خليكي تقيلة

32 .

رامز وحسام كانو بفتشو في زين هو الاصح حسام كان عاوزها هي شالت منو علاقة الباندة حقتو لانو عجبتها و قالت بترجعها ليهو بعدين وهو بفتشها عشان خايف انها تضيت مفتاح الدولاب حقو الخاتيهو في العلاقة و هو امبارح مشتري للدولاب قفل جديد لانو ضيع مفتاح القفل القديم ، رامز لاقاهو في السكة وعرض عليهو يفتشها معاهو في الاخر لقوها في مكتب المعلمين بتحرك يدها بطريقة غريبة هي وبت قصيرة مركبة سماعة في اضانها . الاتنين عاينو لبعض مستغربين زين والبت بيعملو في شنو  بعدها بالشباك كوركو لزين و زين بسبب ونستها الطويلة مع ميسون ردت عليهم بالاشارة ، رامز اتغاظ منها وبدا يحرك يدو بطريقة غريبة وما مفهومة بعدها قال

  : انا لو بفهم السجم دا كان وجعت خشمي اتكلمي زي الناس ما تعولقينا .

زين مطت خشمها ونفسها تقول ليهو مافي عولاق غيرك بس بلعتها في حنانها وسألت

  : داير شنو ؟

حسام رفع أصبع يدو بيجزب انتباها بعدها قال

   : علاقتي ؟

زين عاينت للصقف بتاع المكتب دايرة تتذكر ختتها وين ؟ هنا حسام ضرب رأسو مع الحيطة وقال لروحو خلاص ضيعتها و رامز عجبتو اشكالهم فقعد يضحك ، في الاخر لقوها مع سعاد اللقتها واقعة جم درج زين وتاني حسام حلف لو يجيب معاهو علاقتو المدرسة وزين تشيل وتعتذر منو بس حسام مركب مكنة معليش ما بتأكل عيش محسس الحولينو انو العلاقة ما اتلقت بينما هدي هي في يدو . لا حسام لا رامز ما ركزو مع زين في انو هي بتعرف لغة الاشارة هم حتي ما سألوها كانت بتعمل شنو ؟ هي قد تكون قدام باقي الناس هدية بس مع شلتهم بتحسسهم انو كلامها كتير هو في الحقيقة سعاد علي العرش من ناحية الكلام الكتير بتليها سمر ثم زين ومآب قطعاً ممكن ما تتكلم الا تسألها لي ساكتة ؟ و غالباً ردها بيكون - أقول شنو ؟ - .

بينما الاولاد فكتاب مفتوح وعلي عكس ما ظاهر شخصياتهم اوضح من شخصية البنات المتعرجة . اي واحد بيقعد مع شلتهم بيقدر يتنبأ بردة فعل الاولاد حتكون كيف بس في حالة البنات قد يتردد و غالباً ظنو حيخيب ، الاولاد عمرهم ما كانو زي البنات و البنات حياتهم ما حيكونو زي الاولاد الإختلاف و الفروقات اكبر واكتر من انو تتحصر في جدول هي معقدة اكتر من فيزياء الكم و قد تكون دراستها اصعب من دراسة الجدول الدوري و أكيد مفهومها بيختلف حسب التجربة . الشلة دي ما عارفة كيف هم رغم إختلاف شخصياتهم بقو اصحاب و ما فاهمين انو اختلاف شخصياتهم هو زاتو البقاهم اصحاب .

و الاختلاف ما الكلمة الجوهرية البتصف بيها العلاقة البتربطهم بينما الفضول هو المفتاح الممكن تعتمدو عشان تحل اللغز ، زين لاحظت انو علاقتها مع سعاد بحركها الفضول هي دايرة تعرف سعاد واي حاجة عن سعاد بنفس الطريقة سعاد هي بتشوف زين غريبة و الفضول نحوها ما بقل كل ما تعرف عنها حاجة بل بالعكس بيزيد ، كذلك كلهم هم بحسو بالمتعة لم يجتمعو و ما حصل واحد فيهم سأل نفسو لي ؟ ولو سألو هل كانو حيعرفو الإجابة أظن لا لانو هم ما عاوزين يعرفو ، بكفيهم بس انو هم مع بعض و زي ما كل واحد فيهم قال لروحو بدون يشاورو بعض هم حيفضلو كدا ولفترة طويلة .. طويلة شديد .