خليكي تقيلة

3 .

مرة في تانية ثانوية كنتا قاعدة مع مآب وسعاد و أحمد بتنونس وره الفصل بعد خلصنا واجب الرياضيات ولا الاصح هم خلصوه أنا حشتغلو بعدين أو يمكن ما أشتغلو زاتو علي حسب ، الونسة كانت ظابطة لدرجة عملنا جوطة مزعجة لباقي الطلاب رغم إنو دي الفسحة بس طلاب فصلنا ديل دوافير ما دايرين يطلعو إلا يخلصو الرياضيات تقول من سماحة الواجب  أحمد رفع يدو وضرب الدرج بقوة حسسني عاوز يكسرو ودي كلها بس عاوز يحلف إنو رامز بيتكلم فرنسي ولا إسباني ما متأكد وهو نايم الفصل كلو حمر لينا ونفسهم كان يتكلمو أو يطردونا لكن وحااات النبي الحيتكلم حيقضي باقي اليوم في مع الممرضة في نهاية المدرسة .

  :  يااا شي إنت داير توقف لي قلبي بالخلعة ولا شنو ؟

دي كانت سعاد بتشاكلو وهي ماسكة قلبها ومتشنجة علي روحها زي الكانت دايرة تجري وثبتت مآب جمبها دايرة تبكي بالضحك وأحمد ولا علي بالو مواصل

: لا إنتِ كان شفتيهو والله خلعنا خلعه قايلين الولد إتلبس ولا حاجة و حسام حاول يقرة ليهو بس أول ما قال بسم الله رامز كان حرك يدو وصوتو شوية بقي أوضح حسام من الخلعة والخوف جرة بيكوك أمييي ..

ما قدر يكمل بالضحك أنا الوحيدة اليمكن ما دايرة أبكي بالضحك بالعكس دايرة أموت من الخوف يمكن بالجد الولد ملبوس فقلت

: وطلع ملبوس ولا دا عشان تعبان بس قاعد يتكلم ؟

أحمد ما كان قادر يرد لي من الضحك وسعاد زيو واحد مآب أخف قدراً ردت لي

: ما حازمة يمكن تعبان رامز كويس إستغفر الله العظيم ما عارفة أعلق بشنو ؟ بس حسام عسل .. بالجد كان داير يقري ليهو ؟

البت دي مستهبلة ولا شنو هي ما عارفة الجواب دايرة تجاوب لي فتحت حافظة الموية عندي كنت خاته فيها عصير وبراهو العصير قرب يخلص وديك تقول من شافو عصيري كلهم عطشو أي واحد فيهم رفع باغتو وداير يشرب ، وعشان حظي زي وش الطين العصير حقي بقة سخن وما بيشرب بدون أعاين وراي في شنو كشحتو لورة بره الشباك أحمد إتشرق بالموية حقتو لمن طلعت بنخرتو مآب تفت مويتها في الأرض وقلعت عيونها بخلعة سعاد ما قدرت تبلع الفي خشمها ولا قدرت تتفو بسم الله مالهم فجاء

  : بسم الله مالكم ؟!

      علي العموم يعني أصلاً إتعودة وأستاذ زاكر الكشحتو بعصيري أكيد إتعود فمافي داعي أوصف شكلو والقميص الابيض حقو بقي أحمر ولا أوصف الزكوكية الحصلت عشان أبيت أجيهو هو يوم طبيعي يعني ما حصل شي وطبعاً وكالعادة لازم يتنهي بعقاب لانو المديرة مصدقة تماماً إنو الضرب ما بيحل أي شي والزعلة الفي وش أستاذ خالد لمن عرف إنو ما حيدقني المرة دي برضو ما شي لكن يوقفوني في السرميك الفي الحوش وحفيانة وتحت الشمس دي ما عافياها ليهم لا دينا ولا آخره المفروض دا عقاب للاولاد ما للبنات لمن قلت الجملة دي للمديرة هي سألتني إنو لو أنا معتبرة روحي مع البنات فلازم أراجع روحي كويس شكراً يا دنيا وشكراً ليكي يا مديرة عواطف ثقتي بنفسي زادت شديد .