي وقف وجرى واصتدم بالعمود ناظروه كلهم لما استوعبو الي يصير
ذيب بحقد : عسااااك توقع وتنكسر رجلك
جاسم : زيد بذمتك ذا وقت يمنزح فيه
هزاع مسك على صدره : مابسامحك يازيد لو اموت وقفت قلبي ياخوي
متعب : ترى باين رايق بزياده وش عندك
زيد ابتسم باستفزاز : ابد الشمس قامت تغرب لزوم نتحرك
وقف ذيب وجاسم وهزاع وكنعان ومتعب وجروا له مير زيد طار يجري منهم ويضحك
وقفت هند تناظرهم وبيده اكل لخوله وابتسمت
ونجلا تمشي مع بنت الطبيب وضحكو عليهم
اما خوله الي تلثمت وطلت تشوف وش يصير ابتسمت على ضحكت زيد وتوعد الباقي فيه
اما زيد يجري ويصرخ : خلاااص وقفو تعبت
ذيب الي ناوي عليه شر : طيحت قلبي وتقول تعبت
زيد جرى ووقف خلف الشيخ : بامانتك ياشيخ
ابتسم الشيخ ورفع يدينه : بعيوني يزيد
ذيب بعصبيه : وقسم يازيد ماتركت لو بعد عشر سنين
زيد ابتسم : تسسسلم عيونك ياشيخ
هزاع ياخذ هواء ويزفر بغضب : بذمتك يبه يصير الي سواه
الشيخ : وش سويت يازيد
زيد من خلف الشيخ : ابد ركلت رجل ذيب لاجل يصحو
ذيب : تقولها بكل بساطه ركلت ترى كنت بتكسرها
زيد ابتسم ورفع حاجبه : وذيب ياشيخ صرخ وتو مغمض عيونه الغزاه الغزاه
ضحك الشيخ : وذا كفيل يصحي البقيه
جاسم : حشى ماصحانا ذا طيح قلوبنا
ضحك زيد : تخيل ياشيخ جاسم مسك يد متعب كانها سيف وكنعان قام يجري وصدم بالعمود وهزاع داس على رجول جاسم
ضحك الشيخ : والله فاتني ذا المنظر
هزاع : تضحك يابوي على الي صار والله لو انت بيننا كان اهتزت ركبك
رفع الشيخ عصاته وهزاع راح يجري
الشيخ : والله وطال لسانك ياهزاع
ضحك هزاع من بعيد وتبسمو المعصبين
،
دخلت هند ونجلا وبنت الطبيب لشق الي به خوله
تبسمت خوله : يهلا
بنت الطبيب : كلي بالاول وبعدها بشوف راسك
خوله : طيب
قربت خوله من الاكل واكلت بشهيه مفتوحه
نجلا ابتسمت : اول يوم اشوفك تاكلين كذا
ضحكت خوله : برد لقبيلتي وشلون مافرح وتنفتح نفسي للاكل
هند : يعني واحنا سادين نفسك ولا شلون
خوله : لا لا ابد والله ماقصدي كذا مير مشتاقه لبوي حيييل
ضحكت هند : ادري مير امازحك
خوله وقفت من على الاكل : قولي مرعتيني خلاص ماعاد ودي
نجلا : قووولي الحمدلله بعد ما كليتي الاخضر واليابس
ضحكت خوله وبفمها شوي من الاكل : الحمدلله مير ترى هند بخيله حيل ماجابت غير اشوي
هند ناظرت للصحن : ايييه ياحظي ترى جبت ذا الاكل لنا الثلاث مير ماشاء الله خوفتينا وماعاد قربنا
بحلقت خوله بهند بصدمه : من جدك
ضحكت هند : اييي والله مير بالعاااافيه عليك
نجلا : لاتخافي طبيعي تاكلي كثير مع الارهاق والاصابات الي تصير لك ماعدتي تاكلي زين
هند : تعالي نجلا بناكل بالمطبخ
وقفن هند ونجلا وراحن وخوله ناظرت لبنت الطبيب واستحت انها اكلت كثير قدامها
،
على غروب الشمس ودعهم هزاع وهند بحراره
هند تناظرهم متحركين : والله بشتاق لهم حيييل
ضحك هزاع : حتى انا مير وش نسوي
هند بدمعه طايحه : ليت لو نسوي قبيله ونجتمع كلنا بها
ضحك هزاع : من جدك انتي وبعدين تعالي لعند ابوي بقول لكم بشاره
هند : وش هي البشاره
تحرك هزاع بخيله تاركها : اذا مالحقتي عليا بقول لابوي وانتي لا
انطلق هزاع بخيله وهند تجري بخيلها وراه لاجل ماتفوتها البشاره
،
نجلا تبسمت بهدواء : احساس غريب مابين الفرح والحزن وشلون يصير ذا
خوله تبسمت : فرح لاجل العوده للقبيله وحزن لاجل فراق هند والبقيه
شتت نجلا نظراتها : الحين الدور على قبيلتنا وبعدها بتكملين وحدك
خوله : لاتخافي عليا تعودت على ذا الحال
ذيب بصوت عالي : وش منتظرين اضغطو على الخيول لاجل ننطلق بسرعه ترى قبيلة متعب بعيده اشوي كود نوصل
انطلقت الخيول تسابق الرياح مع مشاعرهم المختلطه بين الحزن والفرح
،
وصل هزاع لمجلس الرجال الي كان والده الشيخ يتوسطه قاعد يتقهوى
هزاع : مساء الخير يابوي
دخلت هند وراه بفضول : قول وش عندك
الشيخ تبسم : مساك بالخير وش صار
قعد هزاع وضحك بنذاله : عندي لك يبه بشارتين
هند عقدت حواجبها : انت قلت بشاره
هزاع : اذا ودك تعرفي قهويني بالاول
زمت هند شفايفه : ادري بتشغلين الحين لين تقول
هزاع ابتسم : اقول بسرعه
قربت هند الفنجان وصبت له القهوه وقربت من والدها الشيخ وجددت قهوته : والحين قول
ابتسم هزاع : لين اكمل قهوتي
فتحت هند فمها بحزن : لاااا هزاااع لاتعبث بصبري
هزاع ضحك : ووش بتسوي يوم تعصبين
هند رفعة حاجب : ترى صرت اعرف استخدم الخنجر
ضحك هزاع والشيخ من قلب
هند : وش له تضحكووون
الشيخ : هزااع ياولدي قول شعندك تدري ماحب اشوف هند متضايقه
تربع هزاع ورفع صدره : ايييه ترى يبه ببشرك خطبت اخت فياض
ابتسم الشيخ وتهلل وجهه : واخيرا بتفرحني ياهزاع
ابتسمت هند بفرح مير هو خطب وهي : مبرروك وليه ماتكلمت الا الحين كنت بفرح هناك
هزاع : لاجل ماتسبقيني وتبشري ابوي
هند : فاطمه صح
هزاع : ايييه
الشيخ : والبشاره الثانيه وش هي
تبسم هزاع : ترى يابوي متعب بيناسبنا
الشيخ : وانت راضي
شقت البسمه وجه هزاع : اييييه متعب رجاال ينشد به الظهر
هند الي تفكر وتو ماستوعبت
هزاع ناظرها : وش قلتي ياهند موافقه
هند : هاه انا
هزاع : ترى انا قلتله جاتك مير اذا ماودك به ارفضه
هند بصدمه وتو تستوعب : ايه مدري
ضحك هزاع : قومي قومي مبين موافقه
تبسمت هند بخجل ووقفت تجري لبراء الخيمه
الشيخ : وشلون وفقت عليه ياهزاع وانت الي دايم ترفض
هزاع : يبه هند عيوني الثنتين وشلون افرط بها مير متعب قعدت معاه فتره ماهي قليله وان ادري انه بيصونها ويحطها بين عيونه
الشيخ ابتسم : الله يسعدك ويسعدها ويهنيكم بحياتكم ياولدي
ابتسم هزاع وهز كوب القهوه بهدواء
