أقْـنعَـة بَـشرِيــة

•• الفصل الثاني عشر ••

حطها على ظهر الحصان بسهولة و طلع خلفها.. دور يديه على خصرها حتى شد فالصمطة لقدام و ضرب على ظهر الخيل بشوية باش تحرك كيتمشى.. بقاو غاديين في صمت لمدة طويلة حتى كسرو هو و قال..
هود : علاش خرجتي بكري بوحدك
شاهدة : ' بعد صمت طويل ' كنت مخنوقة
هود : شنو الي خنقك
شاهدة : ' الصمت '
هود : ' عاود صياغة السؤال ' شكون الي خنقك
شاهدة : يدي كتعطيني الحريق ممكن تعفيني من أسئلة نتا عارف اجوبتها
هود : معارفش.. و بغيت نسمع منك
شاهدة : ' زيرات على عينيها ساداهم للحظات رجعات حلاتهم و قالت ' بما انك كتصرف على اساس موقع والو.. فحتى أنا من اليوم غنتصرف بنفس الطريقة.. كلشي غيرجع كيف كان لمكانو الطبيعي.. نتا الأخ الأكبر.. و أنا ختك الثانية الي ضماتها عائلتك شفقة على بنت يتيمة الأم.. يمكن ترتاح لأن كلشي غيرجع كيف كان

بعدما نطقات بهاد الكلمات هزات رجلها و نقزات من فوق الحصان.. كانو وصلو لفيرمة.. واخة حاسة بجسمها كولو كيعگرها و ذراعها كتعطيها الحريق.. تعافرات و تمشات مبعدة عليه.. دخلات للدار بانو ليها الكل مجموعين فالصالة و الخوف بادي عليهم.. يالاه ابتاسمات ليهم باش طمأنهم و هي طيح على طولها..
ركان ناض كيجري عندها و بدا يقلب فيها.. ما ارتاح حتى عرف انها غير سخفات.. هزها طالع بيها لفوق و غدير و الاخرين تابعينو مخلوعين عليها..
بسمة الي كانت واقفة عند الدروج.. تلفتات جهة لباب و هو يبان ليها هود واقف عاصر قبظة يديه بجوج.. قربات لعندو كتسول فيه شنو وقع لشاهدة و هو عينيه مركزين غير فالدرج منين طلع ركان هازها و هي مغمى عليها..

رجع تليد و طلع كيجري لعندها فاش عرف شنو وقع.. لقى الغرفة عامرة و العائلة كلها عندها.. بعدما جا الطبيب الي اتاصل بيه ركان.. خرجو خلاوه فحصها.. قالهم الطبيب أن عندها كسر فعظم العضد جهة المرفق و لكن ماشي كسر صعيب..
بضع اسابيع و يتعافى.. و باقي الخدوش سطحية فقط.. اما السبب فالإغماء هو الظغط الي طلع و قلة النوم و التعب غالبا هما السبب.. وصف ليها ادويه عدة و قال خاصها تاخدهم يوميا لمدة معينة.. بعدما رافقو ركان للخارج شكرو لأنه جا حتال لعندهم..

العائلة كيف طمأنو على شاهدة كل و فين مشا.. بقات معها غدير الي بكات فاش شافتها طاحت قدام عنيهم.. واخة ماشي بنتها من صلبها لكن شاهدة لا تقل معزة على ابناءها لاخرين.. و كتخاف عليها بزاف واخة عارفاها قوية عكس نجلاء الي مدللة و هشة.. لكن بجوج كيحضاو بنفس الاهمتمام..
هبطات غدير لقاتهم كيحطو لغدا.. قالت ليهم غير ياكلو و طلعات لغدا لشاهدة.. جلسات جنبها فالسرير و حطات لبلاطو فوق حجرها.. شاهدة شافتها شنو كدير و قالت..

شاهدة : ماما غير سيري تغداي أنا غناكل بوحدي
غدير : عند بالك غادي يدوز ليا و نتي جالسة هنا بوحدك و يدك مهرسة ' دمعو عينيها '
شاهدة : و علاش كتبكي.. راه غير هرس صغير
غدير : تخلعت عليك و منين دخلتي علينا و نتي بديك الحالة و سخفتي.. قلبي كان بغى يسكت ' كتمرر يدها على شعر شاهدة ' واش نتي بخير
شاهدة : انا مزيانة.. المسكنات الي عطاني الطبيب خففو عليا لحريق
غدير : ' كتشوف فعينيها ' سمحيليا تشغلت عليك فهاد لخر.. حاسة براسي مقصرة من جهتك
شاهدة : شكون قاليك مقصرة من جهتي.. ابدا
غدير : عفى بنتي رجعي للدار قدام عينيا.. ركان قريب يمشي متقوليش ليا باغة تبقاي فديك الدار بوحدك
شاهدة : سفيان غادي يعيش معيا
غدير : قلتي غير مؤقتا.. و دابة بديتو تخويو عليا الدار.. فرحت حينت هود رجع يستاقر فالمغرب.. حتى صدمني غيعيش بوحدو.. ' بحزن ' و دابة نتي مبغاش ترجعي.. حاسة بلي كاين سبب خلاك تاخدي هاد القرار.. و منين كنحس بيك مخبية عليا شي حاجة كيضرني قلبي
شاهدة : ' حطات يدها على يد غدير ' ماما
غدير : ' شافت فيها ' نعام ابنتي
شاهدة : لاقبلتو على سفيان غنرجع
غدير : بالصح!!
شاهدة : امم.. و عفاك مسحي دموعك
قربات غدير و عنقات شاهدة و هي كتحاول متعگرهاش.. بقات معها العشية كاملة حتى نعسات شاهدة عاد هبطات.. بغا سفيان يطلع عندها حتى قالت ليه راه نعسات.. تعشاو مجموعين من غير هود و تليد الي مكانوش على الطبلة.. و فاش تأخر الوقت كلا طلع لغرفتو..