سحب زيد خوله من يدين كنعان ورفع راسها وسحب غترته من على راسه وربط راس خوله يمنع نزول الدم من راسها فتحت خوله عيونها بين الواعي واللاواعي وهمست بخفوت : لا تـ تركـ ـني زيـ ـد
ابتسم زيد وبعيونه الخوف ومسك كفها وهمس : لاتتركيني انتي
جاسم : ليه واقفين هذي هي القبيله تحركوا بسرعه
اخذ كنعان خوله وحملها على خيله وانطلق مع هزاع وهند ومتعب ونجلا
وقف زيد واخذ مي يغسل يدينه بهدوا
ذيب ابتسم : وش همست
ناظره زيد ورفع حاجبه : متى ماسمعتها
جاسم بغرابه : متى تكلمت
ضحك ذيب : والله ماخلف هدوئك يازيد الا كلمه قالتها
ابتسم زيد ونط لخيله : حشى هذول اذان ارنب ماهم لانسان
انطلق زيد بخيله وذيب يضحك
جاسم بفضول : وش قالت
ذيب ابتسم : مدري مير انها همست وهو همس لها
قرب ذيب لخيل خوله وحرك يده عليه : روح معهم ياجاسم خيل خوله متشنجه اعصابه وكاد انها كانت متوتره بالحيل ووترت الخيل معها
جاسم تنهد : ماخليك وحدك ببقى معك
ضحك ذيب وقعد يسقي خيل خوله ويطعمه
،
بقبيلة هزاع وصلو لخيمة الطبيب ودخلو خوله للخيمه وكان كنعان معاها
متعب عقد حواجبه : وش ذا الحظ الي معاها
هزاع تنهد : الله يعينه وتوصل بالسلامه لقبيلتها
قرب منهم زيد وناظرهم : عسى خير
متعب : يقول الطبيب زين انك عصبت راسها بالغتره لاجل الدم يوقف
زيد : ووش حالها الحين
هزاع : ابد يقول بخير مير لزوم يحط لها اعشاب مكان الضربه الي براسها لاجل يوقف الدم
زيد : الحمدلله
متعب : زيد وشلون كانت عندك القوه تسوي الي سويته برغم اننا كلنا تجمدنا وماعرفنا وش نسوي
طلع كنعان من المخيم وسمع كلام متعب وابتسم : لانه بكل مره يحصل لخوله شي ينقذها زيد صار متعود
ناظره زيد ولف ناظر للبعيد : هزاع بروح للغدير اسقي الخيل
هزاع ابتسم : تدل الطريق
زيد ضحك : افا عليك حافظ الطريق
راح زيد واستاذن هزاع وهند يروحو يسلمو على والدهم الشيخ اما نجلا دخلت عند خوله وبقى متعب وكنعان
متعب : كنعان ودي اسال
كنعان : اسال
متعب : ماكانت علاقتك كذا بزيد وش صار
كنعان ابتسم : لزوم اقسى شوي معه لاجل يفكر زين
متعب : وش يفكر به
كنعان : اتركه بحاله خلنا نروح ننام لاجل نصحى قبل غروب الشمس ونلحق نروح
متعب : وخوله ماعليها شر
كنعان : اي معليها شر تقدر تسافر يقول الطبيب
هز متعب راسه وتحرك مع كنعان رايحين لمجلس الشيخ
،
ناظرت نجلا لخوله وتنهدت : ليه حظك ردي يابنيه وش فيك انتي وش الي يصير لك تو تتعالجين من شي يصيبك شي وش ذي الحاله ياخوله
تنهدت نجلا وتمددت قرب خوله ونامت من التعب والتفكير
،
عند ذيب وجاسم وقفو خيل خوله وتحركو به لقبيلة هزاع الي ماتبعد عنهم غير كم خطوه
جاسم : ااااه بي نوووم وجسمي مكسر
ذيب ابتسم : ايه يالدلوع ولد شيخ ماعليك
ناظره جاسم ورفع حاجبه : انا دلوع
ذيب : ايييه وشلون تتعب على رحله قصيره
جاسم : تدري اننا نجري بالخيول من غروب الشمس لمطلعها
ضحك ذيب : ايييه ترى تو ماتعرف التعب والعطش زين
جاسم عقد حواجبه : وشلون كانت حياتك بذي السنتين
ذيب : شقى اوقات يكون زادي طول اليوم شوي مي واوقات يغمى عليا لين يصحيني خيلي اوقات اترحل طول الليل والنهار واسعد يوم حين القي مخبئ واكل ومي اكون بذيك الساعه امير
جاسم : وماتعبت
ذيب : تعبت من احلامي التكرره وشوفت القاتل بعيوني تعبت ااييه والله اني تعبت
جاسم : الله يقويك وبذن الله نلقاه وتنتقم
ذيب : باذن الله
،
اسقى زيد خيله وغسل وجهه وابتسم : وش قالت لاتتركني يازيد لاتتركيني انتي ياخوله لانه انتي الي بتخليني وحيد وحالتي حاله
وقف واخذ يجر خيله لمجلس الشيخ ترك الخيل يقعد ويرتاح ودخل المجلس سلم على الشيخ وقعد قرب متعب
الشيخ مبتسم : الحمدلله الي رجعتو وشفتكم سالمين مير وين ذيب وجاسم
زيد : عند خيل خوله
الشيخ : عسى خير وش صار
كنعان : تشنجت الخيل وطاحت على خوله
الشيخ : ووشلون خوله
كنعان : بخير ياشيخ لاتقلق
دخل جاسم وذيب وسلمو على الشيخ
ذيب : اخبارك ياعمي الشيخ
الشيخ : بخير تو اسال عنكم
جاسم : تسال عنك العافيه
الشيخ ابتسم : يعافيك ياولدي روحو نامو وارتاحو ياعيالي
ذيب : سلمت ياشيخ
وقف هزاع واخذهم لخيمته لاجل ينامو
،
عند هند الي سلمت على ابوها الشيخ وردت لخيمة الطبيب تدور خوله وتطمن عنها ابتسمت على نجلا الي نايمه قرب خوله بتعب وخوله الي مايندرا على حالها قربت من نجلا ونامت قربها مبتسمه
،
قربت الشمس تغيب وبدت خوله تفتح عيونه حست بالم قوي براسها وشعرها مبعثر ونازل حوله ناظرت للي قربه وضحكة بخفه : نجلا هند قومن
نجلا بصوت مليانه نوم : شوي بس تكفين
هند فتحت شوي ومن ثم فزت : خوووله
رفست هند نجلا برجولها : يالدددبه خوله صحت
فزت نجلا تتلفت يمين ويسار وناظرت خوله وضحكت وضمتها : ترى خلاااص تعبت فجايع كل مره تخوفينا وتصحي تضحكي
خوله ابتسمت : ترى ماصار شي مير مع التعب نمت
هند : الحيين اجيب لك شي تاكلينه
وقفت نجلا : اييه الطبيب يقول لزوم نكلمه لما تصحي
راحن وكل واحده بجهه تجيب شي ابتسمت خوله وتلمست الغتره الي عليها مسكت طرف الغتره وناظرتها وعقدت حواجبها : هذي حقت زيد
: ايه حقت زيد
ناظرت خوله لصاحب الصوت الوقف قرب باب الشق ارمشت بعيونها : زيد
زيد : سمي وتدللي
خوله بحرج : ذي غترتك
زيد : اييه عجبتك
خوله : اي لا اقصد الدم مغطيها
زيد وبصوت هادي وعيون ناعسه : تفداك هي وراعيها
ناظرته لثواني ومن ثم دارت عيونها على الشق رفعت يدينها تتلمس شعرها وردت رفعت راسها تناظر زيد بصدمه : شعري
ضحك زيد : ام العيون السود والرمش فتان
اللي رمتني بسهامها ياحلاها
غمازت الخد والخد مليااان
وطول الشعر لاطاح كله وراها
خوله متصنمه وترمش عيونها ذا زيد ولاتهيئاتها بدت تطغى عليها تركها زيد واقفى وراح يمشي وقفت خوله وجرت لباب الشق تناظر وشعرها يتحرك معاها
التف زيد وناظرها واقفه على باب الشق وابتسم شوي ومن ثم عقد حواجبه واشر لها تدخل
دخلت ومسكت صدرها مكان قلبها يعني ذا مو خيال ذا زيد مير وش الي يصير بصدري ليه قلبي يدق بقوه ليه ذي الابيات تجيبها لي يازيد ليه كل ماقلت ببعد عنك تقرب مني اخذت نفس تهدي دقات قلبها وردت قعدت تتناسى الي حصل غمضت عيونها لان راسها زاد الام عليه
