ဇာမ်ပြန်သွားကတည်းက နှောင်းထိုင်ငိုနေမိသည်။စိတ်မကောင်းဖြစ်တာထက် ခံပြင်းမိသည်။
တစ်ဖက်က ထင်ရာမြင်ရာ စွပ်စွဲပြီး သူစိတ်ကြိုက်ဖျက်စီးသွားတဲ့အချိန်မှာ နှောင်းကတော့ဘာမှပြန်မလုပ်နိုင်ခဲ့။အထင်လွှဲတာကိုလည်း မဖြေရှင်းနိုင်ခဲ့သည်ကို ပို၍ပင်စိတ်တိုမိသည်။ဒေါသအရမ်းထွက်နေချိန်မို့ နောက်မှအေးအေးဆေးဆေးဖြေရှင်းမည်ဆိုသော အသိစိတ်နဲ့သာ ငြိမ်နေလိုက်သည်။သို့သော် နှောင်းပါးစပ်မှ မထင်မှတ်ပဲ လမ်းခွဲစကားထွက်သွားမိသည်။ဤသည်ကား ဇာမ်မင်းဆက်၏ လုပ်ရပ်နဲ့ အပြောတွေကြောင့်သာ ဖြစ်သည်။နောက်ဆုံးတော့ သူတစ်ယောက်တည်းကျန်ခဲ့ရပါသည်မဟုတ်လား။ဒီလိုနဲ့ပဲ သူတို့ဇာတ်လမ်းလေးက လှခြင်းမလှ ပြီးဆုံးခဲ့ရပါသည်....
🚨🚑🚨🚓
ငိုရင်းနဲ့အိပ်ပျော်သွားတာ ဆေးရုံကားနဲ့ ရဲကားသံတွေကြားမှ သူနိုးလာခဲ့၏။နာရီကိုလှမ်းကြည့်တော့ ည၇နာရီထိုးနေပြီ။ဘေးကစားပွဲပေါ်မှာတင်ထားခဲ့တဲ့ ဆေးတွေကိုလဲ သူမသောက်မိ။
ရုတ်တရက် ဖုန်းမှလည်း ထမြည်လာခဲ့သည်။နာမည်ကိုကြည့်လိုက်တော့ နန်းဖြစ်တာကြောင့် သူမကိုင်မိ။သူနေမကောင်းဖြစ်သည်ကို စိတ်ပူ၍လှမ်းမေးခြင်းသာဖြစ်မည်ဟုလည်းတွေးလိုက်မိသည်။နောက်ပြီး အခုချိန်မှာ နန်းနဲ့ဘယ်လိုမှစကားပြောရန်အဆင်မပြေ၊သူကိုယ်တိုင်ကလည်း မပြောချင်တာဆို ပိုမှန်လိမ့်မည်။တွေးရင်း ဇာမ်မင်းဆက်အကြောင်းပါလာတော့ ပါးပြင်ပေါ်သို့ မျက်ရည်စများ ခုန်ပေါက်လှိမ့်ဆင်းလာခဲ့၏။မျက်နှာပေါ်ရှိ မျက်ရည်တွေကို လက်ဖြင့် သုတ်လိုက်ပြီး အခန်းထဲမှ ထထွက်လာခဲ့၏။
အခန်းပြင်ရောက်တော့ ရှုပ်ပွနေသည့် ဧည့်ခန်းထဲတွင် လဲလျောင်းနေသော ထိုင်ခုံများသာရှိတော့၏။ဇာမ်မင်းဆက် ပစ်ပေါက်ခဲ့သည့် ပန်းအိုးများနဲ့ ပုလင်းကွဲစများဟာ ပျောက်ခြင်းမလှပျောက်နေ၏။
နောက်ပြီး သူတက်နင်းခဲ့မိသည့် ပုလင်းကွဲများလည်းမရှိတော့၊ကြမ်းပြင်ပေါ်ရှိ သွေးများလည်းသန့်ရှင်းလျှက်။ဇာမ်မင်းဆက်ရှင်းသွားရုံမှ တစ်ပါး အခြားသောအရာမရှိ။လဲကျနေတဲ့ခုံများကို မထူထားပဲ ပုလင်းကွဲ အစများကိုသာ သန့်ရှင်းထားသည်က သူနောက်ထပ်တစ်ကြိမ် တက်နင်းမိမှာဆိုးသောကြောင့်ဆိုတာ သိသာလှ၏။ထိုအရာတွေထက် အရေးကြီးသည်က အဆက်မပြတ်ကြားနေရသည့် ဆေးရုံကားသံများနဲ့ ရဲကားသံများပင်ဖြစ်သည်။သူတံခါးနားရောက်တော့ ကြမ်းပြင်ပေါ်မှာ ပြုတ်ကျနေသည့် ကိတ်မုန့်တစ်လုံးကိုတွေ့ရ၏။နှောင်းလဲ ထိုင်ကာ ကိတ်မုန့်ကိုငုံကြည့်လိုက်တော့ ကိတ်မုန့် မျက်နှာပြင်ထက်တွင် "Happy 2 monthsary hnaung" ဆိုသည့် စာသားနဲ့အတူ ဆရာ၀န်အရုပ်လေး၂ရုပ်ကိုတွေ့ရ၏။သူ့အရုပ်ကိုကျ အရပ်ရှည်ရှည်ဆွဲထားပြီး လက်ထဲမှာ အရက်ပုလင်းကိုင်ထား၏။နှောင်းစစ်ကိုကျ သေချာအရပ်ပုထားပြီး လက်ထဲမှာ အရုပ်ပိုက်ထား၏။မသိရင်သူကပဲ အကြီးလိုလိုနဲ့ ဇာမ်မင်းဆက်ကတော့သေတော့မည်။တူညီသည်က နှစ်ယောက်စလုံး ဂျူတီကုတ်၀တ်ထားခြင်းဖြစ်သည်။ကိတ်မုန့်ကို ကြည့်ရင်း နှောင်းမျက်ရည်တွေ အတိုင်းအစမရှိ စီးကျလာခဲ့၏။
သူမှားသွားပြီ သူမှားသွားခဲ့ပြီဆိုသောအသိကလည်း ခေါင်းထဲမှာအပြည့်။အနည်းဆုံးတော့ သူဇာမ်မင်းဆက်ကို နားလည်အောင်ရှင်းပြလိုက်သင့်ပါသည်မဟုတ်လား....
KAMU SEDANG MEMBACA
မောင့်နှောင်းငယ် (Complete)
Romansaမောင့် အချစ်က ဘယ်က စတင်မှန်းမသိ ကိုကို့ရဲ့ ဂျုတီကုတ်အဖြူလေးနဲ့ လိုက်ဖက်လွန်းတဲ့ အသားဖွေးဖွေးလေးကိုလား ဆေးထိုးအပ်ကိုင်တဲ့ လက်လှလှလေးတွေကိုပဲ စွဲလမ်းမိသွားတာလား လူနာတွေကို ဂရုတစိုက် ကြည့်ရှုပေးတတ်တဲ့ မျက်ဝန်းလှလှလေးတွေလား ကျွန်တော့်အချစ်က အစမရှိ အဆုံး...
