عند كنعان قرب من خوله اشوي وقعد يناظرها بصمت
خوله بحياء : كنعان ياخوي وش الي تبي تقوله
كنعان بحزن : لو اتكلم متى بوقف ياخوله بداخلي كلام كثير مير مدري وشلون اختصره او اعبره
خوله ابتسمت : وش الي ملاء صدرك ياخوي كلمني وانا بسمعك تدري اني مستعده باي وقت اسمعك
كنعان تنهد : اسف ياخوله كل الي صار فيك بسببي لو ولو ولو
نزل راسه يستجمع حاله : كل خطاي من البدايه انا الي جبرتك بذي الرحله وانا الي تركتك من البدايه تتكلمي مع الجميع وتحلي المشاكل وانا الي زعلتك وانا الي تركتك تروحي مع البنات وادري ياخوله انه ماكان ودك تتركينا
غمضت خوله عيونها ماودها تناظر اخوها وهو بذي الحاله ماودها ينكسر شموخه امامها
كنعان والدمع ملاء رموشه : لو حصلك شي وشلون بسامح حالي وشلون بقابل ابوي واخواني وباي وجه بوقف قدامهم وشلون ياخوله بسامح حالي وشلون والله انه عندي اموت انا اهون من اوصلك لابوي وانتي بك جروح جروووح ياخوله وشلون تحملتيها وقاتلتيه وشلون تحملتيها ووقفتي قدام رجال حامل سيفين
خوله بالم : ماسويت شي خرجت كل شي بقلبي بالقتال خرجت كل حزن وكل الم وكل مشاعر كتمتها
كنعان : ليه ياخوله تكتمي كل الي بداخلك ليه ماتتكلمي وانا بسمعك
ابتسمت خوله : ترى انت رجال وانا حرمه انت بتقدر تقول لي وتكلمني بكل شي لانك رجال ماعليك عيب مير انا وشلون اتكلم وشلون اقول لك شي يمكن انت تعتبره بالنسبه لي شي كبير وبعدها انزل من نظرك وشلون اشرح لك ياخوي عن الي بقلبي صعبه صعبه ياكنعان
،
،
عند الزعيم الي كان الغضب واصل عنده وقف وعطاء الرجال الي امامه كف : ووووش قلت شلووون مات شلوون وانا ادري انه بالمبارز يهزم ثلاثه وحرررمه تقتله حرررمه ماقدر لها وشلوون
الرجال منزل راسه بخيبه : يازعيم شفتهم رمو جثته وكان الراس منفصل عن الجسم
الزعيم : والله والله اني لحطها بين رجولي حشى ذي ماهي بحرمه وش ذا البلا
تنفس الزعيم بعمق : كم الي نجو
الرجال بخيبه : سبعه يازعيم
الزعيم ابتسم بسخريه : سبعه لا والله رجال سبعه من ثلاثين رجال وش ذا الكلام
الرجال : ترى يازعيم الحرس كانو اقوياء
الزعيم : لا والله ليه وانتو وش وانا ليه ادربكم واتعب فيكم
نزل الرجال راسه بصمت
الزعيم : والي بقو من الي كان يقاتلو عيال المشايخ
الرجال : راحو اربعين والي ردو ١٥ رجال
ضحك الزعيم : ايييه ووشلون بغزي باقي القبايل بذول الرجال الضعيفين
دخل ابو الزعيم المجلس : خييير عساه خير وش صار
الزعيم : ابد راحو جموع وردو كم واحد
ابو الشيخ يقبض على لحيته : وكاد مابه فايده من المواجهه
الزعيم ؛ وشلون
ابو الزعيم : لزوم نغدرهم ندور اي خطه وبدال مانجيهم من قدامهم نجيهم من خلفهم
الزعيم ابتسم : ايييه ذا العقل الزين
،
،
في قبيلة الشيخ ابو زيد كان الشيخ وابو كنعان وابو سامر قاعدين بالمجلس يتناقشوا عن الغزو والحلول الي امامهم
صمت ابو كنعان وناظرو له
الشيخ : خير ياخوي وش بك يابو كنعان
ابو كنعان بالم : مدري ليه نغزني قلبي ياخوفي على بنتي
ابو سامر : لاتخاف يابو كنعان بقربها فرسان مايصيبها شي باذن الله
الشيخ : وعلى حسبتي وكاد انهم باخر قبيله وكاد بعد كم يوم يردو لنا عيالنا ونفرح بشوفتهم
تنهد ابو كنعان : ياااليت وانا اقدر ارسل رسايل لاجل اتطمن عليهم
ابو سامر : مايصير اخاف احد من الغزو يمسك ذي الرسايل وبعدها تصير اعلوم خلنا كذا
تنهد ابو كنعان ويحس بشي بقلبه وخايف على خوله
الشيخ : الا يابو كنعان والحين وش السواه من كلام ابو ادهم
ابو كنعان : اترد لي بنتي وتقر عيني بشوفتها ومن بعدها يصير خير
ابو سامر : والله يابو كنعان لو تركت خوله تتزوج لواحد من القبيله كان افضل
ابو كنعان بحسره : وش اسوي ماكان ودي تنقطع علاقتنا بهم مير ماتوقعت ان فرقى خوله بيكون كذا
نزل ابو كنعان راسه بندم : خفت لاتنقطع علاقتي بهم وماخفت لاتنقطع عن عيني شوفت خوله وش الي كنت افكر فيه وش الي حصل وشلون اترك بنتي لاجل صلة علاقه وشلون اقدر على فرقاء خوله
صمت الجميع وكلا تفكيره يوديه لبعيد
،
دخل كنعان مجلس الشيخ ابو فياض وسلم وقعد قرب زيد
ذيب : الحمدلله على سلامة خوله ياكنعان
ابتسم كنعان : يسلمك ربي ياذيب
متعب : الحمدلله على سلامتها ماتشوف شر
كنعان : الشر مايجيك يامتعب
ذيب : وشلون مايجيه وهو بحد ذاته متاعب
ابتسم متعب : وكاد انك تحسدني على اسمي كل اشوي وعلقت عليه
ضحك ذيب فرحان على ردت فعل متعب انها تغيرت حيل : والله من حبي لاسمك باين ان عمي الشيخ حصلت له متعاب كثيره يوم انولدت
ضحك متعب : لاااحول
جاسم : بس انت وهو الحمدلله على سلامة خيتي وماتشوف شر
كنعان : يسلمك ربي الشر مايجيك
هزاع : طهوره باذن الله
كنعان : سلمت ياخوي ياهزاع
فياض : اخر الالام باذن الله
كنعان : باذن الله
زيد ناظر لفياض بتفكير وشلون اخر الالام لزوم تتالم لما تولد وش يقول ذا وعيالي ابتسم زيد على ذا التفكير ورد ذبلت ملامحه وش عياله وش دخل خوله بعياله خوله بكل الاحوال بتروح لادهم نزل زيد راسه بذبول والكل ملاحظ
ذيب : وش فيك يازيد ليكون تعبان
رفع زيد راسه بهدواء مبتسم : اييه وكاد انك صدعت لي راسي
ذيب : وشو انا مصدع راسك
جاسم : ابد ذيب هجد ماعاد هو مثل اول
ضحك ذيب : والله ياجاسم ان متعب هجد وزيد باذن الله بعده مير انا ذا طبعي ماغيره
متعب : وش الي هجدت ترى انا ماتغيرت
ذيب : وكاد ان عمي الشيخ ماعاد بيعرفك وبيسال وين ودينا ولده
متعب : اقول ياذيب وش كانت نيتك من البدايه
ضحك ذيب : كان ودي اغير عصبيتك السريعه وحدة لسانك
متعب ابتسم : ووش تشوفون قدر ذيب يغيرني
هزاع مبتسم : اييه يامتعب ترى انت الحين مبتسم لو انك مثل اول وش يفككم
ضحك متعب : والله تعبني ذيب ماينفع معه الا كذا
ضحك ذيب فرحان : ايييه مير كذا احسن يامتعب
جاسم : والله وقدرت ياذيب تسويها
ذيب : اي مير باقي زيد
ناظره زيد بهدواء : وش فيني انا
ذيب مبتسم : ابد اشياء بسيطه وباذن الله بتتغير
زيد رفع حاجبه : والله انا عاجبني حالي والكل يشهد اتركني ياذيب بحالي
ذيب : والله ماتركتك يازيد وانت صرت بحسبة اخوي
زيد ابتسم : لاصرت ولا بكون دام كذا خلك بعيد لاتقرب
ضحك ذيب بصوت عالي : والله يازينكم واني محظوظ برفقتكم
فياض ابتسم : اقول اتركوكم من ذي السوالف خلونا بالمهم
جاسم : ايه صحيح وش قلتو يافياض بتكونو معنا
ابتسم فياض : اكيد بنكون معاكم وقفتكم معانا وشجاعت خوله ودفاعها على ابوي ماننساها ابد
كنعان : الحمدلله الي مافقدنا احد
فياض : الحمدلله مير ياذيب اذكر انكم كنت بتتكلمون عن خطه وش هي
ذيب ابتسم : اييه دام احنا مجتمعين اسمعو اقترح جاسم وقال وش رايكم كلنا بنرجع لديرتنا ونتفق على يوم نهجم به كلنا على الغزو بدل ماننتظر لين يهجمون علينا
فياض فكر فيها شوي : مير محد يدري بمخباهم وشلون
ذيب ابتسم : اذا على ذي اتركوها عليا انا اكثر واحد اعرف ذي الصحراء واشك انهم بين الجبال الثلاثه الحمراء
جاسم ابتسم : اذا كذا اقرب قبيله لهنك بتكون قبيلتنا
مير شلون قربنا وماهجمو علينا للحين
متعب : وكاد خايفين حد يعرف مكانهم لاجل كذا ماهجمو
كنعان : بكذا بيكون معقول مير لازم بالاول نعرف شلون هي حراستهم وشلون هي منطقتهم لاجل نتجهز زين
زيد : واكثر من كذا ماندري عن عددهم ولزوم بالاول بنتاكد من امان قبايلنا وكبارنا وحريمنا ونشوف الوضع المناسب واليوم المناسب لاجل نهجم
هزاع : كلامك صحيح بالاول لزوم نتاكد ونحرص على القبايل ومانتركها بدون امان
متعب : لكن اذا كذا لزوم يكون بيننا رسايل واخاف حد من الغزاه يمسك ذي الرسايل
فياض ابتسم : بذي عندي حل
جاسم : وش الحل
فياض : الرسايل بتكون عبر الحمام وانا عندي حمام مربيهم زين لرسايل السريه والسريعه
هزاع : والله زييين مير شلون بتعرف طريقها لنا
فياض : كل واحد بياخذ معه حمامه وبترسلوها من قبايلكم لقبيلتي وبكذا بتكون كل حمامه حفظت طريقها زين
متعب : ووشلون بتفرق بين الحمام
فياض : الرسايل بتنكتب برجل الحمامه اليسار وعلامة كل قبيله بتكون برجلها اليمين
ذيب : والله جبتها يافياض بكذا بنتواصل زين
جاسم : الحين باقي خوله تتعافى زين لاجل نرجع
كنعان : بذن الله خير يوم او يومين وبتكون بخير
زيد بصوت خافت : باذن الله
،
عند الغدير وصلت نجلا وباين انها زعلانه
هند : نجيله وش فيك وش مزعلك
تنهدت نجلا : عصب عليا متعب قدام الرجاجيل
فاطمه تبسمت : وليه عصب عليك
فهده : وش وداك عندهم اصلا
هند ضحكت : اقول نجيله جد شلون قابلتيهم
نجيله تذكرت الموضوع وابتسمت من قلب ولمعت عيونها بسعاده : ايييه خووووله صحت
هند بصدمه : تمزحييين
فاطمه : وتو تقولين
نجلا برطمت : المشكله متعب قهرني يوم عصب عليا قدامهم
فهده : ايه صحيح وش دخلهم بذا الموضوع
نجلا : ايييه لما صحت خوله صرخت بفرحه وسمعوني وخافو ومادريت الا وكنعان وزيد وفياض ومتعب داخلين عندي انا وهند ولما استوعبو طلعو كلهم ماعدا كنعان بقى عند اخته ولما طلعت ضرب متعب راسي بعصبيه
فاطمه : وكاد خوفتيهم معاهم حق يعصبو
هند : بذي الضروف اكيد بيخافو ليكون دخل احد من الغزاه لشق الحريم ترى مالومهم لانهم خايفين علينا
تنهدت نجلا : ايه صحيح مير اني زعلت من نظراتهم المعصبه
ابتسمت فهده : اجل تعالو نروح نلقى خوله ونتحمد لها بالسلامه
