هود : ' فالهاتف ' و الله ينعل زااابور مككك القل***.. علاااش متقولهاااش فاش طلعتي.. اش هاد الزم**** ولات فيييك
كمال : و أنا شنو درت.. راه كنت غنقولها ليك فاش جيت عندك مي غير شفت حالتك عرفت غتشعل عليا.. قلت حتى نهبط و نعيط ليك
هود : شنو بغاو هاد الخراااا.. ياك الاجتماع غدااا
كمال : ماعرفتش.. قالو ليا يجي معاك ضروري.. انا كنتسناك لتحت فالطوموبيل
قطع هود و مشا هز واحد من الاكياس.. مشافش فشاهدة الي مخنزرة فيه و هو مخسر الهضرة قدامها بحال الى مخاصو حتى خير..
دخل للحمام خدا دوش بسرعة.. خرج لابس تيشورت رمادي مع سروال جينز كحل.. هز جاكيط لاحها عليه و هادشي تحت نظرات شاهدة.. فاش شافتو ساكت قالت..
شاهدة : فين غادي ؟
هود : عندي غرض غنقضيه و نرجع ' قرب لعندها لطرف السرير فين جالسة ' لبسي حوايجك و لا تعطلت غير نعسي.. متحلي لحد و متفكريش تخرجي واخة يوقع الي وقع
شاهدة : و قول ليا فين غادي و معامن
هود : كمال كيتسناني لتحت.. غير نسالي غنرجع
خطف قبلة من شفايفها و خرج.. مخليها مفاهمة والو و بدون ميجاوب على سؤالها.. ياك هو أول مرة يعتب فأستراليا.. شنو عندو فيها و لاش هاد كمال جاي عندو و هو عارف أنهم فشهر العسل..!
معجبهاش الحال تبقى بوحدها و هو خارج.. و زاد خلاها مشوشة فاش قال ليها يمكن يتعطل.. ناضت شاهدة كتقلب فباقي الاكياس.. لقات بيجامة عبارة على ديباغدوغ و شورط فالگرونة.. حيدات البينوار و لبساتهم على اللحم..
باين المكلخ الي خداهم نسا الملابس الداخلية.. جمعات شعرها ذيل حصان و خرجات من غرفة النوم.. توجهات للمطبخ و حلات الثلاجة.. بانت ليها قرعة ديال العصير..
جبداتها و هزات كاس خوات ليها.. رجعات لبيت هازاه فيدها و تشبحات فوق الفوطوي.. خدات لفون ديالها و بدات تلهي فيه الوقت.. مرة مرة كانت تهز عينها جهة باب الغرفة الي خلاتو مفتوح..
مرت ساعة و من وراها ساعتين و هود مزال مرجع.. خدا معاه الهاتف ديالو لكن هي مزال مشرات كارط جديدة.. فاش تعطل فالرجوع خربقات شوية فالتيليفون و رسلات ليه ميساج.. رشفات من كاس العصير و رجعات طلات على الفون..
بداو اعصابها يلعبو عليها بعدما مرو ساعات و مكاين ليه حس.. كيف قرب الفجر غلبها العياء و نعسات..
••• في المغرب
على غير عادتو فاق غيث اليوم بكري.. ناض دوش و لبس عليه سروال جينز و تيشورت بيض فوقهم سترة بيج.. نشف شعرو و مشطو اللور.. رش من عطرو الي موالف يستعمل و خرج من الغرفة كيصفر..
هبط لتحت و خرج للجردة.. بانت ليه غدير جالسة بوحدها فطبلة الفطور.. الاكل قدامها و هي حاطة يدها تحت ذقنها و ساهية.. قرب لعندها باس على راسها و جلس جنبها فوق الفوطوي..
غيث : ' معنقها بذراعو ' صباح الورد للورد
غدير : ' تنهدات '
غيث : مال الحب ديالي كاعية.. شكون قلقك.. واش سي صخر
غدير : ' دارت شافت فيه ' واش نتوما عايشين معيا فهاد الدار.. لبارح ناضت القيامة و نتا بحال الى موقع والو
غيث : حيث الي وقع عادي.. هود و بسمة مامقتانعيش بهاد الزواج و فرتكو الجقلة قبل متعقد القضية كثر.. فين المشكيل
غدير : المشكيل فخوك الي كيدير غير الي فراسو.. واش محسش بيا لبارح فاش حطني فداك الموقف
غيث : راك عارفة هود آخر واحد تفرضي عليه شي حاجة مباغيهاش.. واخة تكوني نتي
غدير : دار هاكة و زاد.. مبقاتش فيه البنت الي كانو عينيها مدمعين و حابساهم بزز قدامنا.. قطعات ليا فقلبي
غيث : اللهم يجرحها دابة و لا حتى يتزوج بيها و يخليها معلقة.. و لا يصدق خاينها گاع
غدير : شفتك نتا جاي من جهتو
غيث : الواليدة هادشي راه واضح.. هود واخة يكون خايب مغاديش يبغي يظلم بسمة معاه باش يرضيك نتي.. خليه يختار الي بغا هو و يتحمل مسؤوليتو
غدير : ' بنوع من الصراخ ' و شكون هادي الي باغي و متلفاه حتى مشافش بنت عمو الي اي واحد يتمناها.. بغيت غا نعرف شكون هاد المصيبة
غيث : منين يرجع قوليه يعرفك عليها.. ساهلة
غدير : ' ربعات يديها ' ماعندي مندير بيها
غيث : اوا لا.. فين هي غدير الحنانة.. واش نتي ديتي سي صخر الي كنتي كتبغي و باغة تحرميها علينا حنا
غدير : ' صغرات فيه عينيها ' مناش غنحرمك حتى نتا.. شكون هادي
غيث : ' كيضحك ' و غير قلت زعما.. مكاين حتى وحدة هاد الساعة
غدير : ' دوزات يدها على شعرو الاسود ' انا ماشي مبغيتكمش تبغيو و تختارو.. الي بغيت هو تحسنو الاختيار.. منقدرش نشوف حتى واحد فيكم كيعاني.. الي دزت منو خلاني متخوفة من أي انسان قرب من واحد فولادي..
بغيت نعيش مرتاحة و راحتي هي فاش تستاقرو و تكونو هانين فحياتكم.. هادشي علاش انا كنتدخل فكل كبيرة و صغيرة متعلقة بيكم.. ' تغرغرو عينيها ' و لكن هود كنتشطن عليه بزاف.. من نهار بعد و انا مامرتاحاش.. كنبقى نفكر فكيف عايش حياتو و معامن.. امنيتي هو يرجع وسطنا و يستاقر حدايا
*******************
غيث : هود قاد براسو و عارف اش كيدير.. و نزيدك هو حاضينا حنا.. فاش كنت نسافر من هنا لهنا.. كان يعيط عليا و متبع خباري.. و فينما نتخص كنلقى لفلوس جايين من عندو..
يمكن كيبان ليك بعد و تشغل بالخدمة و لكن مغاديش ينسى عائلتو و ميمتو الحنينة ' قبّل خدها ' فاش يرجع عايريه و ضربيه گاع نتي و لكن متفرضيش عليه شي حاجة و الا غيزيد فعنادو
غدير : خرج لباك فكلشي.. الحمد لله نتا فلتي و طلعتي حنين بحالي.. ' كتشوف فعينيه العسليين مبتاسمة ' و ديتي حتى عينيا
غيث : هههه الحنان عندي غا شايط الواليدة.. خاص لمن نعطيه
غدير : ' خبطاتو لكتفو ' ها وذني منك و نسمع درتي شي زبلة.. باك خاصو غير السبة و عند اول غلطة غيصدرك للحدود.. كتسمع
غيث : ' كيضحك ' عارف عارف.. صخر محلفها فيا ههه
أنت تقرأ
أقْـنعَـة بَـشرِيــة
Mystère / Thrillerقصة " أقـنعَـة بَـشرِيــة " كتابة : رجاء موري " Remember, there are two sides to every story " الموسم الثاني لقصة ' قاتلة بروح بريئة '.. غتكون بنفس Theme لكن بموضوع مختلف.. أحداث جديدة مليئة بالتشويق و الغموض كيف العادة.. هي قصة بوليسية مع نكهة...
