٥٢
اخر ربيع
مساء الخير والسرور
اسيل انتي طالق
فتحت حلكي
اي مثل ماسمعت انتي طالق
شكرا بهجت تعرف شكد فرحتني بهاي الكلمه
اني من كل كلبي اشكرك.
ههههههه مو من كلبج تحجيها ميبن محروك كلبج.
ويضحك. بكل غرور
احس نفسي لعبت منه
المهم البيت أريده يفرغ منا للباجر
لا مايحتاج منا لباجر انطيني ساعه و اكمل كلشي
اخاف تتأخر علئ التسليم
كمت بسرعه طلعت الجنط وكمت ألم ملابسي وملابس يوسف
هوايه ملابس وغراض بس اني عندي حماس مصاير
اشتغل بسرعه مو طبيعيه واهس عندي رهيب
وانه احجي ويه نفسي بسرعه اسيل اخاف يرجع بكلامه
لميت الملابس وكتبي ورسوماتي العاب يوسف
المهم ظرف ساعه كملت كلشي
وعزلت ملابس إلى وليوسف نلبسهم
هو ساعه يضحكَ ساعه يحجي ويغلط
ماعرف الرجال يمكن بي انفصام بلشخصيه
يوميه شكل طالعلي
بدلت إلى وآله بسرعه وبديت اطلع الجنط
للطارمه وارجع علئ الباقي وهيج الئ أن آخر شي
أخذت يوسف وطلعت
طلعت من جنطتي المفاتيح مالت البيت وانطيتهم إله
وطلعت هو بقى باب المطبخ واكف
مشيت لرأس الشارع أجرت تكسي
وكتله عندي أغراض بالبيت تكدر ترجع
صعدت وصفتله البيت
وهو هم نزل وياي حتئ يخيلهم بلصندوك
الئ ان كملت صعدت ويوسف بحظني
جريت نفس طويل
واحمد ربي
واني اطلع من المنطقه كلها
وصلت لبيت اهلي وهم نزلي الغراض
حاسبت ودخلت للبيت
وكلت لساره دخل الغراض
هم مااستغربت من شافت الجنط بس مامتوقعه
إلي راح تسمعه
بس هما تلكو ني بسلام وأخذوا يوسف
يلعبون وياه
كعدت بلغرفه واني وساره تصفط بلجنط
امي كالت راح اصلي
روحي واني هم اصلي وتالي نحجي
رحنا
نصلي وساره راحت تسوي عشاء
ويوسف ماطاح من ايدها
كملت صلاه
ورحت وراها شنو مسويه على العشاء
ساره
كالت كباب طاوه
وبعد
ماعرف شنو تردين
عفيه كثري
وكلي وياه طماطه وبتيته هم
ميته جوع هاي الفتره كلها اكل بس شوربه
لو وجبه وحده
ودخلت للغرفه اريد اخلي ملابسي مالكيت مكان الكنتور زغير وملابس ساره وامي
واني هوايه ملابسي
عفتهم بإمكانهم
احسن حل اشتريلي كنتور حتئ لو زغير بس
يبقئ إلى اني ويوسف
وطلعتي دشداشه ولبستها واكو بوفيه عدنا خليت بيها ملابس يوسف
تعشينا واني اكلت اكل جسمي كله يرجف
احنه عمرنا كله ماجعنه الفلوس الي نلزمها كلها نسوك بيها امي ابد مابخلت علينا
صح ماناكل اكل فاخر ودسم
بس مافد يوم فاتتنا وجبه او كمنا جوعانين
بس القله والجوع شفته بيت المقاول
كملت
و حجيتلهم السالفه
ساره ظلت صافنه وفاكه حلكها
وامي بس تستغفر
مامعقوله شون هيج صار
بعد هذا الي صار
لعد منو الي موت نفسه ويطلب الرضا
بس ترضين وخلي شروطج وشنو
تردين بس كولي المهم ترجعين
يمعوده اني مامصدكه من البدايه بس هيج جنت اسايركم
الله مامصدكه
معقوله خلصت منه بدون مشاكل والمحاكم
لاهو براضاته يسويلها مفاجأه
شي فوق الخيال
احس نفسي طايره من الفرحه
علئ شنو فرحانه بالله كولولي ها
يمه لعد هيج خبر مايفرح
ولج اسيل شبيج هذا طلاك مو لعبه وعندج طفل
المفروض حتئ لو رجلج يكول هاي الكلمه
انتي تنتظري يهدء وتروح العصبيه وتكعدين وتحجين وياه
وتتفاهمين انتي وياه مو جايه طايره من الفرح
يعني شون ترديني اتفاهم وياه مثلا
هو مقرر كلشي وجايب رجال يشوف البيت وبساع يريد يفرغه
ومكمل بس بقئ التسليم
