خليكي تقيلة

11 .

ما حسيت بيدي و الصور بتمشي بسرعة في رأسي وقلبي بيعصرني بقوة بيخلي نفسي قايم زي الكنتا جارية في قيم كورة بس ملامحي ما دايرة تتحرك ريم قال بتحول تتبرر كلام نارمين

    : زين اسمعيني هو رجع عرفنا من إسماعيل بس ما عارفين هو وين بالضبط يمكن اصلاً ما رجع ...

قبل تتم كلامها فكيت التلفون ووقعتو في الارض وبكراعي عفصت شاتو لحدي ما اتهشمت مرة مرتين ما كنتا حاسة بحاجة وانا بعمل كدا بس كنت عاوزة اعمل كدا هي كيف اتجرءت تجيب سيرتو قدامي وبكل نفس مفتوحة و إسماعيل متواصل معاهو لمن عرف انو رجع السودان ما بلومو هو راجل خالتو بعد كل شي .

انا ما قاعدة الومهم الصراحة انا ما بلوم زول دي خياراتهم ودي حياتهم يعملو الدايرين يعملو الحاجة دي تنطبق علي انا كمان دي حياتي ودي خيارتي انا اعمل الدايرة اعملو .

  : يا سجم ..

رفعت رأسي من الارض لجازم الواقف جم الباب معاهو رامز و إيان ، الحظ دا ولد كلب خلاص مستحيل يوم ينحاد لزول بس بيحب يضر شديد هسي يسألكم الله البيت دا كلو ما عرفتو تكابسوني الا هنا وكمان جايبين إيان معاكم تفو علي خلقكم كان جازم كان رامز ، رامز اتكلم بصوت عالي وظاهر عليهو مخلوع

  : جنيني وريني حمارة انتي التلفون ...  هسي التلفون عمل ليكي شنو تكسريهو كدا .

جازم عاين لرامز وقال

: هو كان ما سامسون .

دا الكان ناقصني شكلة فارغة ما منها فايدة وعلي مستوي عالي من الغباء بيخلين افكر مرتين الناس ديل لميتهم من ياتو كوشة لانو دا ما اسلوب بشر اتولدو من لحم ودم ، بس تصدقي يا زين دا المحاجاهو الزعل حيعمل ليكي شنو غير ما حيوجع رأسك فقلت

   : خلاص يا ناس الايفونات .

كتفت يديني ووقفت قدامهم لحظة صمت مرت علينا ونحنا بنعاين لبعض انا دايرة ادي روحي كف عشان عاملة زي ناس العصابات قدام الكراش حرام ياخي انا ما دايراهو يخاف مني بس اعمل شنو الحياة بتعلمنا كدا وذكريني يا زين امشي ادي نازك كف لانو هو العامل لي عقدة مع الاولاد وخاليني بالنظر ساي بخوفهم خلي اتكلم ولا ارفع يدي اضربهم الله لا كسبك يا نازك .

   : سمعت ابوكي جه انت ابوكي دا ما ميت يعني ولا انا خاشي غلط .

رامز اتكلم بصوت هادي بيحاول يكون شوية مراعي وشكلو متوتر شديد من انو يكون اتكلم في موضوع حساس ، للاسف هو موضوع حساس وعلي الاغلب ما كنت حجاول بس خلاص انا قلت حواجههم وحوريهم وبدون اي كذب المرة دي ، زفرت ونزلت يدني وقلت

   : ابوي بالاسم بس يا رامز  .

جيمين كشر وشو و ما قدر يدس صدمتو ورامز مخلوع اكتر منو فقال بصوت عالي صوتو المتعودين عليهو  .