خليكي تقيلة

14 .

 

: ابوكي رجع السودان نهائي يا زين عارفة دا معناهو شنو ؟

لو ما كان ابوي البعرفو كان صدقتو بس لو دا ما هاني البعرفو كان كذبتو ، الجملة حقتو ابت تتبلع لي ووقفت لي في حلقي مخلياني ما قادرة لا اعرف افهمها لا اعرف ارد عليها ففضلت بعاين ليهو وهو شابي فوق الدرابزين كانو ما خايف يقع وحاسة بأسلوبو غريب شوية ما محسسني بالأمان و لا حدسي مطمن ليهو ما عارفة هسي اقول ليهو شنو وهو بس منتظرني ارد ، قبلت منو وواصلت طريقي لغرفتي ما دايرة اواصل كلام معاهو عكر لي مزاجي .

  : I bet that  your friends don,t know about your parents .
"أراهن علي أن اصدقائكي لا يعلمون عن أبويكي  "

الخلاهو يحول اللغة هسي شنو واليخليني ارد ليهو زاتو شنو

: داير اشوف ردت فعلهم لمن يعرفو .

شامة لي ريحة تهديد من طرف هاني و دا ما  في صالحو ، قبلت عليهو بعد كتر كلامو واتماده وقلت بمد يدي وبهدد زيو

  : قرب عليهم ونشوف تاني تتكلم بشنو ؟

هاتي رفع يدينو ونطة من الدرابزين بيضحك و بيقول بإستهذاء

  : روقي يا بت أنا ما عملت حاجة ..

سكت مسافة ولسع حاسة انو في مشكلة داير يعملها وهو ما خيب ظني و قال

   : لحدي هسى .

إبتسم بطرف خشمو و مشة مني حتي قبل ارد الولد دا متخلف ولا بيتخلف دا ما اسلوب بشر وانا والله ما اخليهو مشيت بوراهو وجريت بقول

   : وحاة الأحد ما تمشي لحدي ما أنا اقول العندي .

ما كنت متخيلاهو حيقيف وحيقبل علي ففرملت قبل أصلو بالشدة و السجادة ما عرفت تعترني إلا هسي جيت متشنقلة في الولد والاتنين جينا طايرين لقدام ، أنا بحب السجادة الحمراء الفي الأرض دي حصل قلت الكلام دا ؟ لا لكن هسي حقولو أنا يا سجادة يا حمراء بحبك وبحب كيف انتي سميكة و خليتني حتي بعد الوقعة دي حية بدون كدمات دقيقة يا زين بس السجادة هي العترتتي في المقام الاول .

قعدتة بحيلي وعاينت للسجادة ومسكتها بنتف فيها و بقرصها يخربني جادة وواعية بس أخلاقي طين

: بت الكلب دايرة تقتليني ..

قبل اتم كلامي هاني خمشني من جضومي وكورك فيني

  : ضهرييي يااه يا غبية كسرتي لي ضهري .

كان زهجان وزعلان بالجد وهو بشاكلني هسي اليزعل منو عامل لي عيونك السمحة دي ، فطوالي فكيت السجادة وقعدة اقرصو في ساعدو و أنا زاتي بقول

  : جضومي يا منفلت دا وش مزيعة ما تخربو .

شد علي قرصتو ببخليني اشد علي قرصتي أنا كمان ومن انتقام اتحولت الشغلة لمسابقة تحمل هو فاتح خشمو داير يصرخ وانا ماسكة حلقي لو طلع صوت اقطعو حسيت بيهو رخة فطوالي فكيتو وضربت يدينو من جوة لبره عشان تفكني وفكتني بس حوقف علي كدا لا طبعاً رفعت يدو الشمال ودخلت رأسي تحتها وبيدي الشمال رجعت كتفو ورقبتو ومسكتها بيدي التانية وهو قاعد يكورك .