أقْـنعَـة بَـشرِيــة

°°° الفصل السابع و العشرون °°°

هود : ' للحظة تصدم من الي سمع ' متأكد سميتو أحمد السعدي
مراد : وي هذا اسم الضحية.. واش كتعرفو
هود : اه كنعرفو
مراد : و شنو علاقتو بهادو الي ماتو مؤخرا.. و نتا باش عرفتي أنه يمكن تكون جريمة شبيهة وقعات قبل
هود : فكرت و حدسي طلع فمحلو.. الي مطاحش فبالي هو الضحية يكون أحمد.. و هنا زاد الشك ديالي أن هاد الجرائم عندها رابط واحد الي خاص نعرفو
مراد : ' كيشوف فيه مبتاسم ' واخة بعدتي على حرفة باك و لكن خديتي الموهبة.. بحال الى كنشوف العميد صخر فياماتو
هود : بلما تقول لواليد بلي كنبحث فهادشي.. مابغيت حد يعرف.. أقل ناس عرفو كان أحسن باش نوصل لهاد خينا
مراد : ماشي من عوايدي نخبي على صخر و لكن ندير راسي مسمعت ماشفت.. غير هو راك محتاج مساعدة فالبحث ديالك
هود : لا.. عندي طرقي باش نعرف الي بغيت.. ' متاجه لباب ' سيفط ليا المعلومات على قضية أحمد لإيميل ديالي راه عندك
مراد : هي دابة نيت
هود : ' قبل ميسد الباب ' شكرا الرقيب مراد
مراد : و هانية البطل
هود : ' هز حاجبو '
مراد : ' كيضحك بتوثر ' راه غير ولفت نقولها ليك منين كنتي صغير
هود : ' ابتاسم نصف ابتسامة ' خود راحتك

خرج هود من المركز و طلع لسيارتو.. غادي سايق و يدو عند ذقنو كيفكر و يحلل فالمعلومات الجديدة الي عرف.. شك ان المجرم ماشي اول مرة يقتل و ان عصام ماشي الضحية لولة.. و السبب هو انه فاش قتلو كان عارف اش كيدير..
استهدف المنطقة الي كتخلي الضحية ينزف بسرعة و يموت فثواني.. و بعدها قطع ليه لسانو و حيد ليه عينيه.. هاكة استنتج انه عندو نمط معين كيتبعو فجرائمو و ضروري ميكون عندو ضحايا قبل كان كيكتاشف فيهم هوايتو المرضية..
لكن متوقعش الضحية يكون أحمد صديق الطفولة.. الي بعدما غادر المغرب انقاطعات علاقتو معاه و اخبارو حتى لليوم الي لقاه جالس جنب شاهدة فالحديقة..
تماك نسا واش دوز معاه ايام اللعب و الدراسة و كان كيبان ليه غير يطحنو.. و منين بعد على ساحة شاهدة مباقيش سمع عليه شي حاجة.. صدق هو طول هاد المدة كان ميت غالبا على يد نفس السايكو.. كيفاش يتأكد خاصو طريقة فأسرع وقت..

توجه هود للشقة ديالو.. كيف نزل من السيارة لقى العساس ديال العمارة واقف.. هاد الأخير كيف شاف هود حدر راسو.. طلع فالمصعد و هز راسو شاف فكاميرا المراقبة..
و هو المكان الوحيد الي مركبينها فيه و الي حرص القاتل ميستعملوش.. المبنى مأمن بجهاز الي يستحيل شي حد يقدر يقتاحم اي شقة.. لهذا ممحتاجينش لكاميرات فكل مكان بسبب خصوصية السكان الي أكثرهم عزاب و اختارو هاد المنطقة بالظبط..
هود بدورو كان آخر همو يركب كاميرات داخل الشقة الي غير زايدة ناقصة عندو و كان يستعملها قليل.. على عكس الڤيلا ديالو الي حارسينها رجال مدربين و فيها جهاز أمني صعب اختراقو و نيگرو..

هادشي خلا الامر صعيب يلقى أي أثر للشخص الي قتل كريستينا.. العساس مكانش فمكانو و فاش تحققو عرفو انه كان يتفرج فشي ماتش فداك الوقت داخل غرفتو..
و بالنسبة للقاتل كيف دخل.. شاك أن كريستينا كتعرفو و هذا علاش خلاتو يدخل و مشكاتش انه مصدر تهديد.. او يمكن يكون شخص غريب عليها لكن بسبب حالة السكر الي كانت فيها خلاتو يرافقها و كولو من طبعها المستهتر..
خدا هود بعض اغراضو من الشقة.. سدها و غادر بنية يتخلص منها من بعد.. مستحيل يرجع ليها بعد الي وقع فيها..