أقْـنعَـة بَـشرِيــة

•• الفصل الثالث عشر ••

بعدما مشا تأثير تفاجأها بوجودو فنفس المطعم مع وحدة.. شافت فيه بنظرات باردة و رجعات دورات وجها لعند تليد.. هاد الاخير لاحظ تغير ملامح شاهدة و دور وجهو لفين كانت كتشوف.. بان ليه هود فالطبلة الي جنبهم و عينيه على شاهدة ماحيدهمش.. و مشافش فيه نهائيا..
رجع تليد شعرو للخلف و ماعجباتوش هاد المصادفة الي غتقلب الجو.. لكن حاول يتصرف عادي.. قال و هو كيشوف شاهدة كتلعب فالهاتف ديالها..
تليد : شفتي هود
شاهدة : شفتو
تليد : تبغي انظمو ليه !
شاهدة : معاه رفقة علاش نخصرو عليه الجو
تليد : الي بان ليك

تليد ارتاح فاش رفضات ينضمو ليهم.. يالاه باغي يشير للنادل باش يجي ياخد طلبهم.. بان ليه ظل ضخم جنبو.. تلفت و هو يشوف فهود جر الكرسي الي جنبو بعنف و جلس حداه.. و كريستينا تابعاه كتشوف فحيرة فالأشخاص الي انظم ليهم هود بلما يقول ليها والو.
لكن قالت اكيد من معارفو داكشي علاش.. جلسات حتى هي جنب شاهدة و قالت بابتسامة و هي كتشوف فتليد..
كريستينا : ' الحوار بالإنجليزية ' هاي
تليد : هاي
تلفتات كريستينا لجنب كتشوف فشاهدة و تعاود.. بغات تسول هود شكون هي و الشخص الي معها و خافت يقمعها قدامهم.. اما شاهدة فكتبات الميساج على راحتها رسلاتو و بكل هدوء حطات الهاتف فوق الطبلة..
مرو لحظات صمت غريبة و قرر يكسرهم تليد فاش قال و هو موجه كلامو لهود الي عينيه مزال على شاهدة..
تليد : مغاديش تعرفنا زعما.. ' مد يدو لكريستينا و قال ' انا تليد ولد عم هود.. و الي جالسة جنبك ختو شاهدة
كريستينا : ' فرحات منين سمعات بلي البنت الي محيدش هود عينيه عليها غير ختو ' انا كريستينا و لكن يمكن تناديني كريستي.. تشرفت بمعرفتكم

صافحات يد تليد و دارت عند شاهدة مدات ليها يدها و قالت..
كريستينا : اخيرا تشرفت بلقاءك.. انا كريستي حبيبة هود
شاهدة : ' طلعاتها و هبطاتها ببطء ' متشرفين
دورات شاهدة وجها بملل.. و هي تجمع كريستينا يدها الي بقات منشورة و دارت رجل على رجل حتى طلع فستانها على فخاضها.. رجعات كتشوف فهود الي باين عليه معصب بسبب شي حاجة.. كان منريڤي قبل بسبب الخدمة و دابة زادو نظراتو ظلامو أكثر..
بغات تبدل الجو و تخلي انطباع زوين قدام افراد عائلتو و هي تقول..
كريستينا : اليوم العشا على حسابي.. طلبو الي بغيتو
تليد : ' مشا معها فالخط ' عنداك تندمي منين يجيبو ليك لحساب
كريستينا : نو متخافش.. لكان كثر من الي عندي.. حبيبي غيتكلف
تليد : هههه لا متفقناش على هادشي.. لا ماقدرتيش تخلصي كلشي خاصك دخلي تغسلي لماعن فلكوزينة
كريستينا : وااات.. نو منقدرش.. ضفاري جلست ساعتين باش نقادهم.. نفضل نخلص بطرق آخرى الا غسل لماعن
تليد : ' ضحك ليها و قال بالدارجة ' الله اكبر

شاهدة سمعاتها شنو قالت و قلبات عينيها.. شافت جهة هود بنظرات فهمهم مزيان.. كأنها كتقول ليه مالقيتيش شي وحدة بشخصية أكثر سطحية من هاكة.. هنيئا ليك بيها.. بعدات عينيها عليه و شافت فتليد الي شير للنادل الي جا خدا طلبهم.. متسناوش بزاف حتى تحط ليهم الأكل..
هود شاف فصحن شاهدة و هو يمد يدو خداه.. حط ليها صحنو و خدا صحنها امام نظرات الجميع.. قالت شاهدة بعصبية..
شاهدة : اش كدير
هود : ' هز عنيه فيها و قال ' باغية تباتي فصبيتار
تليد : علاش مالها
هود : عندها حساسية من لكروڤيت.. قبل مطلب لشي حد على گانتك سولو واش باغي يموت
تليد : ' تغير فيه اللون شاف فشاهدة و قال ' واش بالصح
شاهدة : آه
تليد : كنعتاذر مكنتش عارف
شاهدة : ماشي مشكيل حتى انا مرديتش لبال