ជួបស្នេហ៍ក្នុងប្រតិបត្តិការ(រដូវកាលទី១)(ចប់)

ភាគ៤៧

ឡានបីគ្រឿងបានបើកក្នុងល្បឿនលឿន លើផ្លូវមិនសូវមានឡានបើកបរច្រើន ថេយ៉ុងព្យាយាមជាន់ហ្គែរបន្ថែមល្បឿនកាន់តែលឿន ដើម្បីកុំឲ្យពួកនោះតាមទាន់ ប៉ុន្តែគេកាន់តែបន្ថែម ពួកវាក៏កាន់តែបើកតាមកិតៗ ហាក់មិនចុះយ៉មទាល់តែសោះ ។

"ង៉ឺត!!!"សម្លេងជាន់ហ្វ្រាំងលាន់ឮសូរយ៉ាងរំពង បន្លឺចេញពីឡានរបស់នាយកំលោះថេយ៉ុង បន្ទាប់ពីមានឡានមួយទៀតបើកមកបាំងមុខឡានរបស់គេ ។

"ចង្រៃយ៍!!!..." ថេយ៉ុងងើបមុខចេញពីចង្កូតឡានទាំងខឹងសម្បារ គេបម្រុងទាញកាំភ្លើងនិងបើកទ្វារឡានចេញ ប៉ុន្តែបែរជាពួកវាបាញ់តម្រង់មករកគេតាមកញ្ចក់ឡាន ទើបថេយ៉ុងប្រញាប់អោនក្បាលចុះគេចគ្រាប់ ។

ថេយ៉ុងស្រវាចាប់កាំភ្លើងមកបាន រួចក៏ងាកទៅទាញទ្វារបើក នឹងបាញ់តបទៅពួកវាវិញមិនដកដៃ ។ ឆ្លៀតឱកាសដែលពួកវាកំពុងតែគេចគ្រាប់ ថេយ៉ុងក៏យកឱកាសនេះ នាំខ្លួនរត់ចេញពីកន្លែងឡាន ចូលទៅឃ្លាំងដែលគេទុកចោល នៅក្បែរនោះ ។

"តាមសម្លាប់វាឲ្យបានទៅ"ម្នាក់ក្នុងចំណោមពួកវានិយាយរួច គ្នីគ្នាពួកវាប្រហែលជា ៦ ៧នាក់ ក៏រត់តាមពីក្រោយថេយ៉ុងកិតៗទៅ ។ ចំណែកឯថេយ៉ុង ក្រោយរត់ចេញពីពួកវាមក គេក៏បានរត់ចូលទៅខាងក្នុងឃ្លាំង នឹងរកកន្លែងសមស្របមួយ ងាយស្រួល ពេលពួកវាចូលមក គេអាចចាត់ការបានងាយ ។

"ពួកឯង...ទៅខាងនោះ សល់ប៉ុន្មានមកតាមយើង"សម្លេងរបស់ពួកវា ថេយ៉ុងក៏បានឮ នាយកំលោះកាន់កាំភ្លើងជាប់នឹង ដោយកេះកៃរួចស្រេច បើសិនពួកវាចូលមក គេក៏បាញ់យកតែម្ដង ។

ប្រឹបៗ!!..
សម្រឹបជើងដើររបស់មនុស្ស២នាក់ ឮជិតៗនឹងគំនរកេសចាស់ៗដែលគេទុកចោលនៅក្នុងឃ្លាំងនេះ ហើយក៏ជាកន្លែងតែ១ដែលថេយ៉ុងឈរលាក់ខ្លួនដែរ ។ នាយកំលោះលបៗ មើលទៅខាងទិសដៅនៃសម្លេង ក៏បានឃើញគ្នាវា២នាក់កំពុងដើរយឺតៗចូលមក ទើបគេក្ដោបកាន់កាំភ្លើងកាន់តែណែន ត្រៀមខ្លួនរួចស្រេចក្នុងការឆ្មក់ទៅលើពួកវាវិញ ។

*ផឹប!! ផាំង...
ថេយ៉ុងចាប់ទាញដៃអាម្នាក់ដែលចូលមកជិតនាយជាងម្នាក់ទៀត និងកៀកកវាជាប់ពីក្រោយ រួចក៏រាកៃកាំភ្លើងទៅរកអាម្នាក់ទៀតដែលយាកាំភ្លើងរកបាញ់គេមុន ថេយ៉ុងបាញ់ទម្លុះទ្រូងខាងឆ្វេងរបស់វានាំឲ្យវាដាច់ខ្យល់ស្លាប់ភ្លាមៗ ដួលព្រូសទៅលើដី បន្ទាប់មកគេក៏មូលកសម្លាប់អាម្នាក់ដែលនៅក្នុងដៃ រួចក្រវាត់វាទៅម្ខាង មុននឹងគេចខ្លួនពីចំណុចនោះ ឲ្យបានមុនគ្នីគ្នា ពួកវាមកដល់ ។