محمد :
استغربت لما شفت المكان فاضي و جود مو موجودة فيه بديت ادورها يمين يسار ما لقيتها قعدت اصرخ اناديها ولا سمعت لها صوت خفت واتصلت عليها بس طلع جوالها مغلق قعدت ادورها حول الساعه ولا لها اثر اختفت البنت كأن الارض انشقت وبلعتها توترت وجلست انتظر بنفس المكان اللي كنا جالسين فيه اول ما جينا .
جود :
كنت جالسه طفشانه قمت اطالع الشجر مشيت ودخلت بين الشجر قعدت اصور شفت الشجر منحوت عليها اسماء ناس وعبارات قعدت اقرا اللي مكتوب وامشي دورت شجره مو مكتوب عليها واخيرًا لقيت كتبت عليها كلام و صورتها لفيت ابي ارجع بس استوعبت اني ضعت فتحت جوالي عشان اشوف الموقع وارجع بس خلص شحني وطفى جوالي توهقت و قعدت امشي ادور طريق ارجع منه بس بلحظه استوعبت اني مو عارفه من وين اروح امشي من طريق مدري هو اللي بيطلعني من هالغابه ولا هو يوديني ل نص الغابه بديت اخاف لأن محد حولي قعدت اصارخ واطلب المساعده بس مافي اي استجابه من اي شخص .
دانا :
طلعت البيتزا من الفرن وجلسنا بالصاله ناكل و نسولف طالع عمر فيني وقال " ها كيف البيتزا ؟ " قلت " مو مثل ما توقعتها " قال " اكيد احلى من اللي توقعتيها " قلت " بمليون مره " قال " قلت لك بتذوقين الذ بيتزا بحياتك " قلت " ما صارت حلوه الا لأننا سويناها مع بعض " قال " ايه تعبتي نفسك انتي عاد لما سويناها " قلت " اي والله تعبت وحنا نسويها " طالع فيني رفع حواجبه وقال " تراك قطعتي الخضروات بس ما سويتي شي " شهقت وقلت " حرام عليك ! مين حط الصلصه على البيتزا ؟ " قال " ايه وحطيتي الصلصه بس " قلت " اسكت بس انت سويت العجينه وتحسب انك مشتغل اكثر مني " قال " ترى العجينه شغلها صعب مو اي احد يضبطها " قلت " الله يسلم النت اطلع طريقة عجينه واسويها وتضبط بعد " ضحك علي وقال " امزح معك لا تعصبين " قلت " ما عصبت بس قاعده الهيك عشان اخلصها عليك " طالع لي بنظره قعدت اضحك عليه الا رن جوالي مكالمه فيديو من امي التفت على عمر وانا خايفه قلت " اسكت لا تطلع صوت " رديت على امي وانا متوتره قالت امي " اهلين دانا كيف حالك " قلت " بخير وانتي كيف حالك " قالت " بخير " قلت " غريبه متصله علي فيديو " قالت " اشتقت لك وقلت اشوفك " التفت شفت عمر ياكل ويأشر لي انه بياكلها كلها عطيته نظره ورجعت اطالع ل الجوال قلت " حتى انا اشتقت لك واشتقت ل ابوي " قالت " وين مشتاقه لنا من سافرتي ما تدقين بس تتواصلين معنا بالرسايل ومو كل يوم " قلت " كله اكون طالعه ومو حول الجوال " قام عمر يبي يروح يغسل وطيح كاس العصير وانكسر توهقت لما امي سألتني عن الصوت وقالت " وش ذا الصوت دانا في احد عندك ؟ " قلت " هاه ايه الظاهر جود كسرت شي بروح اشوفها وبعدين نتواصل يلا باي احبك " قفلت من المكالمه ولفيت على عمر قلت وانا معصبه " كنت بتفضحني عند امي " قال " عادي ما تقدر تسوي شي دامها مو عندنا " قلت " بس مابي اكسر ثقتها فيني واصدمها اني معك وبعدين انت نسيت ان ابوي كان يبي يمسكك قبل خمس سنين ؟ ".
عمر :
طالعت في دانا بعد ما قالت وبعدين انت نسيت ان ابوي كان يبي يمسكك قبل خمس سنين وقلت " ما نسيت ولا بنسى بس وش الحل يا دانا لين متى بنخبي علاقتنا عنهم ؟ ترى لازم يعرفون " قالت " حالي من حالك مو عارفه متى بصارحهم بالموضوع والصراحه خايفه من ردة فعلهم لأنهم مستحيل يقبلون فيك وانا مدري ارضيهم ولا ارضيك " قلت " ارضي نفسك " طالعت فيني وهي ساكته ، تنهدت وقعدت اجمع القزاز اللي على الارض جت دانا تبي تساعدني قلت " خليه لا يجرحك " قالت " اجل انت بعد خله لا يجرحك " قلت " ما بيجرحني انتي اتركيه و روحي سوي شعرك " قالت " خله بجيب مكنسه وننظفه " قلت " خلاص بشيله بي.." انجرحت وانا بنص جملتي طالعت دانا فيني عصبت وقالت " شفت قلت لك خله لا يجرحك بس انت تحب العناد ! " ابتسمت وقلت " ما اعاند بس انتي تسولفين ولهيت وانجرحت " قالت " حطيتها براسي بعد ! اهجد بس اقعد ثواني وجايه " قعدت على الكنب وجت تضمد الجرح وانا اطالع لها وهي تلف يدي واتأمل ملامحها وهي مو حولي و مندمجه تضمد الجرح خلصت ورفعت عيونها طالعت لي وانا مفهي قالت " خلصنا " قلت " وش " قالت " ضمدت الجرح ! " سكتت وطالعت فيها قامت من مكانها وقالت " بسوي شعري واجيك " قلت " طيب " راحت دانا تسوي شعرها وانا جالس اطقطق بجوالي ، رن جوال دانا قعدت انادي دانا قالت " هلا " قلت " في احد يتصل عليك " قالت " شوف مين " طالعت في الرقم وقلت " رقم غريب " قالت " رد شوف مين " رديت على الرقم قال " الو دانا " سمعت صوته كأنه فهد قفلت في وجهه و عطيت الرقم بلوك وكملت اطقطق في جوالي .
