خليكي تقيلة

36 .

رامز كان ممكن يتوقع انو ابوهو ما يجي يستقبل محمد اخوهو في المطار بس انو يمنعهم كلهم دي كانت حركة مستفذه منو ، قرشي ابو رامز كان مفتكر لو زادت صرامتو وقسوتو مع رامز فدا حيمنع رامز انو يسلك نفس الدرب الفاسد الاختارو ولدو الاكبر بس قرشي بدون يحس خلي رامز يبقي اسواء من محمد و بمراحل بس حتي رامز ما عارف الحاجة دي عن نفسو و الكابح الحاجة دي كانت زين و زين زاتها ما كانت عارفة انها ماسكة رامز من فساد ممكن يرميهو في الهاوية بس حتي زين ما بتقدر تراقب كل حياة رامز عشان تمنعو من اي غلط و الباقي بس مسئلة وقت ويظهر الجانب الكعب في رامز و ما حيلقي اليمسكو .

: النسألكم دا مالو بيقرة ؟

محمد السأل بيضرب رامز في كتفو و بأشر علي حيدر الجاي باللابتوب بتاعو وقاعد في الارض خلي كل المعاهو يعاينو ليهو و حيدر لسع ما ناوي يرفع عينو من البيقرة فيهو ، نيل مشة عشان يشوف هو بيعاين في شنو وقال

: ما تظلمو يمكن بيحضر في إباحيات .

بس نيل شاف كتابة كتيرة و قلم بيشرح و حيدر موصل سماعة وبيسمع اتأكد انو بيقرة فكمل كلامو بيرجع لجهة جورج و فؤاد

: لا اللوطي بيقرة .

لعشرين دقيقة كاملة كانو براقبو في حيدر الولا لثانية رفع عينو من البيحضر فيهو كأنو مافي شي غير القراية دي قدامو فجاء جورج ذكر انو حيدر قال عندو امتحانات بعد شهر و الكلام دا كان قبل شهر . و فؤاد علق بكل برود

: مدام عندك امتحانات جاي مالك امشي اقرة في بيتك .

جورج رد عليه

: و انت مالك هو حر ياااخ !

بس كدا ودورها شكلة خلت كل القاعدين حولينهم يعاينو ليهم و زي ما الشكلة بدت سرعة هي انتهت بنفس السرعة نازك ياداب حسة بالمصيبة العملها وقال

: انتو عارفين ؟ ..

مع نهاية جملتو كلهم اتلفتو عليهو عاوزين يسمعو هو عاوز يقول شنو حتي حيدر وقف البيعمل فيهو وقلع سماعتو فكان مهتم بالحيقولو نازك بما إنو هو القال ليهم يجو ودي تاني مرة يهدد بجملة - الما حيجي ما يلوم الا نفسو - لانو اول مرة كانت في اجتماع عاوز يتقدم فيه لزين عشان تعرسو و النهاية صدمتهم ، فتركيزهم معاهو ما علي كيفهم دي غريزة بتقول انو نازك حيقول كلام مهم ويمكن اكثر حاجة عاقلة وعميقة قالها او حيقولها في حياتو بما انو صاحب عمرو حيرجع اليوم السودان وهم هنا عشان يستقبلوهو بس خربها لمن قال

: إمجي حيبل أمنا لو شاف الارقام ادهورت كيف تحت يدي .

حيدر رد عليه بسرعة و حاول هو بالفعل حاول ما يكورك او يطلع صوتو عالي و مهدد

: عليك دينك دا كلام تقطع لي بيهو المحاضرة ؟؟ ومال دين أمنا بالارقام مش أنت العامل فيها ليدر .