Less Ice, More Sugar (Completed)

Ep - 31 (M)

မင်းသာ ပင်လယ်ပြင်ကြီးတစ်ခု ဖြစ်နေရင် အဲဒီ ပင်လယ်ပြင်ကြီးထဲ ငါ အမြဲ နစ်ဝင်နေချင်တာ။

ဘယ်သူ့ရဲ့ အသံကိုမှ မကြားရအောင်၊
ဘယ်သူ့ရဲ့ နှောင့်ယှက်ဒဏ်ကိုမှ မခံရအောင်လေ။

လှိုင်းတွေလိုမျိုး ကမ်းစပ်ဆီ ခဏ ရောက်သွားရင်တောင် ဝေးမသွားမယ့် မင်းအနားမှာပဲ ရစ်သီရစ်သီ။

စာအုပ် - ငါ့အတွက် မင်းက
ရေးသူ - မနက် သုံးနာရီ

..................

ခွဲခန်းထဲ မဝင်ခင် နားနေခန်းအတွင်း တစ်အောင့် ထိုင်စောင့်နေရသည်။
ဂနာမငြိမ်တော့သော လက်ချောင်းများအား တားဆီးဖို့ရာ ဒူးတစ်ဝိုက်မှ စကတ်စပေါ်ကို ဂျွန် ဆုပ်ခြေလိုက်သည်။

ဆေးရုံတွင် လာရောက် စစ်ဆေးကြည့်တော့ ကိုယ်ဝန်က ၉ ပတ်ကျော်ပြီ ဟု ဆိုသည်။ ကံကောင်းသည်က သန္ဓေသားထုတ်ယူမှုအား ကိုယ်ဝန် ၁၂ ပတ်အတွင်း ပြုလုပ်လျှင် ဘာအန္တရာယ်မှ များများစားစား မရှိ။

ဂျွန် အတန်တန် သတ္တိမွေးပြီးကာမှ ဒီ ဆုံးဖြတ်ချက်ကို ချခဲ့ခြင်း ဖြစ်သည်။
အခုလက်ရှိ အခြေအနေမှာဆိုလျှင် ဂျွန့် အနာဂတ်နေ့ရက်တွေရော ဒိုယွန်း၏ အနာဂတ်နေ့ရက်တွေရောက ဂျွန့် ဆုံးဖြတ်ချက်တစ်ခုနှင့်သာ သက်ဆိုင်တော့သည်။ ​ဂျွန် ဒါကို မလုပ်မဖြစ် လုပ်ရမည်။
စကတ်စပေါ် ဆုတ်ခြေထားသည့် လက်ချောင်းဖျားတွေ နာကျင်လာသော်လည်း ဦးနှောက်ဆီ နာကျင်မှုက မရောက်။ ဂျွန် ဒါကို မလုပ်မဖြစ် လုပ်ရမည် ဆိုသော အတွေးတို့သည်သာ တစ်လျှောက်လုံး စိုးမိုးထားခဲ့သည်။

" ညီမလေး ဂင်မ်ဂျွန်။ အခန်းထဲ ဝင်လာလို့ ရပြီနော်။ "

နာ့စ်တစ်ဦးထံမှ ထွက်လာသည့် အသံကြောင့် ဂျွန် ဆတ်ခနဲ တုန်သွားရင်း လက်တွေ့အချိန်များထဲ ယောင်နနနှင့် ပြန်ရောက်လာသည်။ ထို့နောက် မနှောင့်မနှေး မတ်တပ်ထရပ်လိုက်သည်။ သန္ဓေသား ထုတ်ယူခြင်းသည် မိနစ် ၂၀ ခန့်သာ ကြာမြင့်လောက်မည် ဖြစ်၍ အချိန်တစ်အောင့်ကလေးပဲ ဂျွန် သည်းခံထားဖို့လိုသည်။ မိနစ် ၂၀ ကျော်လွန်သွားလျှင် အရာအားလုံးဟာ ပြီးဆုံးသွားလောက်ပြီ ဖြစ်သည်။
ဂျွန့် အနာဂတ်နေ့ရက်တွေရော ဒိုယွန်း၏ အနာဂတ်နေ့ရက်တွေရောအတွက် ဂျွန့်ဆုံးဖြတ်ချက်တွေ ခိုင်မာနေမှ ရမည်။