ជួបស្នេហ៍ក្នុងប្រតិបត្តិការ(រដូវកាលទី១)(ចប់)

ភាគ១៣

ដូចដែលជីមីនបាននិយាយ ឈានចូលដល់ពេលរសៀល នាយកំលោះក៏បានបើកឡានត្រឡប់មកមន្ទីរពេទ្យវិញ ។ នៅតាមផ្លូវ គេក៏បានឈៀងចូលទិញរបស់ញ៉ាំខ្លះមកឲ្យខេតដែរ ព្រោះយល់ថា ខេតប្រហែលមិនទាន់បានញ៉ាំអីដោយសាររវល់ពេក ។

/ក្រាក/

ទ្វារបន្ទប់ធ្វើការរបស់ខេត ត្រូវបើកឡើងដោយដៃជីមីន ស្នាមញញឹមស្រស់សង្ហារក៏ត្រូវរលុបបាត់ភ្លាមៗ ក្រោយឃើញក្នុងបន្ទប់ មិនមែនមានតែខេតម្នាក់ ប៉ុន្តែក៏មានវត្តមានរបស់មនុស្សដែលគេស្អប់នៅដែរ ។

"ជីមីន!..."ខេតហៅឈ្មោះនាយកំលោះស្រាលៗ មុននឹងងើបចេញពីតុធ្វើការ ដើរទៅរកគេ ចំណែកអ្នកម្ខាងទៀតក៏ងើបចេញពីកៅអី បែរខ្លួនមកខាងក្រោយទាំងមានស្នាមញញឹមជាប់ ប៉ុន្តែវាជាស្នាមញញឹមបែបឌឺដង ។

"ជួបគ្នាទៀតហើយ លោកអនុសេនីយ៍!..."អាល់ដូញាក់ភ្នែកញោចញញឹមដាក់ជីមីន ប៉ុន្តែក៏ទទួលបានមកវិញត្រឹមទឹកមុខមាំរបស់ជីមីន ។

"មិនស្មានថា លោកអនុសេនីយ៍មានទឹកចិត្តដល់ថ្នាក់ទិញអាហារមកឲ្យអនាគតភរិយាខ្ញុំញ៉ាំសោះ ខ្ញុំនេះពិតជារំភើបជំនួសខេតណាស់"អាល់ដូកាន់តែនិយាយ កាន់តែធ្វើឲ្យភ្លើងកំហឹងរបស់ជីមីនឆាបឆេះឡើងលើសកម្រិត ដៃមាំក្ដាប់យ៉ាងណែន ស្របនឹងកែវភ្នែកកំពុងសម្លក់អាល់ដូមិនដកភ្នែក ។

"បិទមាត់ឯងភ្លាមទៅ"ជីមីនចូលទៅចាប់ក្របួចកអាវអាល់ដូឡើងជាមួយភាពខឹងច្រឡោត បើអាចចាត់ការអាម្នាក់នេះនៅត្រង់នេះបាន គេនឹងបាញ់បំបែកក្បាលវាចោលតែម្ដង មិនទុកយូរទេ ប៉ុន្តែគេមិនអាចធ្វើបាន ។

"ឯងធ្វើអីយើងមិនកើតទេ ជីមីន ម៉ាន់ដ្រូ"ពេលឃើញជីមីនខឹងខ្លាំងប៉ុណ្ណា គេក៏កាន់តែសមចិត្ត អ្នកដែលមានសន្លឹកបៀធំអាចឈ្នះ គឺមានតែគេម្នាក់ប៉ុណ្ណោះ ហើយអ្នកឈ្នះប្រាកដជាទទួលបាននូវអ្វីដែលល្អ ដូចជាការយកបានមនុស្សស្រីឥតខ្ចោះដូចខេត មិនអញ្ចឹងហ្ហេស?

"ក៏សាកទៅ ថាយើងធ្វើអីឯងមិនបាន ផាច់!..."ជីមីនមិនបាននិយាយតែមាត់ គេដកដៃម្ខាង ដាល់ទៅថ្ពាល់ខាងឆ្វេងរបស់អាល់ដូមួយទំហឹង រហូតដល់អ្នកខាងនោះទប់ជំហរលែងបាន ក៏ដួលព្រូសក្បែរនោះ ។