دانا :
هاي اعرفكم على نفسي انا دانا اشتغل في مستشفى صغير في قسم الطوارئ في احد المناطق وعايشه مع ابوي عزام يشتغل في مركز الشرطه برتبة عقيد ، المهم كانت حياتي بخير و راحه لين جاء ذاك اليوم اللي غير لي حياتي كلها كانت عندي مناوبه اخر الليل في المستشفى وكالعاده رحت و كنت جالسه في قسم الطوارئ وحاطه راسي على الطاوله وفيني النوم راحت صديقتي تجيب لنا قهوه عشان نصحصح و فجأه دخل رجال كان متلثم ولبسه كله دم فزيت من مكاني ابي اشوف الحاله اللي معه بس ما كان معه احد استغربت قرب مني وقال لي " جيبي كرسي بسرعه زوجتي بالسياره تنزف " ركضت جبت كرسي وطلعت الحقه مشى رايح ل السياره وانا وراه قربنا من السياره فتح باب السياره الا كان في واحد متلثم معه سلاح وجه سلاحه علي جيت اصرخ الا حسيت في ضربه على رقبتي وفقدت الوعي .. ، بعد فتره من الوقت صحيت لقيت نفسي في غرفه على الارض و جالسين قدامي على الكنب ثلاث رياجيل يدخنون و يسولفون طالعت فيهم وقام واحد منهم و سحبني مع كتفي قومني من على الارض وقال لي " امشي يا دكتوره معي " وقفت مكاني وقلت له " خير مين انتوا ؟؟؟ " عصب علي وصرخ وقال لي " مو وقت اسأله امشي وانتي ساكته " استفزني لما صرخ وقلت " ماني رايحه مكان لين تقولون لي مين انتوا " مسكني مع كتفي بقوه وقال " حنا اللي بندفنك اليوم " خفت منه وتوترت حاولت ادفه بس كان اقوى مني و سحبني بقوه ل الصاله كان في الصاله واحد على الكنب منسدح ولبسه كله دم قربنا اكثر منه وشفت انه مصاب بطلقه في بطنه قال لي اللي ماسكني " وش تنتظرين عالجيه ! "
انصدمت منه وقلت " تستهبل انت جايبني عند واحد مصاب هنا وتقول لي اعالجه بكل بساطه ! اولًا هذا ليش مصاب بطلقه ؟ " رد علي وهو معصب وقال " مو شغلك سوي شغلك وانتي ساكته " قلت له " هذا يحتاج يروح المستشفى ما ينفع هنا مافي ادوات وبعدين ليه ما توديه المستشفى وجايبني لعنده ! " طالع فيني بنظره تخوف وحط سلاحه على راسي وقال " قسم بالله ان ما طلعتي الطلقه وساعدتيه اني لا افرغ هالسلاح كله براسك " تكلم المصاب وقال " تكفى رشاش خلها تساعدني مابي اموت " عرفت ان اسمه رشاش وحسيت الاسم مألوف علي تكلم رشاش وقال " اسمعي يا دكتوره اذا ساعدتيه برجعك ل المكان اللي خذناك منه واذا ما ساعدتيه برجع جثتك ل المكان اللي خذناك منه " طالعت له وانا ماسكه دموعي وقلت " عندك اسعافات اوليه ؟ " راح جاب شنطة اسعافات اوليه و شنطه ثانيه معها وقال " ذي اسعافات اوليه وذي فيها شوية اغراض من الطوارئ مدري بتنفع ولا " جلست على الارض قدام المصاب اللي على الكنبه وفتحت الشنطه وطلعت المقص و قصيت ثوب المصاب وقصيت فنيلته وطلعت الادوات ركبت له مغذي و كانوا جالسين حولي خمس اشخاص غير المصاب لفيت عليهم وقلت " احد يجي يمسك المغذي " قام واحد منهم ومسكه وانا قعدت اكمل شغلي وطلعت الطلقه وجلست اعقم الجرح واخيطه خلصت منه وكنت تعبانه فيني النوم من التعب اول ما خلصت حطيت راسي على الكنبه وما حسيت في نفسي ونمت من كثر التعب .
____________________________________
شرايكم ؟👩⚕️
شرايكم في طريقة سرد القصه تبونها زي كذا ولا زي القصه اللي قبل ؟
طبعًا في شخصيات لسه في ذا البارت مو موجودين لكن بيكونون موجودين بالقصه بس مدري اي بارت بالضبط 🚶🏼♀️.
