بعد مرور ٥ سنوات
دانا :
طلعت من السجن قبل سنه وتغير تعامل امي وابوي معي بسبب اللي صار ، طردوني من وظيفتي وصرت قاعده بالبيت بدون وظيفه صرت بهالسنه ادخل دورات احسن من نفسيتي اسوي اشياء تغير لي نفسيتي و صادفت جود في احدى دورات التصوير و زادت صداقتنا وصرنا ما نفارق بعض ونسجل مع بعض في كل شي ونغير من نفسيتنا .
جود :
بعد خمس سنوات بديت ارجع جود القديمه بديت ارجع احب الحياه من بعد ما كنت كارهه الحياه ومن بعد محاولاتي في الانتحار عرفت قيمة الحياه وطلعت من الاكتئاب اللي كنت فيه اول سنتين من بعد موت جدي والاشياء اللي صارت لي بذيك الفتره ، ضليت اخذ حبوب تهدأ اعصابي وتساعدني في الثلاث السنين الباقيه ولا زلت اخذ الحبوب وبين كل فتره اقطع الحبوب واحاول استمر بدونها بس الى الان مو قادره اهدي اعصابي بنفسي ولسه اكل الحبوب ، المهم صحيت اليوم بدري وكملت بعض الاشياء الناقصه في شنطتي وتجهزت وطلعت ركبت التاكسي و رحت ل بيت دانا وصلت عند باب بيتها ودقيت عليها .
دانا :
كنت جاهزه ومجهزه شنطتي بس كنت البس جزمتي وجود تدق علي رديت عليها وحطيت الجوال عند اذني وقعدت البس جزمتي قالت " الو دانا اخبارك ؟ " قلت " بخير وانتي كيف حالك ؟ " قالت " بخير الحمدلله يلا انزلي بسرعه لا نتأخر انا تحت " قلت " طيب جايه بس عطيني دقيقه " قالت " استعجلي " قلت " ابشري " قفلت من المكالمه و سحبت شنطتي و نزلت تحت عند امي وابوي ودعتهم وطلعت .
جود :
طلعت دانا من البيت وهي تسحب شنطتها نزل اللي يسوق التاكسي واخذ منها الشنطه عشان يحطها بالسياره ، نزلت من السياره وحضنت دانا وقلت " مرت اكثر من دقيقه " ضحكت وقالت " ياربي منك يا جود " ضحكنا وركبنا السياره وعطيته العنوان ، وصلنا لقينا فريق السياحه بالباص ينتظروننا نزلنا وركضت رايحه ل الباص قالت دانا وهي تسحب شنطتي معها " جود من الحماس نسيتي شنطتك " ضحكت ورجعت اخذ شنطتي وقلت " شوفي تأخرنا الكل وصل عشان كذا اركض " قالت " اهم شي لحقنا قبل يمشي الباص " قلت " امشي بس عسانا نلقى مكان نقعد فيه " ركبنا الباص وكان زحمه قعدت اطالع ادور لنا مكان شفت واحد جالس ورا اخر شي وجنبه كرسيين فاضين اشرت له بيدي وقلت " لو سمحت الاماكن اللي جنبك ل احد ولا ؟ " قال " لا تفضلي مو مكان احد " مسكت يد دانا وسحبتها معي ورحنا جلسنا جنبه لف علي وقال " ممكن نتعرف ؟ " قلت " اكيد " مد يده يبي يصافحني وقال " انا محمد " للحظه تذكرت لما مصلح كذب على الولد الصغير وقال له ان اسمه محمد سرحت في مكاني .
دانا :
شفت الرجال ماد يده وجود سرحانه ولا صافحته مديت يدي وصافحته وقلت " تشرفنا انا دانا وذي جود " قال " الشرف لي " ابتسمت ودفيت جود بيدي عشان تنتبه لاحظت جود انها سرحت وقالت " اسفه بس مو نايمه عدل وسرحت " قال " مو مشكله " قلت " من الحماس ل السفر اكيد ما نمتي " قالت جود " ايه مره متحمسه " قال محمد " نامي هنا على ما نوصل المطار " قالت جود " لا بنام اذا ركبنا الطياره عشان اضيع وقت هناك " قال " براحتك " طلعت جود الكاميرا وقالت " عادي اخذ لنا صوره ؟ " قال " اكيد " قلت " ما يحتاج تاخذين اذن مني " مشى المشرف يتأكد من عددنا عطته جود الكاميرا واخذ لنا صوره طالعت جود في الصوره قال محمد " ابي الصوره اذا ممكن " قالت جود " اكيد بس اصبر احولها على اللاب وارسلها لك " قال " طيب ممكن رقمك عشان نتواصل ؟ " طالعت فيه جود بنظره قال " عشان ترسلين الصوره يعني " قالت " اوه اوك " عطته جود رقمها وانا ماسكه الضحكه لفت علي جود وعطتني كوع في بطني وقالت " لا تضحكين " قلت " معليش بس استيعابك بطيئ يا جود " قالت بهمس " شسوي بعد حسبته يرقمني طلع المسكين عشان الصوره وانا مفهيه ما افهم " قلت " بغيتي تاكلينه بعيونك لما قال ممكن رقمك " ضحكت وقالت " اص لا يسمعنا تراه جنبنا " ضحكنا الا طلب مننا المشرف نستعد لأن قربنا نوصل ل المطار .
