دانا :
صحيت ما لقيت احد بالصاله الا انا والمصاب قمت ورفعت يدي على عيون المصاب ابي اتأكد هو نايم ولا صاحي طلع نايم وقفت ومشيت بشويش ورحت عند الباب حاولت افتحه بشويش طلع مقفل الا سمعت واحد يقول لي " لا تسوين نفسك ذكيه يا دكتوره " خفت ولفيت عليه وقلت له " انا ساعدت خويكم خلاص خلوني اروح وش تبون اكثر من كذا ؟ " ضحك علي وقال " صاحيه انتي ؟ تتوقعين رشاش بيتركك تروحين وانتي شفتي اشكالنا وعرفتي اسمه ! " قلت له " وعد ما بقول ل احد اني شفتكم ولا بجيب طاريكم بس افتح الباب وخلني اروح " طالع لي وهو يبتسم وقال " انا اقول تعالي اجلسي لا يشوفك رشاش وانتي تحاولين تهربين ترى والله يثور فيك بدون ما يفكر " رجعت جلست على الكنبه وجلس قدامي يشرب شاهي ويطالع لي قلت له " ابي اروح الحمام وينه ؟ " دلني على الحمام وقمت رحت الحمام غسلت وجهي ولفيت لقيت دريشه صغيره عاليه شوي حاولت اوصل لها ما قدرت طلعت من الحمام و رجعت الصاله جلست شوي معه وهو ساكت ويشرب قلت له " عادي اعرف اسمك ؟ " قال لي " اسمي سلطان وانتي وش اسمك ؟ " قلت له " دانا " قال لي " والنعم " قلت له " ما عليك زود " جلس يشرب الشاهي طالعت له وقلت له " طيب عادي اطلب منك طلب ؟ " حط الشاهي على الطاوله وقال لي " اطلبي " قلت له " احس اني جوعانه عادي تجيب لي شي اكله لو خبزه راضيه " ضحك وقال " طيب تبين شاهي معه ؟ " طالعت له وقلت له " ما بقول لا " راح المطبخ تأكدت انه بالمطبخ و مو حولي جالس يجهز لي اكل قمت و شلت كاسه من على الطاوله وحطيته على الارض و شلت الطاوله وخذتها معي ل الحمام وقفلت الباب و حطيت الطاوله وركبت فوقها و قدرت اوصل ل الدريشه حاولت افكها وكانت قويه بس قدرت افكها بس كانت الحدايد مصديه وقويه جلست احاول افك الحدايد الا سمعت صوته يناديني خفت وحاولت ادف الحدايد بقوه واضربها بيدي عشان تنفك الا سمعته يناديني كذا مره وتوترت وجلست احاول بكل مافيني من قوه اني افك الحدايد الا سمعته يدق باب الحمام و يقول " دانا انتي هنا ؟ " وقتها قدرت افك الحدايد بس انفضحت من صوت الحديد اول ما انفك .
____________________________________
شرايكم ؟ 🪟
تتوقعون بتنحاش ولا ؟🤷🏼♀️
