ပန်းဘွဲ့အလင်္ကါ (Completed )

25🌼U&Z

အခန်းထဲရှိ နံရံပေါ်မှ နာရီလက်တံတို့ကို ကြည့်ရင်း လူက ဂနာမငြိမ်။ မနက်ပိုင်းအတန်းချိန်ကိုမြန်မြန်ပင် ပြီးဆုံးစေချင်နေခဲ့သည်။ ဆရာကလည်း ယနေ့မှပင် အချိန်ဆွဲကာ သင်နေသည်ဟုပင် ခံစားမိလာပြန်သည်။ Roll callခေါ်ပြီး ဆရာ အခန်းထဲက ထွက်သည်နှင့် ကျောပိုးအိတ်ကို ဆွဲယူကာ အမြန်ပြေးထွက်ခဲ့တော့သည်။ ဆိုင်ကယ်ကို မြန်မြန်မောင်းရင်း လက်က နာရီကို ကြည့်မိသည်မှာ ခဏခဏ ။ အချိန်မှီလောက်ပါရဲ့ ။

မန္တလေးတက္ကသိုလ်ဝင်းထဲရောက်တော့ အရှိန်လျှော့ကာ မောင်းရင်း  ဆိုင်ကယ်ရပ်နားရမည့်နေရာကိုရှာလိုက်သည်။ ပြီးတော့  ပြိုင်ပွဲကျင်းပနေဆဲဖြစ်သည့် ခန်းမဆီကို  ခပ်သွက်သွက်လျှောက်ကာ အနောက်ဘက် ဝင်ပေါက်မှ ဝင်ကာ ကြည့်မိတော့   ဆပ်ကို  တစ်ခါတည်း လှမ်းတွေ့လိုက်ရသည်။

ခုံပေါ်မှာ တစ်ယောက်တည်းထိုင်နေကာ  လက်နှစ်ဖက်က အချင်းချင်းယှက်သွယ်ထားသည်။ ​ရှေ့တည့်တည့်ရှိ စင်ပေါ်မှ အလှည့်ကျယှဥ်ပြိုင်နေသူကို  မျက်တောင်မခတ်တမ်း ငေးကြည့်နေသည်။ ဘေးနားတွင် ဝင်ထိုင်ရင်း လေသံတိုးတိုးနဲ့ ခေါ်လိုက်တော့  လှည့်ကြည့်လာသည်။

" ဆပ်   "

" ရောက်လာပြီလား  ငါက မင်း မလာတော့ဘူး ထင်နေတာ "

"  အတန်းဆင်းတာ နောက်ကျနေလို့ပါ မင်းအလှည့်ကရော  "

" နောက်တစ်ယောက်ပြီးရင်  "

တင်းတင်းကြပ်ကြပ် ယှက်နွယ်ထားသည့် ဆပ်ရဲ့လက်တွေကို  အုပ်ကိုင်မိတော့ အေးစက်လွန်းသည့် အထိတွေ့ကို ခံစားလိုက်ရသည်။ လက်နှစ်ဖက်ကို ဆွဲယူကာ  သူ့လက်ဖဝါးတွေဖြင့် အစားထိုး ယှက်နွယ်လိုက်ရင်း

" လက်တွေ အေးစက်နေတာပဲ ဆပ်ရာ  အရမ်း anxiety ( စိတ်လှုပ်ရှားခြင်း) တက်နေတာလား     "

" အင်း  ငါ  ငါ  ကြောက်နေတာ   "

" မင်း လုပ်နိုင်သလောက်ပဲ လုပ်ခဲ့ပါလို့ ပြောထားတယ်လေ   စိတ်ကိုလျှော့ထား  အဆင်ပြေသွားမှာ  "

အလှည့်ကျနာမည်ခေါ်လိုက်တော့   စင်ရှိရာဘက်ထွက်သွားသည့်  ကျောပြင်ငယ်ကို ကြည့်ရင်း  ရင်တမမ ။ ဆပ် ကိုသာ နှစ်သိမ့်ပေးနေခဲ့ပေမယ့် သူကိုယ်တိုင်ကလည်း စိတ်လှုပ်ရှားနေခဲ့သည်။ ဆပ် က သည်လို ပွဲတွေ စင်မြင့်တွေနဲ့ တစ်ခါမှ မထိတွေ့ခဲ့ဖူးဘူး။