خليكي تقيلة

13 .

قعدة في كرسيي الدوار جم المكتبة الصغيرة حقتي وبقيت اعاين لطاولتي الكانت مليانة كراسات واقلام وكتب حقت تالتة وهسي فاضية ومرتبة فيها كم كراس ودفتر رسم وطبعاً دفاتر الشخبطة حقتي و الوان رسم عاينت لشمالي للتصاميم المعلقة في الحيطة ما عارفة اعمل بيها شنو اخيطها لا لا دي بناتية شديد ما زوقي ودا يثبت انو ما كل رسمة بتطلع من فنان بتكون بتمثلو انا ما بقدر احب تصاميمي بس لو سألتي لو هي حلوة ولا لا حديك كف بعدين اقول ليك أنا رسمتها كيف ما تكون حلوة .. ثقة شديدة .

نخلي الجانب الفني في زين ونركز علي الجانب الندمان في زين ما لي ساعة رجعت من بيت ناس سعاد مع جيمين والملل داير يقتلني في الاحوال العادية وزي كل يوم مخلقن وممل كنت حكون قاعدة في سريري بمزاج وماسكة تلفوني ومركبة السماعة بسمع في اغانيي البحبها وبغني معاها وانا بكتب في قصة خيالية لا حصلت ولا حتحصل بس بحب انو اخليها تحصل في خيالي وعشان ما تكون مجرد فكرة عشوائية بكتبها ما لازم اكون دايماً بطلتها بس اكون جزء لا يتجزء منها مع أشخاص من الواقع العندي بس في قصصي بيكونو مختلفين .

بتذكر في تانية ثانوية كتبت عن لو انا كنت في مدرسة داخلية عملت عمتي مديرتها المديرة القاسية الما بيحبها زول و ناس كتار بعرفهم كطلاب او معلمين او مجانين جايين ساي بس لاني دايراهم يكونو هناك وبتذكر اني ختيت جيمين كشخصية مهمشة مافي زول شغال بيها  مش علي كيفي بس الوقت من زمان لهسي اختلف ، اكتشفت عن طريق البنات انو عندي موهبة في التأليف الروئي واكتر زول داعمني لحدي الان هي سمر بتفتح تلفوني وبدون مقدمات بتخش المذكرة حقتي وبتقعد تقرة بمزاج وتضحك مرات وتبكي مرات تانية كنت فاكراها بتبالغ في انو تدخل جو القصة بس لمن اتكررت الحركة من سعاد ومن مآب آمنت انو اسلوبي بيدخلهم في المود العايشين فيهو الابطال .

وما اكذب علي روحي اكتر من كدا انا اغلب الاوقات بقيت اكتب بس عشان اشوفهم بيضحكو وهم بيقروها ونسيت السبب الاول الخلاني ابداء اكتب وهو اني اطلع من الواقع شوية ، في الخيال بتكون بطل قصة والناس بتقدر قيمتك وبتقدر تحول الاحداث لصالحك او ضدك علي كيفك دا عالمك انت في بداية قصصي كنت بكتب عن نفسي براي بعدها دخلت الحوليني واحد واحد بس فكرة اني اخت بطل معاي يكون هو نصي التاني ما خطرت علي بالي  يمكن بسبب عقدتي من العلاقات ما فكرت او الاصح ما اتشجعت اعمل كدا .

وهسي بفكر في الموضوع لانو سعاد فتحت معاي الموضوع دا ونحنا علي فراش النوم وليس الموت يا زين يموت ضميرك ان شاء الله .. ضحكت مع روحي ولفيت بالكرسي مرة مرتين وتلاتة لحدي ما دخت وانا بعيد جملة سعاد في رأسي - زين اطالب ببطل في قصصك - و لسع بفكر في اقتراحها بصورة جدية - بطل يخلي البطلة تبتسم براها ونحنا نبتسم معاها شي كدا يخلينا نحس بجفاف عاطفي اختاري اي زول ميدو مثلاً عرافكي مكرشة عليهو رامز مثلاً و حنحاول نتجاهل انو بنعرفو - ضحكت مع روحي لمن اتذكرت اني ضربتها في الاقتراح دا وقضينها بعدين معركة بالمساند والمخدات .