Less Ice, More Sugar (Completed)

Ep - 16

'ဘယ်လောက်အထိ ပျော်ရွှင်ချင်သလဲ' လို့ လူတွေက မေးတယ်။

'ငါ နာကျင်ခဲ့ရသမျှ အတိုင်းအတာလောက်' လို့ ပြန်ဖြေဖြစ်ခဲ့တယ်။

စာအုပ် - မလဲကျပါနဲ့
ရေးသူ - ဂျိုဆောင်းယုံး

.................

၂၀၁၇။
လွန်ခဲ့သည့် သုံးနှစ်ခန့်။ ။

.................

" နမ်ဝူ။ အစ်မကို ဒါလေး တစ်ချက် ကူပေးပါဦး။ "

စင်ပေါ်မှာ ထားရှိရမည့် မိုက်ကရိုဖုန်းတန်းနှင့် အလှဆင်ပစ္စည်းဗုံးကို လက်နှစ်ဖက်စလုံးဖြင့် မနိုင်မနင်းသယ်ဆောင်ထားသော စီနီယာတန်းကျောင်းသူတစ်ဦးက အနောက်ကနေ သူ့ကို လှမ်းခေါ်သည်။ ထို့ကြောင့် ခန်းမကျယ်ကြီးထဲ တစ်ဝက်ခန့် စီရီပြီးသွားပြီ ဖြစ်သည့် ထိုင်ခုံတွေဆီကနေ အကြည့် တစ်အောင့် ဖြတ်ကာ ကျောနောက်ဖက်သို့ အာရုံ လှမ်းစိုက်ရသည်။

" ဟုတ်ကဲ့ အစ်မ​။ ကြည့်ဦး။ တစ်ယောက်တည်း သယ်လာရတာတွေ များလိုက်တာ။ "

ပြောပြောဆိုဆိုဖြင့် လေးလံသော အလှဆင်ပစ္စည်းဗုံးကို လက်နှစ်ဖက်ထဲ သူ လွှဲပြောင်းယူပေးလိုက်သည်။ "ကျောင်းအုပ်အသစ်မိတ်ဆက်ပွဲနှင့် ပျော်ပွဲရွှင်ပွဲ" စာတန်းပါသည့် ဗီနိုင်းလ်စ ခပ်ကြီးကြီးတစ်ခုကို စင်မြင့်ထက်က နံရံပေါ်မှာ ဒေါင်လိုက် ချိတ်တွယ်ရင်း ကျောင်းသားကျောင်းသူတစ်ချို့က အလုပ်များလျက် ရှိ၏။

" စီနီယာ ပါဝါ ပြပြီး နမ်ဝူ့ကို အရမ်း ခိုင်းစားနေတာ မဟုတ်ဘူးလား နင်။ "

ခပ်မြူးမြူးအသံတစ်သံက နံဘေးကနေ လွင့်ပျံလာသည်။

စက္ကူဗုံးကို စင်ပေါ်တွင် သွားထားပေးရန် ဟန်ပြင်နေနှင့်သော ခြေလှမ်းတွေဟာ ထိုအသံကြောင့် တုံ့ကုန်သည်။ သူ့အနားတွင် ရှိနေသည့် အစ်မကတော့ မရယ်ချင်ရယ်ချင်ဖြင့် တိုးဖျော့စွာ တစ်ချက် ရယ်သည်။

" ဘာမှ မခိုင်းရသေးပါဘူးနော် ချွဲဂျင်ဆောင်းရေ။ "

" နမ်ဝူ။ အစ်ကို့ကို ပေး။ "

သူ့လက်ထဲက စက္ကူဗုံးဟာ မျက်စိတစ်မှိတ်အတွင်းမှာတင် အစ်ကို ဂျင်ဆောင်းလက်ထဲ သိမ်းယူခြင်း ခံလိုက်ရသည်။ ဟိုအစ်မသည် ဘယ်သူ သယ်ပေးပေး ဘာကိစ္စမှ မရှိဘူး ဟူသော မျက်နှာထား။ အဲဒီအစ်မနှင့်အတူ အစ်ကိုဂျင်ဆောင်းက စင်မြင့်ရှိရာဘက်သို့ လျှောက်သွားနေချိန်မှာ သူကတော့ မတ်တပ်ရပ်လက်စနေရာမှာပဲ ထိုင်ခုံတစ်ချို့အား ဆက် နေရာချနေမိသည်။