أقْـنعَـة بَـشرِيــة

•• الفصل السادس عشر ••

بعدما دخلات كريستينا دار هود شاف فشاهدة عاقد حجبانو.. قال بنبرة حادة..
هود : مكنبغيش نبرر و لا نوضح افعالي.. كلشي كنديرو فالضو.. و لا قلت ليك الحاجة درتها يعني درتها.. و الي مدرتهاش راه مدرتهاش.. الكذوب و التلاعب بالهضرة خليناهم لسي تليد

كان غادي جهة الدروج بغات تبعو توقفو و شي حاجة منعاتها.. راقباتو هابط و كيف اختفى دخلات لغرفتها.. سدات لباب و جلسات على طرف السرير كتراجع هادشي الي وقع دابة.. كيفاش انتاقلو من اعترافو للحديث مع كريستينا..
هي بالصح فداخلها ماقدراتش تصدق هاد الكلام على هود خاصة الإجهاض.. و لكن علاش تليد كذب عليها لمكانتش كريستينا الي كذبات من الأول.. شنو الي خلاه ينقل ليها داك الخبر.. معقول عارف بشنو كتحس من جهة هود.. اكيد لا و الا مكانش عرض عليها الزواج اليوم..
عند هاد الفكرة تذكرات الخاتم.. مشات طلات من البالكون مبان ليها والو مع الظلام.. قررات تهبط تقلب عليه و ترجعو لتليد فالصباح بلما يبقى يتسنى ردها و آمالو مبنية على شي حاجة عمرها تكون..

خرجات و هبطات مع الدروج.. سمعات نبراس كيعيط ليها و هي دور راسها جهة الصالة.. بانو ليها باقي جالسين كلهم.. شافت فهود الي مشبح فوق الفوطوي و بسمة جالسة جنبو مجمعة معاه.. حدو شاف فيها و لفت وجهو..
دارت لنبراس هاني راجعة و خرجات كتزرب حينت مبانش ليها تليد معاهم.. خافت يشوف الخاتم مليوح.. دارت على الدار و وصلات للخصة.. شعلات البيل ديال الهاتف ديالها و بدات تقلب.. تقريبا 10 دقايق و هي كتقلب ملقاتوش.. قلبات حتى فالخصة غاطسة يدها فالماء..
بقات واقفة شحال و شوية حسات بالحركة جنبها.. تلفتات بسرعة بانو ليها الشجيرات كيحركهم البرد.. باستسلام رجعات للدار و دخلات للصالة.. شافها سفيان و كحاز جنب باش تجلس جنبو.. مشات تلاحت حداه و قالت..

شاهدة : مزال منعستي
سفيان : باقي الحال.. و نتي الي طلعتي قلت غتكوني خاشية وجهك فلبيسي.. فين خرجتي
شاهدة : مشيت يضربني شوية ديال البرد
سفيان : اه هكاك.. يسحاب ليا غا مشيتي تقلبي على بوسالـ ' عض لسانو ' زعما تليد
شاهدة : مكانش جالس معاكم؟
سفيان : لا منين دخلنا مبانش.. ' حط راسو على كتفها ' عرفتي هاد بسمة من الصباح مسكتاتش.. گاع الحيوانات الي على وجه الكرة الارضية هضرات عليهم و على امراضهم.. و شحال من مشة عندها.. تخايلي مربية 4
شاهدة : ' كضحك ' ههههه.. من صغرها و هي هكاك.. كانت مربية القنيات و الفكارن و الفلالس.. و الى مات شي واحد كدير جنازة و تحضرنا كاملين.. و عمي كيدفنو فالجردة و نديرو ليه الصدقة.. و الى غبر شي واحد فيهم كنبقاو نقلبو عليه النهار كاملو
سفيان : ' شاف جهة بسمة ' الله بغيتها فهود.. تلقايها حتى هو كتعاود ليه هههههه

تلفتات شاهدة شافت فيهم.. لقات هود عينيه عليها و هو مخنزر.. شافت بسمة كتلعب ليه فالصدفة ديال القاميجة و كتعاود ليه الله اعلم شنو.. غير شار ليها هود بعينيه زعما قولي لهاداك يتهز من حداك.. و هي تردها ليه و قالت ليه شوف مع الي كتلعب بصباعها عند صدرك..
هود زير على سنانو حتى تقلصات عضلة فكو و تقاد فالجلسة.. اظطرت بسمة تحيد يديها و هنا ابتاسمات شاهدة بانتصار.. و دارت عكس الي قال ليها.. حاوطات بذراعها كتف سفيان و حطات راسها على راسو.. ماشي من النوع الي تبغي ثير غيرة هود بشخص آخر.. لكن الأنثى الي داخلها خلاتها مستمتعة بنظراتو النارية..