اكتفت شافت فيه بهدوء.. تجاوزاتو و توجهات لفين مليوحين حوايجها.. لبسات السروال و التيشورت و خرجات تحت نظراتو.. غرس صباعو وسط شعرو المبلل مرجعو للخلف بعصبية.. هز لفيست ديالو و الخنجر و خرج بدورو..
••• في المغرب...
شافت فانعساها فالمراية و هي راضية على شكلها.. كانت لابسة فستان ابيض صيفي بصميطات رقاق بالكاد واصل لركبتها.. كان ضيق من جهة الخصر و تنورتو منفوخة..
شعرها البني طالقاه متموج و دايرة ميكاپ غالب عليه اللون الوردي.. كانت كتبان جميلة و غالبة على شكلها البرائة..
هزات حقيبتها الصغيرة و خرجات من غرفتها.. غادة فالكولوار و هي تسمعو قال من خلفها..
غيث : فين غادية؟
نجلاء : ' ضارت لعندو ' ماشي سوقك
غيث : ' مقرب لعندها ' غتقولي فين خارجة فهاد الوقت و لا نرجعك لبيتك
نجلاء : ' تأفأفات ' اووووف و نتا مالك غير حاضيني.. واش انا كنسولك فالدخلة و الخرجة فين غادي و فين كنتي
غيث : رجعي لبيتك و لا نمرمق مك
نجلاء : ' كتغبن ' و غادية عند صاحبتي ياااه.. و ماما فخبارها
غيث : و متعطليش
نجلاء : واااخة
تمشات مبعدة عليه و كتگمگم.. فالمدة الي انتقل فيها هود لمدينة آخرى و ولا كيغيب بزاف.. رجع غيث لعادتو لقديمة معها.. مقابلها فين غادة و فين جاية..
و فبعض الاحيان كيكون مصر أنه يوصلها و يجي ليها.. هادشي خلاها تحقد عليه و تمنات لو رجع يسافر كيف قبل باش تحرك بكل حرية..
طلعات لسيارتها و خرجات من الفيلا.. بعد مدة دخلات مع بوابة فيلا صغيرة.. هبطات و هي تقرب عندها صديقتها لمياء.. تسالمو و جلسو فالجردة كيتعاودو..
لمياء : اوا كيف داير الحب ديالك
نجلاء : مقلق مني
لمياء : اويلي علاش.. شنو درتي ليه المسخوطة
نجلاء : مادرت والو.. السيمانة الي فاتت مكانش كيف ندير نتلاقى بيه.. قلتها ليه و من تماك مباقي عيط.. كنصوني ليه و مكيجاوبش.. حدو سيفط ليا ميساج قاليا مشغول هاد الايام
لمياء : ناري على كلخة.. واش بحال هداك يقلقوه الناس.. بغيتي يفلت من يديك و تطيرو ليك شي وحدة.. شوفي كيف شاد فيك واخة عام هذا و نتي مجرجراه.. خرجتي معاه بالحساب.. و كان كيعاملك كيف شي أميرة
نجلاء : قلت ليك منقدرش نشوفو وقتما بغا.. و زيد عليها غيث داير ليا الحصار.. و انا عارفة الي ساق لخبار هو و هود يذبحوني مافيهاش
مطات شفايفها و قالت..
لمياء : و هما عايشين الحياة و نتي حرام عليك.. غيث شحال من مرة شفتو مركب معاه واحد المشعكة ماعرفت شنو عجبو فيها.. و هود كلشي عارف العيالات كيتلاوحو عليه و مجالس بلاش.. و نتي فاش لقيتي واحد باغيك يحرموها عليك
نجلاء : و لكن أنا منقدرش ندير شي حاجة من ورا عائلتي
لمياء : علاش نتي كديري شي حاجة خايبة.. و بقاي هاكة حتى ينفر منك و يرميك
نجلاء : ' تغرغرو عينيها ' لا.. منقدرش نعيش بلا جعفر.. أنا كنبغيه
لمياء : اوا جمعي راسك و عرفي كيف تحافضي عليه
نجلاء : ' بتساءل ' شنو ندير؟؟
أنت تقرأ
أقْـنعَـة بَـشرِيــة
Misterio / Suspensoقصة " أقـنعَـة بَـشرِيــة " كتابة : رجاء موري " Remember, there are two sides to every story " الموسم الثاني لقصة ' قاتلة بروح بريئة '.. غتكون بنفس Theme لكن بموضوع مختلف.. أحداث جديدة مليئة بالتشويق و الغموض كيف العادة.. هي قصة بوليسية مع نكهة...
