ជួបស្នេហ៍ក្នុងប្រតិបត្តិការ(រដូវកាលទី១)(ចប់)

តួអង្គ + ផ្ដើមរឿង

#ជួបស្នេហ៍ក្នុងប្រតិបត្តិការ
______

តួអង្គ :

+ ជុងហ្គុក អាហ្គាលីស្តូ : ជាវីរៈសេនីយ៍ឯកឆ្នើមបំផុតដែលប្រចាំការនៅជាយដែនប្រទេសកូរ៉េខាងត្បូង និងមាន ថេយ៉ុង ខាន់ឌីយ៉ា ជីមីន ម៉ាន់ដ្រូ ជាអនុសេនីយ៍ ស្ដាំឆ្វេង ប៉ុន្តែក៏ជាមិត្តសម្លាញ់ជាមួយគ្នាផងដែរ ។ មកទល់នឹងពេលនេះ ជុងហ្គុកមានអាយុ២៤ឆ្នាំ ត្បិតថាមើលទៅហាក់ដូចជាក្មេង មិនសមនឹងទទួលងារនេះ ប៉ុន្តែដោយសារស្នាដៃល្អឥតខ្ចោះរបស់នាយ ទើបថ្នាក់លើពេញចិត្តផ្ដល់ឲ្យដោយមិនរារែក ។

+ សាន់ដ្រា មីនហ្គូ ត្បិតថាស្រីតូចម្នាក់នេះមិនដែលបង្ហាញមុខងារអីច្បាស់លាស់ក្នុងសង្គម កម្រនឹងមានមនុស្សស្គាល់ពីសមាសភាពនាងច្បាស់ក្រៅពីអ្នកនៅអង្គភាព ប៉ុន្តែធាតុពិត នាងមិនត្រឹមតែបានរៀនចប់បរិញ្ញាបត្រផ្នែកប៉ូលិសនៅUSAឡើយ នាងថែមទាំងជាម្នាក់ក្នុងចំណោមប៉ូលិសកងកម្លាំងពិសេសរបស់អង្គការ F.N ដែលមានស្នាដៃខ្ពស់ម្នាក់ ។ ទោះបីជានាងទើបតែមានអាយុ២០ ក្មេងជាងគេក្នុងក្រុមក៏ពិតមែន តែនាងជាមនុស្សរវៀស ការគិតរហ័សរហួន បើនិយាយពីរឿងកាំភ្លើង គឺបាញ់ចំៗគោលដៅមិនដែលភ្លាត់ ទាស់តែម្យ៉ាង នាងមានចរិតឆេវឆាវបន្ដិច ប៉ុន្តែបន្ទោសនាងក៏មិនត្រូវ ព្រោះគ្រប់យ៉ាងអាចនឹងមកពីរឿងកាលពីអតីតកាលជាអ្នកប្រែក្លាយនាង ។

+ វីនីយ៉ា អាល់ដ្រូ ជាមិត្តសម្លាញ់របស់ សាន់ដ្រា រៀនចប់ផ្នែកជាមួយគ្នា ធ្វើការក្នុងក្រុមតែមួយ សមត្ថភាពនាងក៏មិនខុសគ្នាពី សាន់ដ្រា ដែរ គ្រាន់តែថានាងជាមនុស្សចិត្តត្រជាក់ដូចទឹកកក ធ្វើប្រតិបត្តិការច្រើនប្រើប្រាស់ខួរក្បាលជាជាងអារម្មណ៍ខុសពីសាន់ដ្រាដែលចូលចិត្តប្រើអារម្មណ៍ ។ ពេលប្រតិបត្តិការម្ដងៗ បើសិនគ្មាន វីនីយ៉ា នោះទេ គ្មាននរណាអាចហាមឃាត់ចិត្តឆេវឆាវរបស់ សាន់ដ្រា បានឡើយ ។

ផ្ដើមរឿង

@១០ឆ្នាំមុន

ដំណើរជីវិតរបស់មនុស្សម្នាក់ៗ មានសិទ្ធិរស់រាននៅលើផែនដីតែមួយ ប៉ុន្តែក៏មិនប្រាកដថា មានវាសនាដូចគ្នា អ្នកខ្លះអាចនឹងរស់នៅជាមួយភាពសុខស្រួល រស់នៅពោពេញទៅដោយភាពស្រស់បំព្រង ដូចផ្កាដែលទើបតែរីកលូតលាស់ ចំណែកអ្នកខ្លះក៏រស់នៅសែនពិបាក វេទនា គ្រប់សព្វ បញ្ហាកើតមានមិនចេះចប់ ។ មិនខុសអីពីក្មេងស្រីម្នាក់នេះដែរ នាងមានសំណាង ដែលបានកើតក្នុងគ្រួសារអ្នកមានស្ដុកស្ដម្ភ មានលុយច្រើនចាយមិនខ្វះ សម្ភារៈនិយមមានសុទ្ធតែរបស់ថ្លៃ ប៉ុន្តែគួរឲ្យស្ដាយ ដែលនាងគ្មានវាសនា រស់នៅដូចព្រះនាងបន្តទៀត បន្ទាប់ពីមានឃាតកម្ម ការសម្លាប់ដ៏ឃោរឃៅមួយ កើតឡើងលើប៉ាម៉ាក់របស់នាង ។ គ្រប់យ៉ាង ត្រូវរលាយត្រឹមមួយពព្រិចភ្នែក នាងបាត់បង់គ្រប់យ៉ាង មិនថាទ្រព្យសម្បត្តិ របស់ប្រើប្រាស់ ផ្ទះ រួមនឹងជីវិតរបស់លោកប៉ាអ្នកម៉ាក់ ព្រោះពួកគាត់ត្រូវពពួកអាក្រក់សម្លាប់គ្មានញញើតដៃ ។