Less Ice, More Sugar (Completed)

Ep - 25.2

ငါ့ ဒိုင်ယာရီစာအုပ်ကို လက်ဆောင်အဖြစ် ပေးမိတဲ့ တစ်ဦးတည်းသော လူက မင်း ဖြစ်နေရင် သိပ်ကောင်းမယ်လို့ တွေးမိတယ်။

ငါ့ရဲ့အတွေးသေးသေးလေးတွေက အစ အားလုံးကို သိနေရင်တောင်
နည်းနည်းလေးမှ စိတ်အနှောင့်အယှက် မဖြစ်ဘဲ
နှစ်သိမ့်မှုတစ်ခုကိုတောင် ပေးလာဦးမယ့် အဲဒီလို လူ။

မင်းက ငါ့အတွက်
အဲဒီလိုလူသာ ဆိုရင်။

စာအုပ် - မနက် သုံးနာရီ
ရေးသူ - မနက် သုံးနာရီ

...........................

လွန်ခဲ့သော နာရီဝက်ခန့်။ ။

...........................

" ခရစ်စမတ်နေ့မှာ တစ်ယောက်တည်း အရက်တွေ သောက်ထားတယ်။ လူဆိုးလေး။ ဆန်တာက နင့်ကို လက်ဆောင် မပေးတော့ဘူးတဲ့။ "

ဝိုင်းစက်သွားသည့် မျက်ဝန်းတစ်စုံနှင့် ဘင်းက ဒါလ်လယ့်ကို မော့ကြည့်သည်။ ခရစ်စမတ်သစ်ပင်အောက်၌ ရှိနေသော အနီရောင် သမင်ဂျို ဘီးကုတ်ကို ကောက်ယူရင်း ဘင်းဦးခေါင်းပေါ် ဖြည်းဖြည်းချင်း ဒါလ်လယ် လွှမ်းခြုံပေးမိသည်။ နှာခေါင်းထိပ်ကသာ ဒီထက်ပို နီနေလျှင် ဘင်းဟာ တကယ်ပဲ ဆန်တာ့ စီးတော်လှည်းကို မောင်းနှင်ပေးသည့် အချိန်ပိုင်း သမင်လေးအဖြစ် ငှားယူခံရတော့ဖို့ သေချာသည်။

" မယ်ရီခရစ်စမတ်။ ဘင်း။ "

မယ်ရီခရစ်စမတ် ဟု ဘင်းက ပြန်မပြော။ သို့သော် ဘင်းနှုတ်ခမ်းတွေဟာ ရေးရေး ကွေးလာသည်။ ထို အပြုံးများဟာ မယ်ရီခရစ်စမတ် ဆိုသော ဆုတောင်းစကားထက် ပိုကာ တန်ဖိုးရှိတာလည်း အမှန် ဖြစ်သည်။

" ဆန်တာ့ဆီက လက်ဆောင် မလိုချင်ပါဘူး။ "

မီးခလုတ်ကို ဖွင့်လိုက်တာကြောင့် အနောက်က ခရစ်စမတ်သစ်ပင်ဟာ မီးတွေ လင်းလာသည်။ သစ်ပင်၏ အစိမ်းရောင်အရွက်တွေ၊ အနီရောင်ချူလုံးတွေ၊ လှပသည့် ဖဲပြားတွေ၊ ဆန်တာအရုပ်တွေဟာ ရွှေအလင်းရောင် ဟပ်ပြီး ထင်းခနဲ တောက်လာကြသည်။ အပေါ်ဆုံးက တစ်ခုတည်းသော ကြယ်ပွင့်ကလေး၏ အလင်းရောင်ဟာလည်း ဟိုးအပြင်ဘက်က ကြယ်ပွင့်တွေထက်ပင် အာဏာ ပိုရှိနေသေးသယောင်။