أقْـنعَـة بَـشرِيــة

** الفصل الأربعون **

بعد مرور شهر..
واقفة فالسطوب و كطرق باصابعها على الفولون.. مطات شفايفها الممتلئة و رمشات بعويناتها متدمرة من الاشارة الي طولات.. آخيرا شعل الضوء الأخضر و هي تحرك..
سايقة سيارتها البيضاء الصغيرة.. دخلات لباركينغ الي تحت المول حطاتها و خرجات.. سدات لباب بعدما هزات حقيبتها البنية الي متماشية مع طلتها..
لابسة تريكو بيج لاصق و فوقو فستان بسميطات رقاق واصلة لركبتها.. كانت ضيقة على جسمها مبينة قوامها الممشوق.. أما وجها فكانت واضعة زينة خفيفة بألوان ترابية..
تمشات بحذاءها الأسود ذو الكعب الدقيق.. دخلات للمصعد و وقفات كتلعب فالهاتف ديالها.. فاش تحل المصعد خرجات و عينيها مزال على الهاتف..

الدنيا داخل المول كانت عامرة.. شي غادي شي جاي.. بجنب محل لبيع الساعات الباهضة كان مجمع ديال الناس.. و كان شخص سارق شي حاجة و قبطوه أمن المول كيتسناو رجال الشرطة يوصلو..
فغفلة منهم تنطر السارق من الحارس الي شادو و كان باغي يهرب.. بدا يدفع فالناس الي مجموعين و غادي جهة ل escalator.. الي شافو جاي كيجري كيحيد من قدامو.. لكن نجلاء الي كانت ملهية مع الهاتف ديالها مرداتش ليه لبال..
كان على وشك يدفعها و هي واقفة جنب السلم.. فاش تجرات نجلاء من يدها بخفة حتى تضرب راسها مع صدر أحدهم.. ماعرفاتش شنو واقع.. دورات عينيها لجنب شافت شرطي تلاح على واحد شدو..
هزات راسها فالشخص الي شادها عندو و هي تبتاسم.. قالت متفاجأة..

نجلاء : نبراس.. !
نبراس : ' تنفس براحة بعدما جرها فآخر لحظة ' ماوقع ليك والو
نجلاء : علاش.. شنو واقع
نبراس : ' دوز يدو على شعرو الكثيف ' الدنيا مقربلة و نتي مسايقة خبار
نجلاء : ' ضارت كتشوف ' هههه مال الناس مجموعين
نبراس : ' سحب يدو من خلف ظهرها ' واحد شفر شي مگانة.. و فاش كان هارب علاين يزف بيك من هنا
نجلاء : ' تفتحو شفايفها ' وااات شفااار.. كان غادي يدفعني.. اميمتي
نبراس : عودي ردي لبال.. و متبقايش هازة تيليفونك فيدك.. راه يبغي شي واحد يطيرو ليك يصدق مطيحك
نجلاء : قلت هنا وسط لمول هانية الا جبدتو.. ' ابتاسمات ليه ' يعنتي نتا عتقتيني
نبراس : ' ساهي فابتسامتها ' كنت كندير خدمتي

........ : نجلاااء.. نجلااااء
نجلاء : ' دارت و هي تبان ليها صاحبتها جاية كتجري ' وفاء
وفاء : فين تعطلتي الزمرة
نجلاء : راك عارفة حصلت فالزحام ثاني
وفاء : ' انتابهات لنبراس الي واقف جنب ' السلام
نبراس : عليكم السلام
وفاء : شكون هاد تيتـ..
نجلاء : ' نطقات بسرعة عرفاتها غتزبلها ' هذا نبراس.. من العائلة
وفاء : ' ردات شعرها الأشقر خلف وذنها ' متشرفين.. أنا وفاء
نبراس : ' اكتفى ابتاسم ليها و دار لعند نجلاء ' خاص نمشي.. ردي بالك و متبقايش غادية فالطريق بلا عقل
نجلاء : ' دارت ليه إشارة بيدها ' اوكي اوفسير ههه
نبراس : ' كيشوف فعينيها بتمعن ' باي

تمشى نبراس خالط على رجالو.. كان لابس سروال اسود و جاكيط جلدية نفس اللون.. و گاط بني طالع.. طويل القامة و كتافو عراااض..
وفاء بقات متبعاه بعينيها و حالة فمها حتى غبر.. حسات بنجلاء ضرباتها تحت ذقنها و هي تلفت عندها..
وفاء : مالنا
نجلاء : جمعي فمك
وفاء : و نتي اش مشا ليك.. خليني نتمنضر.. دارت حركة بيديها بجوح ' شفتي ديك ل ass شحال مشدودة.. اححح أقلبي
نجلاء : شوفي ليك على منحرفة.. مبانت ليك غا هاديك
وفاء : لاااا.. كلشي فيه زوين.. حتى هاديك.. نجلاء احمباك زوجيني بيه
نجلاء : وصلتي لزواج گاع
وفاء : و لمك دبري على صحيبتك.. و لا ياكما بان ليك فيه لبلان
نجلاء : انا.. ! نووو.. نبراس بحالو بحال هود و غيث
وفاء : ' صغرات عينيها ' متأكدة؟!!
نجلاء : متأكدة.. كنعتابرو خويا.. راه كبرنا مع بعضياتنا
وفاء : اوا صافي.. ' حطات صبعها فمها بللاتو و بصمات فالهواء ' هذا ديالي.. بصمت عليه
نجلاء : هههه مسطية