خليكي تقيلة

2 .

نزلت من المسرح وقلبي حاساهو حيطلع برة صدري ويقوم جاري والناس ورأي بتصفق وبتضحك بقوة ما مصدقة أنا عملتها إتصرفت بشكل طبيعي وقلت العاوزه أقولو كنت خايفة بس واثقة إنو حقدر والحمد لله قدرت زحيت الستارة البتفصل كواليس المسرح من السلم البينزل لتحت ، نزلت السلم وأنا بتكل علي الحيطة حاسة بروحي ما قادرة أمشي كرعيني بترجف وبالشدة شايلاني شوية كدا وجسمي كلو بدأ يرجف وقبل ما أصل لتحت قعدة في نص السلم حاسة روحي ما قادرة أنزل أكتر من كدا والسلم ما تامي سبعة درجات .

   : زين أبدعتي !

صوت المشرف خلعني وكيف عاد ما يخلعني وهو جاي يكورك و وراهو أربعة لابسين زي موحد شكلهم تبع كورال الموسيقى كانو متحمسين بصورة مبالغ فيها وهم بينططوا في نهاية السلم منتظرني أنزل و عشان كل واحد فيهم بتكلم براهو ما قدرت أفهم هم بيقولو في شنو ؟ دا غير الدوخة بت اللزينة الجاتني من وين ؟ ما عارفة مصعبة الموضوع زيادة ، وقفت بالشدة وأكيد لاحظوني وأنا برجف واحد من الاربعة سألني بشك

  : زين إنتي كويسة ؟

وواحد تاني إتكلم :  هل كنتي خايفة ؟ لي بترجفي كدا ؟

المشرف طلع لي من تحت وقال لي : قادرة تمشي ولا لا  ؟ زين بتكلم معاكي ؟

قعدت في السلم تاني وقلت بكذب عليهم طبعاً

: هيي قايلني منو ؟ أكيد كويسة وفي أحسن حال بس المحل هنا فجاء بقي لي سمح وقلت أقعد شوية أمشوا قدامي بحصلكم بعد شوية .

رفعت إبهامي وقعدة أضحك ليهم عشان ما أظهر إني تعبانة ما دايراهم ينشغلو بي وعندهم برنامج مهم لازم يكملوه لقيتهم لسع واقفين وبعاينو لي قلت ليهم تاني

: ياااخ ما تحسسوني بالإعاقة إمشو والله أنا كويسة هسي بلحقكم .

إستغفر الله العظيم كذبت بس أعمل شنو هم ما حيمشو إلا كدا وغالباً حبقي كويسة الموضوع ما محتاج المشرف قال للاولاد يمشو وهو قعد جمبي في السلم وأنا مدنقرة رأسي زي الزول الداير يبكي فهو ضحك فجاء وقال بيحاكيني وأنا بقدم

: قد تضربنا التيارات و تعصف بنا الاعاصير ولكننت سنمضي في درب هذا العلم بدون تقصير .. جبتي بيت الشعر دا من وين يا بت ؟

أستاذ زاكر واحد صارم وصعب مع كل الناس بس مع ناس الثقافة والإعلام مهرج عوير وكبير  كلامو كتير مرة وحدة  و أكتر واحد عندو عدم إتزان في المشاعر ممكن تصبح بيهو فرحان وبعد نص ساعة تحس لو إتنفست قدامو حيدك كف  يمكن أكثر أستاذ تعبت في التعامل معاهو في الثانوي وأكتر أستاذ ماديني إنذارات وبعد دا كلو أكتر أستاذ محبوب من قبل الطلبة عشان تصرفو الزي دا هو بيحاول يخفف دايماً علي الطلاب وبيقيف معاهم وبحاول يتفهم هم عملوا كدا لي قبل يعاقب او يخبط بالسوط  .