ជួបស្នេហ៍ក្នុងប្រតិបត្តិការ(រដូវកាលទី១)(ចប់)

ភាគ៣៩

ទីក្រុងញូវយ៉ក. សហរដ្ឋអាមេរិក

ក្រោយចំណាយពេលវេលាជាង១២ម៉ោង ឥឡូវនេះ ពួកគេទាំង៤នាក់ មានជុងហ្គុក សាន់ដ្រា ថេយ៉ុង និង វីនីយ៉ា ក៏បានចុះចតនៅព្រលានយន្ដក្នុងទីក្រុងញូវយ៉កដោយសុវត្ថិភាព ។ ដំបូងឡើយ ជុងស៊ុកក៏ត្រូវមានវត្តមានក្នុងប្រតិបត្តិការនេះដែរ ប៉ុន្តែដោយសារមានរឿងផ្សេងទៀតក្នុងទីស្នាក់ការ ដែលត្រូវការគេនៅដោះស្រាយ ទើបជុងស៊ុកមិនអាចមករួមដំណើរបាន ប៉ុន្តែក៏មិនថ្វី មានត្រឹមតែពួកគេ៤នាក់ ក៏ពួកគេអាចធ្វើចាត់ការបាន ។

ភូមិគ្រឹះ ខាល់ឌីឡូ...

ក្រោយពីចាកចេញពីព្រលានយន្តហោះ ពួកគេទាំង៤ក៏នាំគ្នាត្រឡប់មកកាន់ភូមិគ្រឹះ ខាល់ឌីឡូ ដែលជាទីកន្លែងស្នាក់នៅរបស់សាន់ដ្រា តាំងពីតូចរហូតដល់ធំមកនេះ ហើយម្ចាស់ភូមិគ្រឹះមួយនេះ គ្មាននរណាឡើយក្រៅពី លោកឌីវិត លោកនាយរបស់សាន់ដ្រានិងវីនីយ៉ានោះហើយ ។

ឡានតាក់ស៊ី២គ្រឿងបានចុះចតពីភូមិគ្រឹះ ខណៈអ្នកដែលជិះនៅខាងក្នុងឡាន ក៏ប្រញាប់នាំគ្នាចុះមកព្រមៗគ្នា ។

ទីង!..ទីង...
សម្លេងកណ្តឹងទ្វារខាងមុខរបងបានបន្លឺឡើង ឮដល់ត្រចៀកអ្នកបម្រើនៅខាងក្នុង បញ្ជាក់ឲ្យដឹងថា មានមនុស្សកំពុងតែមករកនៅខាងមុខផ្ទះ មិនបង្អង់យូរ ក៏មានអ្នកបម្រើប្រុសវ័យរាងចាស់ប្រហែល៤០ឆ្នាំម្នាក់ ដែលជាចាស់ទុំនិងអ្នកមើលការខុសត្រូវក្នុងភូមិគ្រឹះ ប្រញាប់ចេញមកមើលនៅមាត់ទ្វាររបង ព្រោះគាត់ចង់ដឹងថានរណា មកអីទាំងយប់ប្រលប់បែបហ្នឹង ។
"អូ...ការពិតជាអ្នកនាងដ្រាតើ"
"ចាសពូឃ្វី..."ពេលបានឃើញនិងស្គាល់ថាជានរណាហើយ ពូឃ្វីក៏ប្រញាប់ចុចតេឡេបញ្ជារបងទ្វារឲ្យរបើកឡើង មើលទៅតាមទឹកមុខរបស់គាត់ ក៏អាចដឹងថាគាត់សប្បាយចិត្តខ្លាំងប៉ុណ្ណា ពេលឃើញនាងត្រឡប់មកវិញ ។
"ហេតុអីអ្នកនាងមកមិនផ្ដល់ដំណឹងជាមុន? យ៉ាងហោច អ្នកនាងក៏គួរតែប្រាប់ដល់លោកម្ចាស់ ងាយស្រួលពូឲ្យគេរៀបចំបន្ទប់ស្នាក់ឲ្យ..."ពូឃ្វីនិយាយឡើងក្រោយឃើញសាន់ដ្រាមកដល់ព្រមជាមួយវ៉ាលីអីផង ខណៈនោះគាត់ក៏មិនភ្លេចងាកមើលអ្នកដែលមកជាមួយនាងផងដែរ ព្រោះក្រៅពីវីនីយ៉ា គាត់មិនដែលឃើញមុខប្រុសៗទាំងនេះឡើយ ហើយបើមើលទៅតាមសាច់ឈាម គឺប្រហែលជាមកពីប៉ែកអាស៊ីដូចគ្នាដែរ ។
"ពួកគេជាមិត្តរួមការងាររបស់ខ្ញុំ ចំណែករឿងដែលខ្ញុំត្រឡប់មកវិញដោយមិនបានប្រាប់ ព្រោះមានការងារសំខាន់ត្រូវឡើងមកភ្លាមៗនឹងណា រីឯរឿងបន្ទប់ស្នាក់នោះ ពូឃ្វីឲ្យគេរៀបចំតែមួយបន្ទប់បានហើយ"
"បើអញ្ចឹង! ក៏នាំគ្នាចូលទៅខាងក្នុងសិនទៅណា មកពីឆ្ងាយប្រហែលជាហត់នឿយហើយ"ពូឃ្វីនិយាយរួច ពួកគេក៏នាំគ្នាចូលទៅខាងក្នុងព្រមៗគ្នា ម្យ៉ាងក៏ដូចដែលពូឃ្វីនិយាយមិនខុស ព្រោះពួកគេ ម្នាក់ៗក៏ហត់និងអស់កម្លាំងខ្លះដែរ បើបានទម្រេតខ្លួនបន្ដិចប្រហែលជាល្អ ។