ဆရာနှင့် ဘေးချင်းယှဉ်လျက် ထိုင်နေမိသည်။
ဘာစကားကို ဘယ်လို စပြောရမလဲတော့ မသိ။
ဆရာ့ကားအတွင်း ဝင်ထိုင်ရမှာ တစ်မျိုး ဖြစ်နေ၍ အနောက်ဖုံးဖွင့်ပြီး အနောက်ခန်းတွင်ပဲ ထိုင်ဖို့ ဂျွန် စကားစကြည့်တော့ ဆရာက အလိုက်တသင့် လက်ခံသည်။
အခုဆိုလျှင် ဆရာ့ဘေး နီးနီးကပ်ကပ်မှာ ဒီလိုမျိူး အတူ ထိုင်နေရတာကတောင် ဂျွန့်အတွက် တအား မျက်နှာပူစရာ ကောင်းနေပါပြီ။ အားလည်း နာရသည်။ ဆရာ့အပေါ် ကျူးလွန်ခဲ့ဖူးသည့် အပြစ်များစွာကို ပြန်တွေးမိတော့ ဟိုးမြေကြီးအောက်သို့ပင် ဂျွန် စုံးစုံးမြုပ် ကျွံဝင်သွားချင်သည်။
နံဘေး၌ အတူ ယှဉ်တွဲကာ ရှိနေရခြင်းအား ဂျွန် အနေခက်မှန်း သိသွားပုံရသော ဆရာဟာ ကားအနောက်ဖုံးခန်းတွင် ဂျွန့်ကို တစ်ယောက်တည်း ထိုင်စေခဲ့ပြီး၊ ဆရာကတော့ ဂျွန်နှင့် မျက်နှာချင်းဆိုင်ရင်း မတ်တပ်ထရပ်ပေး၏။" ပြောထွက်ဖို့ ခက်တဲ့ စကားမျိူးလား။ "
ဒါနှင့်ဆိုလျှင် ဆရာ့ဘက်က ဂျွန့်ကို စကားစပြောလာတာ ဒုတိယအကြိမ်မြောက်။
ဟိုးအရင်ကတည်းကသာ ဆရာ့ရှေ့မှာ ဂျွန် နည်းနည်းလေး လိမ္မာကြည့်ခဲ့မိလျှင် ဆရာ ပေးလာမည့် လှလှပပ အခွင့်အရေးတစ်ချို့ကို အပိုင်ရချင် ရခဲ့လောက်မလား။ ဘာပဲဖြစ်ဖြစ် အခုတော့ အရာအားလုံးက အတိတ်၏ အရိပ်တွေ သက်သက်ပဲ ဖြစ်သွားခဲ့ရပါပြီ။" ဟုတ်တယ်။ ပြောထွက်ဖို့တော့ နည်းနည်း ခက်တယ်။ ဒါပေမယ့် ပြောမှာပါ။ နောက်တစ်ခေါက် ထပ်တွေ့ဖို့က မသေချာဘူး။ နောက်တစ်ခေါက် ထပ်တွေ့ရင်တောင် သိချင်ယောင် ဆောင်ဖြစ်တော့မယ် မထင်လို့။ "
ဆရာက အသက်ကို ဖြည်းဖြည်းနှင့် ဖျော့ဖျော့လေး ရှူရင်း အဲဒီအရှေ့တည့်တည့်ကနေ ဂျွန့်ကို ငေးနေသည်။ ဆရာဟာ ဂျွန့်ကို ဘယ်နှစ်ကတည်းက စလို့ အပြီးတိုင် လမ်းခွဲခဲ့သလဲ မသိပေမယ့် ဂျွန်ကတော့ အခုထိ ဆရာ့ရှေ့မှာ ပြတ်ပြတ်သားသား လမ်းမခွဲဖြစ်သေး။ အဲ့ဒါကြောင့် ဒီနေရာမှာ ဂျွန် ပေကပ်ထိုင်နေမှ ရမည်။
အဆုံးသတ်တွေ ဆိုတာ သူ့နည်းသူ့ဟန်အတိုင်း ပြီးဆုံးသွားရုံနှင့် အဆုံးသတ်အစစ်တစ်ခု ဖြစ်မသွား။ အမှန်တကယ် ပြီးဆုံးကြောင်းကို ကာယကံရှင်ကိုယ်တိုင်က လက်သင့်ခံပေးလိုက်မှသာ အဆုံးသတ်အစစ်တစ်ခုအဖြစ် ပီပီပြင်ပြင် ဇာတ်သိမ်းသွားရတာ ဖြစ်သည်။
YOU ARE READING
Less Ice, More Sugar (Completed)
RandomIf life is a movie, you guys are the best part. ❤️