ជួបស្នេហ៍ក្នុងប្រតិបត្តិការ(រដូវកាលទី១)(ចប់)

ភាគ១៧

ក្នុងជំរុំនៅបន្ទាយ....

កាយមាំអង្គុយធ្មឹងធ្មាតលើកៅអីនៅតុធ្វើការរបស់ខ្លួន ចិញ្ចើមជ្រួញជាប់ដូចជាមានរឿងកង្វល់ចិត្តអ្វីម្យ៉ាង ខណៈដែលគេកំពុងពិនិត្យរបាយការណ៍ដែលខាងថ្នាក់លើបញ្ជូនមក ក៏មានស្រមោលខ្មៅរបស់មនុស្សដើរមកដល់មុខជំរុំរបស់គេ ដាស់អារម្មណ៍អ្នកខាងក្នុងឲ្យប្រញាប់ងើបមុខមើលស្រមោលនោះភ្លាមៗ ។

"មកហើយហ្ហេស?"ទឹកមុខមាំមុននេះ ក៏ប្ដូរមកជាញញឹមពព្រាយ ពេលឃើញវត្តមានអ្នកដែលចូលមកអម្បាញ់មិញ ។ សាន់ដ្រាដើរចូលមកទាំងមុខងាប់ នាងមិនបានចង់ចូលមកក្នុងនេះឡើយ បើកុំតែជាបញ្ជារបស់គេ នាងប្រហែលមិនមកជាន់ដាច់ខាត ។

"មានស្អីចង់និយាយជាមួយខ្ញុំ?"សាន់ដ្រាមិនទុកពេលឲ្យខាតទទេរ ទើបនាងសួររកហេតុផលដែលជាហេតុឲ្យគេផ្ដាំតាមថេយ៉ុង ហៅនាងមកទីនេះ ។ ជុងហ្គុកមិនទាន់តប គេប្ដូរងើបចេញពីកៅអីអង្គុយ ដើរមកឈរទល់មុខស្រីស្រស់ដែលកំពុងធ្វើមុខឡេងឡង់ៗ ព្យាយាមដកខ្លួនឲ្យឆ្ងាយពីគេ ព្រោះខ្លាចគេធ្វើរឿងមិនល្អដាក់ដូចកាលមុនទៀត ។

"ខ្ញុំមិនមែនខ្មោចឯណា ចំាំបាច់ធ្វើមុខភ័យ?"ជុងហ្គុកក៏ផ្ទុះសំណើចឡើង ពេលឃើញអាការៈប្លែកៗរបស់នាង ខណៈនោះ គេក៏ឈោងយកឯកសារនៅលើតុ ដើរវៀងទៅតុមូលក្នុងជំរុំរបស់គេ មានកៅអី៣ព័ទ្ធជុំវិញ ហើយក៏ដាក់បង្គុយចុះ រង់ចាំឲ្យសាន់ដ្រាមកអង្គុយទល់មុខនឹងបាននិយាយការងារជាមួយគ្នា ។

"នៅឈរសម្លក់ខ្ញុំអញ្ចឹង និយាយការងារយ៉ាងម៉េចកើត?"ជុងហ្គុកបែរខ្នងនិយាយឌឺដងទៅកាន់សាន់ដ្រា កាលបើគេងាកទៅឃើញនាងមិនព្រមដើរមកអង្គុយតាមការគិតទុក នាងគិតតែពីឈរសម្លឹងសម្លក់គេឡើងថ្លែទៅវិញ ។

"មានស្អីក៏ឆាប់និយាយមក"សាន់ដ្រានិយាយបែបគំហកៗ ក្រោយទម្លាក់ខ្លួនអង្គុយចុះនៅកៅអីទល់មុខគេហើយ ជាមួយទឹកមុខធុញទ្រាន់ នាំឲ្យនាយកំលោះខាំមាត់ខ្លួនឯងតិចៗ គ្រឺតខ្នាញ់នឹងចរិតរបស់នាងជាខ្លាំង ប៉ុន្តែបែបហ្នឹងគេពេញចិត្ត នាងកាន់តែផ្គើន កាន់តែបញ្ចេញអាការៈធុញទ្រាន់ពេលនៅជាមួយគេ គេក៏កាន់តែចង់ស្និតស្នាល ចង់ញ៉ោះឌឺដងនាងពីមួយថ្ងៃទៅមួយថ្ងៃ ទាំងដែលដើមឡើយ ចរិតរបស់គេមិនមែនបែបហ្នឹងឡើយ តែពេលនៅជាមួយនាងមួយរយៈ គេក៏ប្ដូរ ប្រែប្រួលទៅចរិតផ្សេងអស់ ដូច្នេះនាងត្រូវទទួលខុសត្រូវ ។