WRONG WAY [completed]

Extra (2)

Unicode

နေ့နေ့ညည ဘယ်သူ့အကူအညီမှမပါဘဲ ဝူကျိက သူတို့နေမည့်တိုက်အိမ်လေးကို ဆောက်လုပ်သည်။အုတ်တွေကို သူကိုယ်တိုင်သယ်ပြီး သူကိုယ်တိုင် ဘိလပ်မြေဖျော်၏။အာရန်က ထိုသို့ပင်ပင်ပန်းပန်းအလုပ်လုပ်နေသည့် ဝူကျိကိုကြည့်ပြီး သူ့အစားပင်ပန်းလာရသည်။အာရန်ရဲ့ လက်တစ်ဖက်မှာ မက်မွန်သီးတစ်လုံးကိုင်ထားလျက် အရည်တစ်ရွှမ်းရွှမ်းဖြင့် တစ်ကျွတ်ကျွတ်ကိုက်စားလို့နေသည်။

နောက်ဆုံးမှာ ဝူကျိပြောသလို ထိုင်မနေနိုင်တော့ဘဲ သူဟာ အုတ်တွေကို သွားသယ်တော့သည်။ဝူကျိဟာ ချက်ချင်းပဲ အုတ်စီနေရာမှ

"အာရန်လေး.. ဘာလုပ်နေတာလဲ..ကိုယ်ပြောထားတယ်လေ..အေးဆေးထိုင်နေပါလို့ဆို "

"ဘာမှမဖြစ်ပါဘူး..ဒါကလည်း ကျွန်တော်နေမဲ့အိမ်ပဲကို.. ကျွန်တော်လည်း ကူလုပ်ပေးသင့်တာပေါ့..ခင်ဗျားမောနေရင် ခဏသွားထိုင်နေလိုက်.. ကျွန်တော်အုတ်တွေသယ်ပေးထားမယ် "

"အာရန်တောင် အခုလိုအလုပ်လုပ်နေတာ..ကိုယ်မောလို့ ဘယ်ဖြစ်မလဲ..သြား..ဘိလပ်မြေအုပ်မဲ့နေရာမှာ သွားထိုင်နေ.. ကိုယ်အုတ်တွေလာချပေးရင် အာရန်က ယူပြီး ဘိလပ်မြေအုပ်ပေး..ဒီလောက်ဆို ကိုယ်လည်းသိပ်မပင်ပန်းတော့ဘူးပေါ့..ဟုတ်ပြီလား "

"ဘာလား..ကျွန်တော်က ကိုယ်နေရမဲ့အိမ်မို့လို့ကူလုပ်ပေးနေတာပါနော်.. ဘယ်သူက ခင်ဗျားပင်ပန်းမှာကို စိတ်ပူမှာတဲ့လဲ "

အာရန်က နည်းနည်းလေးတောင် သေးသေးတင်မခံချေ။ဒါပေမဲ့ အရင်လိုစကားမပြောမဆိုခဲ့တုန်းက အချိန်ထက်စာရင်တော့ အခုလိုရန်တွေ့တာလေးက အနည်းငယ်တော့နေရထိုင်ရသက်သာစေသည်။

"အာရန်..ကိုယ်ဘယ်တော့မှ သူများအတွဲတွေလို ချစ်ကြည်နူးစကားလေးတွေကြားရမှာလဲဟင် "

နှုတ်ဖျားမှ ထိန်းမနိုင်သိမ်းမရ စနောက်မိတော့ မျက်နှာတစ်ပြင်လုံး တစ်ဖြည်းဖြည်းနဲ့အနီရောင်ရင့်လာကာ မျက်နှာတစ်ဖက်သို့လွဲသွားသည်။ထိုအချိန် လေတိုက်လိုက်သည်ကြောင့် အနီးကရေကန်ထဲ လှိုင်းကြက်ခွပ်လေးတွေဖြစ်သွားရကာ မသိရင်ငါးအကြေးခွံအတိုင်းပင်ဖြစ်သည်။