أقْـنعَـة بَـشرِيــة

°°° الفصل الواحد و العشرون °°°

قبل سنوات عديدة..
داخل بناية ضخمة ذات معمار كلاسيكي قديم.. شبيهة بالقِلع القديمة الي معروفة بيها البلاد من زمن العصور الوسطى.. جدرانها عالية و مساحاتها الخضراء شاسعة.. في أحد زوايا هاد البناية كانت بقعة ارضية مغطية بالعشب الأخضر..
او يمكن القول ملعب كتمارس فيه أحد الرياضات المشهورة فالبلاد.. رياضة الرگبي Rugby.. منتاشرين مجموعة من اللاعبين هنا و هناك.. لابسين الزي الخاص باللعبة و الي ضروري ارتداءو.. لكون أهميتو كبيرة في حماية ممارسي اللعبة العنيفة من الإصابات الشائعة..

رؤوس اللاعبين مغطية بالخودات الضخمة.. و الي كيميزهم عن بعض هو لون القميص و الرقم الخاص بكل واحد.. كيتحركو بسرعة فأرجاء الملعب و تقريبا قكل دقيقة كيكونو اصطدامات بينهم..
كان شخص ذو قامة طويلة و جسم نحيف نوعا ما.. كيجري و الكرة فحوزتو.. كان سريع و قدر يضرب نصف الملعب فثواني.. فور ما قرب من تسجيل الهدف اعتارض طريقو لاعب آخر الي دخل فيه بقوة حتى تلاحو بجوج للأرض..
انتهى وقت المباراة و تجمعو اللاعبين الاخرين على الشخصين الي مزال مسرحين فلأرض كيطمأنو عليهم.. ناض الشخص الي دخل فلآخر فآخر لحظة مباغتو و حيد الخوذة..
كان شاب أشقر طويل القامة.. تكلم بعجرفة و هو كيشوف فالشخص المستلقي فلرض..

ويليام : welcome to Scotland mate ' مرحبا بيك فأسكتلندا العشير
مد ويليام يدو ليه باغي يساعدو ينوض.. لكن الشخص تجاهلو و ناض بدون مساعدة ويليام.. نزع الخوذة و هو يهبط شعرو الأسود الكثيف على عينيه..
كان الشاب الوحيد وسط اللاعبين كاملين الي ملامحو شرقية مميزة.. بعد بيدو شعرو للخلف و هو كيشوف فويليام الي على وجهو إبتسامة سخرية.. قال الشاب بصوت خشن و نبرة ثقة..
هود : Thanks ' قرب و حط يدو على كتف ويليام ' I think you need to check your shoulder ' كنظن خاصك تفحص كتفك

ضغط هود شوية على كتفو حتى بان الألم فوجه ويليام.. بعد يدو و تمشى بثقة متاجه لداخل البناية.. باقي الدراري ضحكو لأن فالعادة هادي هي طريقتهم فالترحيب بأي عضو جديد.. لكن شافو أن ويليام هو الي خدا الدقة ماشي هود..
دخلو لغرفة تبديل الملابس.. بان ليهم هود واقف قدام الخزانة ديالو.. كاين الي جا قرب لعندو و مد ليه قبضة يدو.. صافحهم هود بقبضتو و هو كيشوف تقبلهم ليه وسطهم.. هز الفوطة ديالو و اتاجه للحمامات.. كان حيد الزي و بقا غير ببوكسر أسود.. رغم أن جسمو نحيف لكن طول قامتو و عرض كتفيه عاطينو جاذبية خاصة..
دخل لأحد الحجرات و خدا دوش.. لوا الفوطة على خصرو و خرج.. رجع للخزانة ديالو خدا جينز و تريكو ديال الخيط لبسهم.. لبس گاط و دار عليه جاكيط.. مشط شعرو بعدما نشفو و خرج برفقة شاب آخر الي اقتارح عليه يمشيو للكافتريا..

البناية كانت جامعة عريقة فأسكتلندا.. كيتقبلو فيها غير المتفوقين أكاديميا او ذوي المواهب الرياضية.. هود أسبوع باش جا ليها بعدما اتاصلو بيه.. استغرب أنهم استدعاوه و هو مدفعش ليها من أصلو.. لكن فضل يمشي و يشوف علاش تم اختيارو..
بعد يوم كامل بين الحصص رجع للفندق الي جالس فيه.. طلع للغرفة ديالو و حيد الجاكيط.. جلس فوق الفوطوي و جبد الهاتف دوز مكالمة.. تفتح الخط و جاه صوت باه..