دانا :
وفتحت الكرت شفت مكتوب ( اعتذر عن ما حصل امس وياليت تتواصل معي على ذا الرقم ********** - جوليا ) استغربت ورجعت الكرت مكانه ناديت عمر ولا رد فتحت باب غرفة نومه ولا لقيته شلت الكرت من البوكيه وطلعت من الغرفه .
جود :
خلصت فطور و نظفت المكان تجهزت ولبست احمر لأن مصلح يحب اللون الاحمر طلعت من الغرفه واحس بداية حياه جديده مع مصلح كنت مبسوطه واحس رجعت لي حياتي وقفت عند باب مكتب مصلح طقيت الباب قال مصلح " تفضلي " فتحت الباب و دخلت شفته جالس ومنشغل مو حولي قال " صباح الخير تأخرتي اليوم ! " قلت " على وش تأخرت ؟ " رفع عيونه وشافني قال " اوه حسبتك روزي " قلت " اذا مشغول اجيك بعدين باي " التفت ابي اطلع قام ومسك يدي سحبني وقال " مو مشغول تعالي " قلت " مابي الهيك عن شغلك " قال " خلصت شغلي تعالي " سحبني ل عند مكتبه جلس على كرسيه يجمع اغراضه ويرتب المكتب جلست مقابله وبيننا المكتب قال " احسك بعيده عني " مشى بالكرسي وجاء جنبي طالعت فيه قال " اوهه لابسه احمر " غمز لي ضحكت وقلت " ان كان حبيبك ثور البس له احمر " قال " يعني انا حبيبك " قلت " يعني انت ثور " ضحك وقال " احس اني مو مصدق انك قدامي ومسامحتني " ابتسمت ونزلت راسي رفع راسي و قال " اوعدك ما بخليك لأخر يوم بعمري وما بعيد الغلطه " قلت " مصلح خلنا ننسى اللي راح ونبدا حياه جديده انسى الماضي وشوف الحاضر " قال " مو شايله بقلبك شي ؟ القلوب صافيه ؟ " قلت " القلوب صافيه " ابتسم قرب مني وحط يده على خدي بدا يقرب اكثر مني وقلبي يدق بسرعه من كثر قربه صرت احس بأنفاسه غمضت عيوني الا دخلت روزي قالت " اوهه شكلي جيت بوقت غلط " بعدت عن مصلح قالت روزي " اسفه عالمقاطعه بس ورانا شغل يا مصلح " طالعت في مصلح بتوتر وقلت " اجل بتركك تكمل شغلك وبعدين اجيك " قال " لا شدعوه لاحقين عالشغل روزي تقدرين تطلعين تغيرين جو وبالليل نشتغل " قالت روزي " مصلح ياليت نخلص الشغل بدري الليل انا ماني فاضيه ! " قمت وقلت " كمل شغلك يا مصلح " قال مصلح " كيف اكمل شغلي وانتي بتروحين ؟ " رفعت حواجبي وقلت " اقصد شغلك مع روزي ! " ضحك وقال " تمام اجل شغلك معي بالليل " قمطت وطلعت من الغرفه .
روزي :
جلست وانا من داخلي احترق من المنظر اللي شفته مسكت اللاب توب وبديت اشتغل جتني رساله مسكت جوالي وشفت جوليا راسله " روزي شرايك بملابسي ؟ حلوه ؟ " كتبت لها " اوهه شعندك كاشخه ؟ في شي ما اعرفه ؟ " ردت وقالت " بطلع افطر مع عمر واحترت ما عرفت وش البس " قلت " دام الموضوع فيه عمر البسي شي ثاني " قالت " ليه يعني مو حلو لبسي ؟ " قلت " الا بس هذا اللبس تلبسينه وانتي رايحه تزورين جدتك مو مع واحد مثل عمر ! " قالت " طيب وش البس علميني يا فاهمه " قلت " البسي شي ثاني غير ذا " قالت " مثل وش ؟ شرايك تجين تنسقين لي لبس " قلت " ما تقدرين تسوين شي بدوني ! " قالت " يلا روزي عمر ارسل لي انه طلع وجاي المطعم وانا لسه بالبيت ! " قلت " اف طيب الحين جايتك " قفلت اللاب توب ولميت اغراضي قمت من مكاني قال مصلح " روزي ؟ شفيك " توهقت وقلت " صديقتي مسويه حادث وتحتاج مساعده بروح لها ساعه وارجع " قال " اوهه سلامتها طمنيني عليها " قلت " تمام " طلعت من الغرفه ورحت ل سيارتي .
