جود :
استوعبت اني بديت احب مصلح بديت احب شخصيته العصبيه والعناديه بديت احب هواشي معه ومحارشتي له ما كنت عارفه هل هذا صح او لا انا حبيت مجرم حبيت قاطع طرق وش بسوي في قلبي اللي حبه ؟ خذاني التفكير بس قاطعني مصلح لما قال " جود تعالي تدفي عند النار " رحت عند النار وجلست وانا بالي مو معهم هم يسولفون ويخططون وانا سرحانه افكر في شعوري تجاه مصلح .
دانا :
نام عمر وانا جالسه عند راسه جيت اقوم الا مسك يدي وقال " خليك جنبي " قعدت جنبه غمض عيونه و نام ، جلست افكر في اهلي وحياتي قبل اشتقت ل امي وابوي اشتقت ل شغلي وصديقاتي بالشغل وشلت هم رشاش يجي ياخذني بعد ما يتشافى عمر و يرجع يربطني بالعامود جلست متضايقه اطالع ل عمر وهو نايم .
مصلح :
جاء الليل و قرروا العيال يقطعون طريق من الطرق و جهزوا اسلحتهم و وضعهم جاني رشاش وقال " يلا يا مصلح مشينا ؟ " قلت " مين بيقعد مع البنات ؟ " قال " علي بيقعد هنا " قلت " خذوه معكم انا بقعد " قال " لا انت تعال معنا وهو يقعد هنا " شفت انه مصر اني اجي وان علي يقعد قلت " طيب " تجهزنا وركبنا السياره و رحنا .
عمر :
صحيت من النوم شفت دانا تصيح واول ما شافتني مسحت دموعها قلت لها " دانا شفيك " قالت " مافيني شي " قلت " الا شفتك تصيحين شفيك ؟ " قالت " كأني لو قلت بيتغير شي " قلت " قولي يمكن القى لك حل " قالت " تبي الصدق ؟ انا اشتقت ل اهلي يا عمر " طالعت فيها وعيونها امتلت دموع قالت " اشتقت ل امي وابوي اشتقت ل حياتي قبل اعرفكم " قعدت اطالع فيها ساكت قالت " شفت ؟ ما تغير شي لما قلت " حزنت عليها وجيت اقوم قالت " اقعد لا ترهق نفسك " قلت " بطلع اشم شوية هواء جتني ضيقه من الخيمه " لبست فنيلتي و ثوبي وطلعت وتركتها بالخيمه وانا افكر فيها ، جلست افكر في اني خربت حياتها بسببي خطفوها العيال و رشاش عرف انها بنت عزام يعني ما بيخليها تعيش بسلام فكرت في العذاب اللي بتعيشه لو بقت هنا اكثر فكرت في اللي سواه رشاش فيها واللي بيسويه لو بقت عندنا فكرت وتعمقت في التفكير وفي الاخير خذت قرار .
جود :
كنت اتمشى ورا الخيام الا لحقني علي وقال " هيه على وين رايحه ؟ " قلت في داخلي ( يا صبر !! ) لفيت عليه وقلت " شدخلك ؟؟ " قال " ارجعي خيمتك الحين " قلت " واذا ما رجعت ؟؟ " قال " بترجعين " قلت " ما برجع الا اذا بغيت ارجع " جلست امشي وهو صامل يلحقني لفيت عليه وقلت " خلني في حالي ياخي !! " سفهني واستمر يلحقني وانا استمريت اعاند وامشي ابعد عن الخيام .
دانا :
كنت جالسه في الخيمه متضايقه الا دخل علي عمر وقال " يلا دانا قومي " قلت " شفيك ؟ " قال " تجهزي يلا ما عندنا وقت " قلت " وش عمر شصاير ؟ " قال " مو تقولين اشتقتي ل اهلك ؟ " قلت " ايه " قال " يلا بوديك ل اهلك " انصدمت لما قال كذا و قلت " منجدك ؟؟؟؟ " قال " ايه " ركضت وحضنته من الفرحه وشد الحضن استوعبت اني حاضنته وبعدت عنه قال " يلا بسرعه قبل لا يجي احد " قلت " ليه هم وينهم ؟ " قال " مدري بس حاليًا محد فيهم موجود عشان كذا استعجلي قبل لا يجون " قلت " طيب " خذا عمر شماغه و طلعنا من الخيمه ورحنا ل السياره .
جود :
كنت احس في علي وهو يقرب مني وناشب لي تجاهلته وكملت مشي بعدنا عن الخيام كثير الا قرب علي مني ومسكني من خصري حطيت يدي على يده اللي حول خصري و بعدتها وقلت " وجع خير ! " قال " حنا في المكان المناسب " قلت " ابعد عني لا ادفنك هنا " قرب مني و قال " محد بيفكك مني هنا بهالظلام " دفيته وقلت " ما احتاج احد يفكني منك لأنك ما بتلمسني اصلًا " لفيت راجعه ل الخيام وانا معصبه بس مسكني بقوه مع يدي وسحبني لفيت و وخرت يده عني و رفسته وطاح على الارض ركضت بنحاش منه بس قام ولحقني سحبني وطيحني على الارض طالع لي بخبث وقرب مني .
عمر :
ركبنا السياره و مشينا ودانا تعلمني بيتهم وين مكانه وفي اي حي وحنا بالطريق فتحت دانا الدريشه وطلعت راسها من الدريشه مبسوطه كانت فرحتها تسوى كل شي طول هالمده اللي كانت فيها معنا ما قد شفتها فرحانه زي كذا طالعت لها وانا مبسوط لأني شايفها مبسوطه قلت " دانا ادخلي لا تمرضين من البرد " دخلت راسها و قالت وهي تضحك " معليك انا حريصه مو زيك " ضحكت عليها ودخلت راسها وقفلت الدريشه طالعت لي وقالت " شكرًا " قلت " على وش ؟ " قالت " على كل شي زين سويته لي " طالعت فيها قالت " ادري بسببي مرضت " قلت " مو بسببك " قالت " لو ما ساعدتني وما نمت عندي بالبرد كان ما مرضت " قلت " دانا كلها نزلة برد كم يوم و اصير بخير " ابتسمت وجلست تلهي نفسها في يدها ، وصلنا ل مكان قريب من الحي وقفت وتلثمت بالشماغ ودخلت الحي والدنيا ظلام قالت " عمر تقدر توقف هنا وانا بكمل مشي ل البيت " قلت " ابي اشوفك بعيوني وانتي داخله البيت " قعدت توصف لي مكان بيتهم وصلت قريب من بيتهم وقفت السياره وانا اشوف بيتهم قدام لفيت على دانا طالعت لي وعيونها تلمع وقالت " شكرًا عمر " قلت " سويت اللي علي " فتحت باب السياره بتنزل لفت طالعت لي و ...
____________________________________
شرايكم ؟ 🫂
تتوقعون دانا بتروح عند اهلها ولا بتغير رايها ؟
تتوقعون وش بيصير على جود ؟
مدلعتكم اليوم كتبت 3 👀
