عمر :
فتحت باب السياره بتنزل لفت طالعت لي و رجعت قفلت باب السياره قربت مني ونزلت الشماغ عن وجهي وباستني في خدي وانا مصدوم قالت " ذي عشانك رجعتني ل اهلي " ابتسمت ورجعت رفعت الشماغ على وجهي وقلت " استودعتك الله " قالت " فمان الله " نزلت من السياره وهي تطالع لي ومشت رايحه عند باب بيتهم وقفت عند باب بيتهم و طالعت لي واشرت لي بيدها اني اروح .
جود :
طيحني على الارض طالع لي بخبث وقرب مني جلست احاول ارجع على ورا وانا طايحه على الارض قرب مني كثير ومسكت حجر بيدي وضربته على راسه بالحجر ، بعد عني لما ضربته ومسك راسه قمت وركضت رايحه ل الخيام وصلت عند الخيام ودخلت خيمة عمر ودانا ما لقيتهم خفت وطلعت ادورهم بالخيام شفت علي قرب من الخيام وهو ماسك راسه ويده كلها دم من الجرح اللي براسه ويصارخ " تعالي يا ملعونه " خفت ركضت وانا اطالع الارض واركض على طريق اثار السياره ركضت مسافه طويل لين طلعت على الشارع جلست اركض في امتداد الشارع تعبت وانا اركض وقفت بوسط الظلام وشفت سياره ماره من بعيد رفعت يدي واشرت ل السياره توقف لفيت شفت علي صامل يلحقني رفعت يدي وانا اصيح واشرت ل السياره وقفت السياره وفتح الرجال الدريشه قلت له وانا اصيح " تكفى ساعدني " قال لي " انتي انس ولا جن ؟ " قلت " والله اني انسانه تكفى ساعدني تكفى " لفيت وشفت علي يصارخ وهو يقرب ويقول " جود تعالي " قلت ل اللي بالسياره " هذا خاطفني ويبي يذبحني تكفى خذني معك " قال " اركبي الله يستر عليك " ركبت ورا وكان معه بالسياره زوجته وبنته تطمنت لما شفتهم معه و مشينا .
دانا :
انتظرت عمر يبعد عن البيت و طقيت الجرس فتحت امي الباب انصدمت لما شافتني وصارخت " دانا ! " رميت نفسي في حضنها وبكينا وحنا نحضن بعض طولنا وحنا حاضنين بعض عند الباب ونصيح قالت امي " امشي يا روح روحي امشي نكلم ابوك ونبشره انك رجعتي " قلت " ابوي وينه ؟ " قالت " ابوك بالشغل ينتظر اي خبر عنك ما يجي الا على اذان الفجر ينام لين الضحى ويصحى يروح الدوام " دخلنا البيت وانا متمسكه في امي وقفلنا الباب .
عمر :
بعدت السياره على اساس اني بروح وقفت السياره بعيد ومشيت رايح ل البيت مشي وقفت اطالع ل البيت من بعيد شفت باب البيت انفتح وشفت دانا تضم امها و طولوا بالحضن فرحت لما شفتها تحضن امها وبنفس الوقت حزنت اني ما بشوفها مره ثانيه قعدت اطالع لهم شوي و رجعت ل السياره لما شفتهم قفلوا الباب .
مصلح :
رجعنا البر ونزلنا من السياره شفنا علي جالس عند النار وماسك قطن ويحطه على راسه قال رشاش " علي شبلاك ؟ " قال علي " رشاش مدري وش اقول لك ياخوي " سفهته ورحت دخلت الخيمه ما لقيت احد فيها طلعت من الخيمه شفت رشاش ماسك علي من ثوبه ومعصب عليه ويقول " شلون قدروا عليك ! بنتين ما قدرت عليهم يا رخمه " جيت عندهم وقلت " شسالفه يا عيال ؟؟ " قال سلطان " جود دخلت على علي بالخيمه وقعدت تسوي له حركات وضربته على راسه بحجر ولما اغمى عليه انحاشت هي و دانا " قلت " حركات مثل وش ؟ " قال سلطان " تتلصق فيه ومن هالحركات " طالعت فيه وقلت " جود ما تسويها ! " لفيت على علي وضربته على وجهه وقلت " شسويت في جود عشان تضربك بالحجر ؟ هاه " قال علي " اقول لك البنت كانت تتلصق فيني ولما هاوشتها وطردتها من الخيمه ضربتني بالحجر على راسي ! " قلت " اكذب على غيري جود انا اعرفها عدل جود ما تسوي كذا " قال علي " من متى وانت تعرف جود عشان تقول اعرفها عدل ؟! " قلت " اسكت ولا كلمه مو مهم المده انا عرفتها عدل بمده قصيره و انا عارف انك ملعون بمده قصيره بعد " قال علي " انتبه ل الفاظك يا مصلح تدافع عن وحده تتلصق في العيا.." ضربته لما شفته يتكلم عن جود بهالطريقه وتنرفزت واستمريت اضربه والعيال يسحبوني عنه قال مهل " عمر وينه ؟ " نادى رشاش على عمر قلت " عمر مو بالخيمه " قال رشاش " اجل وينه ؟ " طالعنا في علي قال علي " انا اغمى علي وصحيت ما لقيت احد بالخيام . " قال رشاش " انا اليوم يا ذابح يا مذبوح " قال سلطان " اهدى يا رشاش يمكن عمر راح مكان ولا شي السياره الثانيه مو هنا " جلسنا حول النار ننتظر عمر .
