عمر :
قمت لحقت سلطان قبل لا يدخل خيمته ومسكته مع كتفه وقفته وقلت " طلعت منت كفو يا سلطان " قال " انجبرت اقول يا عمر " قلت " محد جبرك على شي كنت تقدر تسوي نفسك ما تدري وتسكت وتنسى الموضوع زي ما اتفقنا ! " قال " عمر انا ما اتفقت معك على شي انت قلت لي انسى الموضوع لكن انا ما اتفقت معك على شي " قلت " طيب انا قلت لك انسى الموضوع ولا تجيب طاريه ل احد ! " قال " عمر رشاش كان مصيره بيعرف سواء مني او من غيري " قلت " منت قد الثقه يا سلطان خيبت ظني " قال " دقيقه عمر ابي افهم شفيك مهتم لهالبنت بزياده ومعطيها اكبر من حجمها ؟ تدافع عنها وانت مالك فتره من عرفتها ، لا يكون بينكم شي ؟؟؟ " توترت لما فاجأني بسؤاله الشاطح وقلت " وش بيكون بيننا مثلًا ؟ ترى كل اللي اسويه عشانها كاسره خاطري " طالع فيني بنظره وحط يده على كتفي وقال " انا اقول ارجع دامك في اول الطريق يا عمر وتذكر انها بنت عزام تذكر انها بنت العقيد اللي مهمته يمسكنا و يقص روسنا " طالعت فيه وانا ساكت قال " انا بروح انام ورانا شغل بكرا وانت بعد نام يا عمر " دخل سلطان خيمته ينام .
مصلح :
دخلت الخيمه شفت جود منسدحه وتصيح جيت وانسدحت جنبها و وجهي مقابل وجهها وهي مغمضه عيونها ، شفت الدمعه تطيح من عيونها بس انقلبت ل الجهه الثانيه واعطتني ظهرها عرفت انها زعلت مني على عصبيتي معها انسدحت افكر كيف اراضيها قعدت في مكاني وجيت اطل عليها ابي اشوفها لسه تصيح ولا بس رفعت الفراش ودخلت داخله عشان ما اشوفها .
جود :
كنت معصبه منه وحسيت فيه يطل يبي يشوفني قايمه ولا نايمه ودخلت داخل الفراش عشان لا يشوفني و ينام بس حسيت فيه يرفع الفراش من وجهي و وخره عن وجهي فتحت عيوني جلست و قلت " خير ؟ " قال " الخير وجهك " قلت " شتبي ؟ " .
مصلح :
قلت " ابي.. " لما قالت لي شتبي كنت بقول ابيك انتي بس استوعبت كلامي وقلت " ابي اعرف ليه متضايقه ؟ " بس انها فشلتني وقالت " مو شغلك " وانسدحت وعطتني ظهرها وتغطت بالفراش عشان تنام .
عمر :
شفت الكل بخيامهم رحت جبت اكلي اللي ما كليته و مشيت رايح ل دانا ، رحت ل دانا وشفتها ترجف من البرد حطيت الاكل على جنب و جلست قدامها و طالعت فيها وهي ترجف فتحت يدها من الحبل واثار الحبل على يدها من قوة ربط رشاش لها مسكت اطراف يدها وكانت اطراف يدها بارده مره حطيت يدها بين يديني وجلست احاول ادفي يدها واطالع لها وهي تطالع لي و واضح عليها التعب ، دفيت يدها شوي بين يديني و شفت وجهها ذبلان مسكت وجهها بيدي الثنتين وقلت " دانا انتي بخير ؟ " قالت " مويه " فهمت انها تبي مويه وفتحت لها المويه وجلست اشربها وهي ماسكه يدي اللي ماسك فيها المويه وتشرب ، بعد ما شربت المويه عطيتها من الاكل وجلست اساعدها تاكل وهي لسه ترجف قطيت فروتي وغطيتها فيها و جلست جنبها ، عقب ما خلصت اكل سندت راسها على صدري من التعب طالعت فيها لقيتها مغمضه عيونها وبردانه حاوطتها بيدي وضميتها لصدري اكثر وجلست امسح على راسها واحاول ادفيها .
جود :
كنت منسدحه انتظر يعدي الوقت واضمن ان الكل ينام قمت شفت مصلح نايم خذيت مويه و طلعت من الخيمه رايحه ل دانا عشان اساعدها بس شفت عمر جالس و دانا نايمه بحضنه وهي لابسه فروته وهو يمسح على راسها ، تراجعت لما شفتهم بهالوضع ما بغيت اقاطعهم و رجعت ل الخيمه جلست في مكاني اطالع ل مصلح وهو نايم قهرني انه ما اهتم ل زعلي ونام بكل برود و انسدحت انام .
مصلح :
ما كنت نايم وكنت حاس في جود لما طلعت ورجعت ولما كانت تطالع لي كنت اسوي نفسي نايم وانا داري انها عينها علي فتحت عيوني و شفتها تنسدح وتتغطى وكملت تمثيلية نومي .
جود :
كنت احسبه نايم وما اهتم ل زعلي بس لاحظت انه قايم من عيونه الذكي يحسب اني بصدق انه نايم ويحسب مشت علي بس انا مشيتها عليه وسويت نفسي بنام ولما ضمنت انه صدّق اني بنام رفعت راسي وفتحت المويه و لفيت عليه وهو مغمض عيونه و قربت منه ابي انتقم منه على عصبيته معي وجيت اكب المويه عليه بس ...
____________________________________
شرايكم ؟ 🥶
