شاهدة حدها شافتهم و دورات وجها لعند سفيان الي جالس جنبها.. ابتاسمات فالحين فاش لمحاتو ماد يديه للطبلة و كيهز و يلوح فمو و هو حاضي مع بسمة لا تشوفو..
تسمع صوتو و هو كيلقي التحية عليهم.. بسمة ناضت عنقاتو و وقفات كتشوف فكريستينا الي واقفة جنبو.. قالت بسمة و هي مبتاسمة ليها..
بسمة : welcome dear ' مرحبا بيك الحبيية '
كريستينا : Thank you
بسمة دغيا دورات عليها وجها و شدات فهود جراتو معها.. جلس جنبها فوق المخدة و كريستينا جلسات جنبو من الجهة لاخرى.. غيث و نبراس بداو يتغامزو و حابسين الضحكة.. حينت شافو لبنات كاملين كيف كيديرو فكرستينا..
كن شي واحد فيهم جاب شي وحدة كانو يجريو عليه هو وياها.. و لكن هود شكون يقدر يهضر معاه و لا يحاسبو.. قال نبراس لغيث بصوت منخفض..
نبراس : هادي عشيرة خوك
غيث : واقلة.. اخر مرة شفتو كانت معاه ماركة آخرى.. هادي جديدة
نبراس : و مشروطة ديال المعقول.. مشافتش جهتنا گاع هههه
غيث : لخوادري ولد اللدينة عندو الزهر مع الجنس اللطيف.. ماعرفتش واش غدير رضعاتو شي حاجة انا مرضعتهاش
نبراس : هود دا الكريزما.. و نجلاء دات الجمال.. و نتا ديتي الرضى هههههه
غيث : ' هز كرواصة خشاها ليه فمو ' جمع فمك و نتا شرعتيه
بينما نبراس و غيث كانو مجمعين.. نجلاء كانت ملاهية غا مع تيليفونها كتصور و تلوح فسوشل ميديا مامسوقة لشو واقع.. اما شاهدة فكانت مربعة رجليها و حاطة يدها على شعر سفيان كتلعب ليه فيه.. عيا يهرب راسو حتى زعف و قال..
سفيان : شاهدة واش بنت ليك كانيش كتلعبي بيه
شاهدة : نتا حسن من الكانيش.. و شعرك زوين عجبني و بغيت نلعب بيه
سفيان : ' عجبو الحال و بالسيف حبس ابتسامتو ' عجبك!
شاهدة : امم.. رطب بحال ديال لي بيبي
غا شافتو جمع الابتسامة مخنز و هي تنفاجر بالضحك.. لدرجة مالت كلها عليه كتضحك حتى دمعو عينيها.. البقية شافوها كضحك و ابتاسمو واخة ماعرفوش السبب..
تقادات فالجلسة و بدات تمسح تحت عينيها.. الي لا إراديا مشاو لفين جالس هود.. لقاتو كيشوف فيها مضيق عينيه.. بادلاتو بنظرات تحدي و مبعداتش عينيها ديك الساع.. لكن فاش بان ليها هبط بنظرات متفحصة مع عنقها لصدرها.. زيرات على قبظة يدها و خنزرات فيه..
لوى هود فمو فابتسامة جانبية ساخرة و هو ميل راسو شوية.. جرات طرف الطوپ و تمتمات بشتيمة قدر يقراها من شفايفها.. قطع حرب نظراتهم يد كريستينا الي تحطات على صدر هود و هي كتكلم عند وذنو..
هنا شاهدة بعدات عينيها و خدات كاس ديال الما نزلات عليه..
رجع شي مجمع مع شي حتى قاطعاتهم بسمة.. قالت ليهم بلي تليد قرب يوصل و طلبات من شاهدة تدخل معها للدار.. خرجات الكيك من الثلاجة و مداتها لشاهدة و قالت..
بسمة : قلت لنجلاء تصوني ليا كيف يدخل.. و ديك الساع نخرجو انا وياك.. و عطيتك لكيك حينت غتعنيلو أكثر هاد اللحظة لا نتي قدمتيها ليه
شاهدة : نتي ختو و نتي الي درتي هادشي كولو
بسمة : و لكن ماشي انا الي ' قاطعها صوت الهاتف ' هادي نجلاء.. يالاه نخرجو
أنت تقرأ
أقْـنعَـة بَـشرِيــة
Mystery / Thrillerقصة " أقـنعَـة بَـشرِيــة " كتابة : رجاء موري " Remember, there are two sides to every story " الموسم الثاني لقصة ' قاتلة بروح بريئة '.. غتكون بنفس Theme لكن بموضوع مختلف.. أحداث جديدة مليئة بالتشويق و الغموض كيف العادة.. هي قصة بوليسية مع نكهة...
