Less Ice, More Sugar (Completed)

Ep - 13

အိပ်မက်တစ်ခုကို မက်နေရသလိုမျိုး။

အခုထိ အိပ်မက်ထဲကနေ ရုန်းမထွက်နိုင်ဘဲ ရှိနေရသလိုမျိုး။

စာအုပ် - မနက် သုံးနာရီ
ရေးသူ - မနက် သုံးနာရီ

................

[ဤ ဇာတ်လမ်းတစ်ပုဒ်လုံးအား ၂၀၂၀၊ ဒီဇင်ဘာလတွင် အပြီးသတ် ရေးခဲ့ပြီး ဖြစ်ပါသည်။ အပိုင်းများမှာ ယခုကာလတွင် ရေးသားထားသော အပိုင်းများ (လုံးဝ) မဟုတ်ပါကြောင်း။]

.................

" ဟာကွာ။ လန့်လိုက်တာ။ "

အပေါ့အပါး သွားပြီး သန့်စင်ခန်းထဲက ထွက်လာချိန်နှင့်ကွက်တိ သန့်စင်ခန်းအဝမှာ ဒါလ်လယ့်ကို မြင်လိုက်ရတာကြောင့် ဘင်း ပုခုံးနှစ်ဖက်စလုံး ဆတ်ခနဲ တုန်သွားသည်။

ရုပ်ရှင်ရုံထဲ ရောက်နေလို့ မျက်စိလည်ပြီး ယောက်ျားလေးသန့်စင်ခန်းနှင့် မိန်းကလေးသန့်စင်ခန်းများ ရောသွားသလားလို့ ဘင်း မထင်ရဲထင်ရဲ ထင်ကြည့်သေးသည်။ ဒါပေမယ့် ဒါလ်လယ့်လို ကောင်မလေးက အဲဒီလိုအမှားမျိုးတော့ လုပ်မည့်ပုံ မပေါ်။

" နင် ဒီအဝမှာ ဘာလာလုပ်နေတာလဲ။ တခြားကောင်လေးတွေ အထဲမှာ သူတို့ကိစ္စ သူတို့ လုပ်နေကြတယ်။ မမြင်သင့်တာတွေမြင်ကုန်ဦးမယ်။ ဒီဘက်ကို လာ။ "

ဒါလ်လယ့်လက်ကောက်ဝတ်ကို ဘင်း ဖွဖွလေး ဆွဲပြီး ရုပ်ရှင်ပိုစတာဘုတ်တွေရှိရာ အနက်ရောင်နံရံအနီး ဆွဲခေါ်လာမိသည်။

" ရုပ်ရှင် စပြနေပြီကို ဘာလို့ အထဲ မဝင်သေးတာလဲ။ "

" နင့်ကို ဆဲမလို့ စောင့်နေတာ။ "

" ဟမ်။ ငါ နင့်ကို ဘာလုပ်မိလို့လဲ​။ "

ပြူးကြောင်ကြောင် မျက်ဝန်းတွေဖြင့် ဘင်း အလန့်တကြား မေးခွန်း ပြန်ထုတ်မိသည်။
ရုံအတွင်းထဲမှာက ဆွန်းအာရယ်၊ ဂျွန်ရယ်၊ အစ်ကိုဒိုယွန်းရယ် ရှိနေတဲ့အတွက် အခုလို နှစ်ယောက်တည်း လွတ်လွတ်လပ်လပ် စကားပြော၍ရအောင် သန့်စင်ခန်းအဝမှာအထိ ဘင်းကို ဒါလ်လယ် တကူးတက လာစောင့်နေတာ ဖြစ်မည် ထင်သည်။ ဒီလို အခြေအနေမျိုးကို အမှန်အတိုင်း ပြောရလျှင် ဘင်း တကယ် သဘောကျပါသည်။