دانا :
قال رشاش " اجل يلا مشينا يا عمر خلها هنا بتموت على ما يلقاها احد بهالمكان " قال عمر " روحوا السياره وانا جايكم " راحوا العيال السياره قرب مني عمر وقال " ان ما جيتي الحين والله لا اقول ل رشاش انك بنت عزام وما بيصير لك خير و رشاش بيبكي اهلك عليك " انصدمت منه وطالعت له وانا ماسكه دموعي وقلت " اكرهك " و دفيته و رحت ل السياره وركبت السياره وانا ماسكه دموعي و ركب عمر يسوق قال رشاش " شعندها غيرت رايها ؟ " سكتت و عمر جلس ساكت قال رشاش " اكلم نفسي ؟ " قال عمر " خافت تجلس لحالها هناك " ما قدرت امسك دموعي ونزلت دموعي وجلست امسح دموعي .
عمر :
قعدت اطالع من مراية السياره وكنت اشوف دانا تصيح وتمسح دموعها عورني قلبي عليها وكرهت نفسي بس كنت مجبور اقول لها كذا عشان تجي ما كنت ابيها تقعد لحالها بهالليل وهالمكان ويصير لها شي وهي عنيده راسها يابس ما كان عندي حل الا اني اقول لها هالكلام قعدت طول الطريق افكر في اللي سويته وغلطتي اني خليت دانا تكرهني من كلامي وكيف بصلح غلطتي قاطع تفكيري رشاش لما قال " عمر وقف هنا " وقفت السياره بوسط البر و نزلنا .
مصلح :
نزلنا من السياره وما كنا مستعدين ابدًا اننا نستقر في البر ، ما كان عندنا خيام ولا كان عندنا شي يساعدنا اننا نستقر في البر ناداني رشاش وقال " مصلح روح انت و سلطان ل اقرب محطه و جيبوا لنا خيام و جيبوا لنا شي ناكله " قلت له " ابشر " ركبنا انا و سلطان السياره و رحنا نجيب الاغراض .
جود :
كنا في وسط البر ولا عندنا شي راحوا مصلح و سلطان يجيبون خيام و اكل و جلسنا حنا في البر ننتظرهم جلست انا و دانا على الارض كانت دانا ضامه رجولها لصدرها و حاطه راسها على رجولها و تصيح ضميتها وقلت " دانا شفيك ؟ " رفعت دانا راسها وقالت " اقول لك بعدين " ما بغيت اضغط عليها و تركتها تصيح وانا اهديها .
عمر :
جلست مع العيال نسولف ونشوف وش جابوا بالشنط قال رشاش " الاغراض اللي معنا ما تكفينا " قال مهل " شنسوي طيب " قال رشاش " اذا رجعوا مصلح و سلطان نضبط الوضع هنا و نبدا الشغل العدل " قال قحص " اخاف يصير زي ذيك المره " قال رشاش " لا عمر تعلم درس من ذيك المره والحين لازم ننتبه لا نغلط زي ذيك الغلطه وينصاب احد فينا يا عمر " قلت " ياخوي ذيك المره انا شدراني انه كان معه سلاح " قال رشاش " توقع كل شي هالمره ما نبي اي غلط يكفي ذيك المره انصبت و من اصابتك جتنا البلاوي " قال قحص " اي والله من اصابتك ابتلشنا في دانا و جود وفوق ذا جابوا لنا المصايب و سعيد مات بسببهم " قال مهل " صح الشرطه شعرفهم في مكاننا يوم كنا في بيت سعيد ؟ " قال رشاش " صادق لازم نعرف كيف عرفوا مكاننا " يوم قالوا العيال كذا ربطت الاحداث في بعضها و فكرت في يوم اننا ما لقينا ام دانا وتوقعت ان دانا السبب في انهم عرفوا اننا في بيت سعيد ، قمت من عند العيال و رحت عند دانا و جود .
دانا :
جاء عمر عندنا وقال " دانا بكلمك شوي " قلت له " ولك عين جاي تكلمني ! " قال " بسألك عن شي بس " قلت له " ما عندي جواب ل اسألتك " كنت اصارخ عليه الا قالت لي جود " دانا قصري صوتك " قلت ل عمر " اذلف عني لا ارتكب فيك جريمه ! " ما حسيت بنفسي يوم قلت له كذا بس كنت مقهوره منه و ودي اضربه واطلع حرتي فيه بس مسكت نفسي بصعوبه كان عمر واقف يطالع و هو متضايق تكلمت جود وقالت له " عمر روح مو وقتك " راح عمر و جلست معصبه و علمت جود على اللي صار و ليه انا عاملته كذا .
مصلح :
جينا وجبنا الاغراض وقعدنا نضبط الخيام جت جود تساعدنا قلت " اقعدي لين نخلص وبناديك " قالت " ترى اعرف اضبط الخيمه روح انت اجلس وانا بناديك " قلت لها " يا بنت الناس انثبري مكانك خمس دقايق و اناديك " قالت " انت انثبر وانا بناديك " جننتي بعنادها وقلت " طيب اجل سويها لحالك وريني شطارتك " قالت بكل ثقه " طيب " تركتها تسويها لحالها و يوم خلصت وقفت بكل ثقه وقالت " ها شفت اني اعرف ؟ " قلت " ايه ايه شفت " دخلت الخيمه ودخلت هي وراي قلت " ماشاءالله عل.." ما امداني اكمل جملتي الا طاحت الخيمه علينا قعدت اضحك و جود تقول " مافي شي يضحك " طلعنا من الخيمه وقلت " لو اني من الاول مسويها مو اصرف ؟ " قالت " انت خربتها " ضحكت عليها لأنها لسه تعاند وقلت " ايه وانا بصلحها بس انتي اقعدي بعيد " رحت اضبط الخيمه وما تركت جود عنادها وجت تضبطها معي .
عمر :
كنت اضبط الخيمه مع سلطان وشفت دانا جالسه لحالها تركت الخيمه وقلت ل سلطان " ضبطها انت وانا شوي واجيك " قال سلطان " طيب " رحت عند دانا وجيت اجلس جنبها الا قامت قلت " دقيقه بكلمك شوي " لفت علي معصبه وقالت " ما عندي كلام معك ! " قلت لها " طيب اسمعيني شوي " قالت " مابي اسمع منك شي " قلت لها " خليني اتفاهم معك طيب ! " قالت " انت تتفاهم زي الناس ؟ انت بس اقعد وهددني انك بتعلمهم اني بنت عزام "
دانا :
طالع عمر وراي وهو خايف ...
____________________________________
شرايكم ؟ 💣
تتوقعون مين شاف عمر ورا دانا ؟
