خليكي تقيلة

27 .

رامز قبل علي زين اللقاها فاتحة خشمها مصدومة دي ياتو لغة وما تمثل فيها مسكينة وما فمهتها هي فهمتها بس عارفة انو ما صح حتي انو تفكر فيها فما بالك بواحد ينطقها .

   :  نيل !!  الفاظك في بت هنا .

واحد من الاربعة شباب ضرب نيل في رأسو وشاكلو بنهرة غليظة ونيل ما قصر قبل عليهو بكورك .

   : ما شايف الدين ديل عاملين فيها بلطجية بتقاوا مع شفع الثانوي ديل .

فؤاد رفع حاجبو و رد عليهو

  : شوف الراجل خلاص داك تقول ما ممتحن شهادة للمرة التانية .

نيل مسك لفؤاد رقبة قميصو بشدو ليهو وفؤاد ما قصر عمل نفس الشي والاتنين شوية ويداققو في الارض جة واحد مسكهم من اكتافهم وهمس ليهم براحة

  : نازك بعاين ليكم اخير ليكم اتفاككو .

الاتنين لذو بعض بعدائية وعاينو لنازك الكان بعاين ليهم بطرف عيونو و لمن زحو عيونهم نازك تاني رجع عيونو للاتنين الجو يطلعوهم من مصيبتهم والخمسة الوقفو بعاينو للبيحصل بدون ما يتحركو سنتي ، حيدر الكان واقف جم فؤاد جه لنازك وقال ليهو

  : اتجنب المشاكل يا نازك المنطقة دي ما حقتنا .

نازك رفع حواجبو وعاين لحيدر بيبتسم بإستهذاء

    : يا حيدر نسيت ولا شنو ؟ الخرطوم دي كلها حقتنا .

زي ما الاولاد اصرو علي موقفهم وحاولو يأدبو الدخلاء زي ما سموهم و زي ما الدخلاء دقوهم في اقل من نص دقيقة وما اطر واحد فيهم يتوسخ ابعد من معصم يدو وزي ما شوية زوق من نازك و عرض توصيل لزين و رامز  من باب الادب كان مقنع بس لا رامز رفض رغم زين حست بصدق عرضهم بس رامز ما كان مرتاح ليهم و ساق زين يجرها من طرف كمها ما عاوز يمسك يدها وعارف انو دا سوء ادب منو واتجاوز الاولاد بقول - بنعرف البيت بوين - هو حتي ما قال شكراً و لا حتي زين .

نازك طول السكة بتكلم عن انو لمن يعمل حاجة كويسة زول بقول ليهو شكراً مافي ولمن يعمل حاجة كعبة نص شرطة الخرطوم بتكون وراهو و حيدر جاهو صداع من كلامو الما حينتهي بينما نيل وفؤاد بيتشاكلو في الكرسيين الورة وكل واحد فيهن بقيس قوة احتمال التاني للضربات البتجي فجاء وبسرعة عشان نازك ما يقبضهم وشكلهم مستمتعين بالالم البسببو لبعض و كارهينو في نفس اللحظة عشان هو الم في النهاية .

زين وصلت البيت بتتسلل زي الحرامية عشان زول يقبضها مافي بس للاسف اتقبضت واتهزأت من عمتها حتي انو عمتها ضربتها في ضهرها كم مرة قبل زين تجري منها علي غرفتها ، زين بتحاول ما تبكي بس ما بتقدر وجملة - لو كانت امي حية ما كان حيحصل كدا - كان اكتر جملة بتخليها منهارة وما بتدس الكلام دا عن بت خالتها ريم التواصلها معاها بيزيدو البعد و الزمن بس رغم انها بتحكي لريم اي حاجة هي كانت بتختصر شديد لمن تجي لموضوع عمتها وتعاملها معاها وبتلخصو في كلمة - صعبة - كل ما ريم تسألها عنها .