ជួបស្នេហ៍ក្នុងប្រតិបត្តិការ(រដូវកាលទី១)(ចប់)

ភាគ២៣

គ្រាន់តែឬសម្លេងសុំជំនួយ វីនីយ៉ាដែលដើរចេញទៅមិនទាន់ឆ្ងាយប៉ុន្មាន ក៏រត់បកមកក្រោយវិញ ទើបឃើញខេតកំពុងខ្វៃដៃខ្វៃជើង ស្រែកសុំជំនួយពីគ្រប់គ្នា មិនចាំយូរ នាងក៏ប្រញាប់លោតចុះទៅក្នុងទឹក រួចហែលទៅតាមខេតដែលកំពុងអណ្ដែតទៅតាមលំហូរទឹកនោះ ចំណែកឯខេត នាងក៏ព្យាយាមបម្រាស់ដៃវាយទឹកដែលហូរនាំរាងកាយនាងចេញទៅខ្លាំងៗ ខណៈខ្លួនរបស់នាង លឹបចុះលឹបឡើងនៅក្នុងទឹក រហូតនាងមិនអាចគ្រប់គ្រងស្ថានការណ៍បាន ម្យ៉ាងទៀត ដោយសារតែជើងរបស់នាងនៅឈឺ ព្រោះបណ្ដាលមកពីទាក់ឫសឈើនោះផង ទើបធ្វើឲ្យនាងធាក់ទឹកមិនបាន និងមិនអាចហែលដោយខ្លួនឯងបាន ។

"ខេត!..."ជីមីនដែលមកដល់ក្រោយឯណោះ ស្លន់ស្លោមិនស្ទើរ ពេលឃើញមនុស្សស្រីជាទីស្រឡាញ់ស្ថិតក្នុងស្ថានភាពគ្រោះថ្នាក់ និងឃើញវីនីយ៉ាកំពុងហែលទៅតាមខេតដែរ មិនបង្អង់យូរ គេក៏ប្រញាប់ទាក់ទងទៅថេយ៉ុង ដើម្បីនាំអ្នកផ្សេងទៀតឲ្យមកជួយបន្ថែម ខណៈគេក៏កំពុងរត់ទៅតាមផ្លូវទឹកខាងមុខឲ្យបានមុន ងាយស្រួលចុះទៅជួយពួកនាងទាន់ពេល ។

"វី...ខឹក! ជួយខ្ញុំផង..."ខណៈពេលនេះ នាងមើលអ្វីក៏មិនច្បាស់ដែរ នាងដឹងត្រឹមតែថា មានមនុស្សកំពុងហែលមកតាមនាង ហើយម្នាក់នោះជាមនុស្សស្រីដែលនាងបានធ្វើឲ្យឈឺចាប់ព្រោះវត្តមាននៃការត្រឡប់របស់នាង ។

"ខេត!..."វីនីយ៉ាឯណេះក៏នៅតែព្យាយាមធាក់ជើងក្នុង បង្កើនល្បឿននៃការហែលទឹកឲ្យកាន់តែលឿនជាងមុន ដើម្បីឲ្យបានទាន់ខេត ទោះបីជាយ៉ាងណា នាងមិនអាចឲ្យខេតមានគ្រោះថ្នាក់បានឡើយ ។

"ឆាប់ចុះទៅជួយគ្នាភ្លាមទៅ! ឲ្យឆាប់ឡើង..."ថេយ៉ុងងាកទៅប្រាប់ទាហ៊ានប្រុសៗ ៣ ៤នាក់ដែលគេនាំមក ទើបពួកគេប្រញាប់លោតចុះទៅព្រមគ្នា ដោយសារកន្លែងដែលពួកគេលោត គឺនៅមុខផ្លូវទឹកស្រាប់ បើសិនខេតនិងវីនីយ៉ាមកដល់ អាចនឹងជួយទាន់ ។

"ខិ...ខិ...."ទីបំផុត ទាំងខេតនិងវីនីយ៉ា ក៏ត្រូវបានទាហ៊ានទាំងនោះជួយនាំឡើងមកលើគោកដោយសុវត្ថិភាព ជីមីនក៏ចូលទៅជួយគ្រារាងកាយទន់ល្អូករបស់ខេតឡើងមកខាងលើ ខណៈថេយ៉ុងក៏ជួយគ្រាវីនីយ៉ាឡើងមកដូចគ្នា ។