خليكي تقيلة

15 .

- زين جبر الخواطر دا زيو مافي قدر ما تقدري وقدر ما تلاقي فرصة أجبر خاطر زول -

كلام أمي مرة في رأسي لمن جازم قال لي - ما بقدر اشوف زول زعلان وما اجي اخفف عنو -

هو لي بيتعامل معاي كدا ؟

في البداية فتشني في كل ركن في الموقف لحدي ما لقاني رغم إني ما كنت دايراهو يلقاني بس الشي تقول عيون الزرقاء لقطني حتي بدون اتكلم .

تاني حاجة قعد جمبي وقال - ما كنت قايلك بتعرفي تبكي - ليهو الحق يقول لي كدا انا ما حصل بكيت قدامهم وقدامو هو بالذات .

قعد يتكلم ويقول إنو اصابة هاني ما فيها حاجة الكتف انخلع ورجع محلو اي ما انا الرجعتو بس هاني متجرس وعاملها هيلمانا وداير اشعة والكلام داك .

ولمن سألتو لي لحقني هو قال الكلام داك وهسي دموعي بعد شوية وقفت زادت زيادة أنا لو كنت محلو كنت حضحك فيني وحقول تستأهل لانها كعبة انا امبارح مورمة ليهو وشو بالضرب بس هو جايني بيضحك وخاليهم في المستشفي جايني أنا الما عندي أي علة بس لانو زعلانة هو خلة مسؤوليتو الأدتها ليهو عمتو لهاني وجاني . 

رغم كل الكلام الكعب البقولو ليهو رغم كل العمايل البعملها ليهو هو لي كدا ؟ بسببو بكيت زيادة وقلت بالجلالة

  : قوم من جمبي انت قاعد تبكيني زيادة .

جازم اتخلع اولاً بصوتي وتاني بإنو بعد سكتة قعدتة ابكي تاني ولانو بقيت الزو بيديني عشان يقوم

  : عملته شنو هسي زين انتي دايرة مشاكل .

عمل فيها بيهددني وهو بيهظر بس انا ما عندي حيل لهظارو دا أنا بالجد حاسة بروحي دايرة اقع مدروخة و جسمي ما شايلني أحساس الذنب في كل دقيقة بيزيد لو ما قام من جمبي حقعد اعتذر ليهو للصباح فأحسن يقوم من أذل نفسي قدر دا أنا ما بقدر اعتذر ليهو هو بالذات ما عارفة لي بس ما بقدر .

  : إنت ما ممكن تكون كدا دا كتير قوم قلت ليك قوم .

خليتو ما قدرت عليهو وبقيت ابكي بزيادة والمرة دي بصوت حاسة حلقي حيتقطع من كترة ما بيوجعني هو أنا اصلاً حمارة ومافي زيها اتنين ببكي بكوارك وكم قميصي اتملة دموع ومخاطة يخربني هسي في واحدة سايلة دخلت خشمي وانا بلعتها طعمها حلو علي فكرة عرفت لي الشفع بيحبو ياكلوها .. ركزي يا بت قومي من جازم دا كفاية فضايح .

قبل يتكلم قمت من جمبو وجريت بالفضل لي من حيل و كوركت ليهو ما يلحقني بس هو ود حرام لحقني وقاعد يكاويني يجري قدامي ويرجع جمبي بيقول - اجري يا بت حسام بيجري اسرع منك - والله مهزء حسام دا تهزئي شديد ..
اصبر والله اوري ليك بعدين يقوم يدك بجيتارو واحد في رأسك الكبير دا نشوف تقول بعدين يا منو ؟ .

غفلتو وادسيت وره العربية وهو قايلني جريت لجوة المستشفي بس انا جريت لبرة و كل بعد دقيقة بعاين ورأي لو لحقني و لا لا ما قادرة اتقبل حقيقة اني غلطانة في الحقيقة انا ما عاوزة اكون أنا الغلطانة  ودا بيخليني احس انو انا بالجد كعبة ، عاينت وراي لاخر مرة ودا كلفني كتير للانو ضربت مرة كدا ووقعتها وطبعاً سودانين يا جماعة والشكلة دورت .