ជួបស្នេហ៍ក្នុងប្រតិបត្តិការ(រដូវកាលទី១)(ចប់)

ភាគ៣៧

រដ្ឋកាលីហ្វ័រញ៉ា. សហរដ្ឋអាមេរិក

តឹប...តឹប..
សម្លេងនៃសន្ធឹកជើង កំពុងដើរឡើងកាំជណ្ដើរមួយដំណាក់ៗ លាន់ប៉ះទង្គិចនឹងឥដ្ឋការ៉ូក្នុងវិមានធំស្គឹមស្កៃមួយកន្លែងដែលនៅជាយក្រុង ។ ដំណើរឡើងឈានមួយជំហ៊ានៗរបស់បុរសវ័យកណ្ដាលបានឆ្កោះទៅកាន់បន្ទប់មួយនៅជាន់ខាងលើនោះ និងមានកូនចៅជំនិតម្នាក់ដើរតាមក្រោយមកជាមួយដែរ ។

"បើកទ្វារទៅ"សម្លេងធំគ្រលបន្លឺឡើងបញ្ជាទៅកូនចៅឲ្យបើកទ្វារបន្ទប់នោះ វិនាទីបន្ទាប់ ទ្វារក៏បានបើកឡើងដោយស្នាដៃមនុស្សជំនិតរបស់បុរសម្នាក់នោះ បើកបង្ហាញឲ្យឃើញដល់សភាពក្នុងបន្ទប់នោះយ៉ាងច្បាស់ ។ បុរសម្នាក់នោះ ងាកបញ្ជាមើលមុខកូនចៅខ្លួនបន្ដិច គេយល់ន័យដែលចៅហ្វាយចង់បាន គេក៏ប្រញាប់អោនគំនាបចៅហ្វាយជាមុន មុននឹងចាកចេញពីទីនោះទៅ ។ ក្រោយមក បុរសម្នាក់នោះក៏ដើរទៅរកស្ដី្រម្នាក់ ទៀត ដែលមានវត្តមាននៅក្នុងបន្ទប់នោះ កំពុងអង្គុយធ្មឹងមួយកន្លែងបែរខ្នងសម្លឹងទៅមាត់បង្អួច ។

"ខ្ញុំចង់ត្រឡប់ទៅផ្ទះខ្ញុំវិញ"បើទោះបីជាគាត់មិនងាកមកក្រោយក៏ពិតមែន ប៉ុន្តែគាត់ក៏អាចស្ដាប់ឮពីសន្ធឹកជើងដែលកំពុងដើរចូលមកដូចគ្នា ហើយអ្នកដែលចូលមកបាន ក៏មានគេម្នាក់ប៉ុណ្ណោះ មនុស្សដែលនាំគាត់មកដល់ទីនេះ ។

"បងមិនឲ្យអូនទៅរស់នៅទីនោះវិញទេ អូនត្រូវនៅទីនេះជាមួយបង រង់ចាំឲ្យកូនយើងត្រឡប់មកវិញ បងនឹងនាំនាងមករស់នៅទីនេះជាមួយគ្នា"គ្រាន់តែបានស្ដាប់ឮនៅអ្វីដែលបុរសម្នាក់នោះនិយាយហើយ ស្រ្ដីដែលអង្គុយស្ងៀមស្ងាត់មុននោះក៏ក្រោកខ្លួនឡើង ហើយដើរសម្ដៅមកឈរប្រឈមមុខនឹងបុរសម្នាក់នោះទាំងមុខក្រហមរងៀល ។

"លោកគ្មានសិទ្ធិបង្ហាញខ្លួនឲ្យកូនឃើញនោះទេ លោកអាល់ដ្រូ..."អាល់ដ្រូ? ត្រឹមតែឮសព្វនាមមួយនេះក៏អាចដឹងបានហើយបុរសម្នាក់នេះជានរណា ។ 

"ហេតុអ្វី? បងជាប៉ា...បងមានសិទ្ធិនឹងជួបមុខកូន អូនមិនអាចហាមឃាត់បងបានឡើយ ខេលលី"លោកអាល់ដ្រូរៀងតម្លើងសម្លេងដាក់ភរិយាបន្ដិច ត្បិតគាត់មានចិត្តខឹងសម្បារចំពោះលោកស្រីខេលលី ដែលព្យាយាមឃាត់ឃាំង មិនចង់ឲ្យគាត់បានជួបមុខគ្នាជាមួយកូន មិនថាពីមុនឬមកដល់ឥឡូវ ។