أقْـنعَـة بَـشرِيــة

** الفصل الثالث و الثلاثون **

هود مزادش معها الهضرة.. عاود شغل السيارة و ساق بسرعة حابس فران صيك قدام البوابة.. مع تحل لباب حط السيارة و هبط داخل بدون ميتسناها..
كانت الفترة الي وصلو فيها جوايه العصر.. دخل هود للدار و أول شخص تلاقى بيه هو نجلاء.. الي شافتو و جات لعندو كتجري ترمات عليه عنقاتو.. قبلات خدو و هي كتقول..
نجلاء : توحشتك.. وليت قليل فين كنشوفك
هود : ' مرر يدو على شعرها ' لبرهوشة لباس عليك
نجلاء : انا بخيير.. لكن ماما لا هههه.. بعد الزبلة الي درتي.. ولات غير تنگر عليا و تقلب على السبة باش تشكا مني انا و غيث.. كلشي هادشي بسبابك
هود : فين هي؟
نجلاء : فبيتها.. سير حزرها علاه هاد المرة مطولش فالغضبة عليك هههه

خربق ليها شعرها و طلع مع الدروج.. نجلاء كانت خارجة و هي تبان ليها شاهدة داخلة.. قربات عندها كتسالم معها و قالت..
نجلاء : لعجب ههه.. غبرتو بجوج و رجعتو بجوج فنفس الوقت
شاهدة : شكون رجع
نجلاء : هود
شاهدة : اه.. هو الي جابني من المطار
نجلاء : و هو مكيبان فالدار حتى كتكوني.. وليت نغير
شاهدة : ماعندك لاش تغيري.. نتي ختو المدللة و حتى وحدة متقدر تاخد بلاصتك
نجلاء : ' عنقات شاهدة ' عارفة.. فاش كنت صغيرة كنت نتخاصم معاك على قبل هود حيث عاطيك اهتمام كثر.. سمحي ليا كنت برهوشة
شاهدة : عادي.. لو كنت بلاصتك غنحس بنفس الشي
نجلاء : ' باستها فخدودها بجهلية ' نتي ختي حبيبتي الي ديما فاهماني.. ماشي بحال دوك لحلالف
شاهدة : ' بتردد ' فين ماما غدير
نجلاء : فبيتها كترسم يمكن.. راك عارفة فاش تقلق من هود كتبقى جلطخ فالألوان.. وراه طلع عندها.. شوية تشوفيهم هابطين ضاحكين بجوج.. كيعرف يحزرها المسخوط
شاهدة : ' ابتاسمات ' انطلع ندوش و ندوز لعندها

بعدات شاهدة من نجلاء و طلعات بخطوات سريعة لغرفتها.. دخلات و سدات عليها لباب متكية عليه.. سادة عينيها و صدرها كيطلع و يهبط بقوة.. كتحاول تهدأ نفسها.. الظاهر اليوم غيكون طويل..
سفيان : بسم الله الرحمان الرحيم
فتحات عينيها و هو يبان ليها سفيان مشبح فوق الفوطوي وسط غرفتها.. هاز لمنيطة فيدو و اليد الثانية خاشيها وسط كيس لشيپس..
مدور وجهو لعندها و كيشوف فيها كأنه متفجأ بوجودها.. كمل قايل..

سفيان : جيتي ياك.. ماشي ضربتها بنعسة و كنحلم بلي رجعتي
شاهدة : ' ترسمات ابتسامة خالصة على شفايفها ' كتحلم بلي رجعت.. لهاد الدرجة توحشتي نگيري
سفيان : ' حط داكشي من يديه و ناض كيمسحهم فتريكوه ' متوحشتك لا نتي لا نگيرك.. غير هو ماشي الغدر هذا.. مشيتي لميريكان و مخلياني هنا.. و بلما تقوليها خايفة نلصق فيك
شاهدة : ' قربات عندو و دورات ذراعها على كتافو ' مشيت على شي حاجة مهمة.. و هاني رجعت.. ' كتلعب ليه فشعرو ' المعفون شنو درتي من ورايا.. باينة جالس بلا تدواش غا من الحالة الي فيها
سفيان : ' كيحاول يفلت منها ' متبقايش ديري ليا بحال هاكة.. واش كنبان ليك ولد 10 سنين
شاهدة : ' كتضحك ' نقيسك و نلعب ليك فشعرك كيفما بغيت.. يالاه تفرگع
سفيان : ' فلت منها ' شعري كيطلب معاك الشرع
شاهدة : ' خشات يدها وسط خصلات شعرو البنية ' كيعجبني.. طولو
سفيان : الرجال مكيطولوش الشعر و يديرو البانضة
شاهدة : ' عرفاتو علامن كيمعني و جاب ليها الضحك ' اصلا ماشي أي واحد يجي معاه الشعر الطويل ههه
سفيان : مادلا
شاهدة : هههه.. منين كتجيب هاد الهضور ههههه
سفيان : كانت تقولها مّي