خليكي تقيلة

بلا عنوان حتي الأن -فاصل-

حسام كسلان لدرجة ما بيقدر يغير هدوم المدرسة بتاعتو بس عندو حيل يقعد خمس ساعات وهو بيقرة بدون استراحة حمام او شراب موية ولا حتي سرحة في الحيطة او المروحة البتجي للطلاب الفي عمرو ، علي النقيض منو سمر الما عندها مشكلة تسرح في ضفورها عشرة ساعات بس ما تركز مع الكتاب اكتر من نص ساعة ، و لانو هي صريحة و واضحة في حياتها حتي البواب بتاع المدرسة عارف انو درجات سمر في الامتحانات بتكون درجات توفيق من ربنا لانو لو اعتمدت علي قرايتها ما بتطلع من الثانوي لحدي ما الله يفرجها .

الغريب بالنسبة للمثالين ديل انو درجاتهم في الورق ما ليها علاقة بذكائهم الإجتماعي وأكيد البشوف حسام مستحيل يصدق انو هو بروف فصلو واليشوف سمر حينصدم لو عرف انو بتنجح بالدعوات . لكن وبقدرة قادر الحاجة دي اتعكست في أخر سنة ليهم في الثانوي يعني علي الاقل حسام بقة يقلع هدومو ويستحمى اول ما يجي من المدرسة و زيادة علي الموضوع بقة يجهز اكلو و يرتب المكان حولو بدون زول يقول ليهو وان كان مافي زول اصلاً كان متوقع لو قال ليهو حيعمل البيقولو ليهو ، بينما سمر بقت تقرة بنفسها من غير استاذة يقروها او اختها الكان بتشاكلها علي اهمالها و الايجابي في الموضوع انها اثبتت ذكاءها وقدرتها علي التفوق بس هل دا كل الاتعلموهو الاتنين ديل من بعض ؟

نجاوب بعدين ....

انت بعد تعمق مبتذل في الفلسفة حول الصداقات و عدم اقتناعك بقناعة الفلاسفة حول موضوع انو الأنسان هو صديق نفسه ومع الجوطة واللخمة في كمية المعلومات الدخلتها والمتاكد ما عارف من ياتو كيس جايبنها رأسك حيسخن وحتجي فكرة انو الاصحاب اكيد لازم يكونو عكس بعض - من وين جات الفكرة انت زاتك ما عارف ؟ - وهنا المصيبة .. دماغك ما بس حيتفاعل مع الفكرة دي بانو دي خلاصة القريتو من الفلسفة الما فاهم فيها سجم رمادك دماغك حيحب الفكرة شديد بالذات لانها لطيفة و مقنعة -علي الاقل ليهو - في اللحظة دي وما محتاجة تقعد تفكر في النص كنص نحوي قبل يكون نص خبري .. والمهم طبعاً ليك انو تفتش ..
الزول دا عكسي يااخ معناها حنكون اصحاب ظابطين و نكمل بعض ونوجه بعض و الكلام الكثير الجايبو انت زاتك من كيس لا معروف سليم لا معروف مقدود ..
و تجي تتفأجاة بعد صاحبت الفلان هذا بعد جهد وتلتلة انو فجاء بقة زوقم واحد كلامكم واحد حتي تصرفاتكم واحدة ...
هنا تحدث الكارثة .. تمسك رأسك و تقيف من قعدتك و تسب باعلي صوت و صحبك يقوم يسب معاك وهو ما فاهم بس شافك بتسب قام يسب معاك .
خلاصة النوت ..
الفلسفة ما مرجع وزي ما يقول اسمها فلسفة ولو قسمتها و ترجمتها بالسوداني هي عبارة عن تمباك بياخدو فيهو الوهمانين لحدي ما يقتلهم ..
برضو ما علينا ..
الصحبة ما تخت ليها معيار انت اختارها او هي بتختارك مستحيل يد واحدة تصفق زي ما بقول المثل ..
الصاحب ساحب .. صالح او طالح ..

ودا يودينا ...

لو سألت الاصلح منو نازك ولا محمد المعروف بأمجيي فحرد ليك بانو الجواب هو انت ، اي بالبساطة دي .. لانو الاتين ديل مافي اخسس منهم علي سطح الارض ، و اقولها بدون ثقة لانو اصلاً ما بعرف في قلوبهم في شنو بس علي قول المثل - الالفتو انا اكيد - انا بقول البشوفو .
و الاتنين ديل ما شفت منهم خير نهاي لحدي هسي علي الاقل .
نرجع لي فسلفتنا المتفلسفة حول الصداقات و نسأل .. ديل بدو كيف و منو السحب منو ؟
صدقاً هم من قامو قامو سوى ، نفس الروضة نفس مدرسة الاساس و نفس الثانوي و نفس اول كراش - ترتيل استاذة الترينك في الثانوي - مافي دراما او فيلم اجبني لماهم غير انو في واحد منهم و بدون ذكر اسماء قال كدي نلم لينا شوية قريشات و فجاء الاتنين بقو اكثر اسماء مطلوبة في المخابرات و ما قدرو يقبضوهم . و ما لانو ما عارفينهم طبعاً .. بس لانو الاتين و علي حظ ابهاتهم .. اولاد لواءات في الجيش .

نتجاوز ديل برضو ..

و نرجع لي موضوعنا الرئيس و هو بلا عنوان حتي الان .. و نتكلم عن شخصية مافي زول اظن بيتزكرها لكن انا لازم اذكركم ليها و ارفع ضغطكم ..
مهيرة - تشتغل الصاعقة - مؤثرات و كدا ما تشتغلو بها .. بس للاسف ما دي الشخصية الدايرة اتكلم عنها - سامعة واحدين بقلو الحمد لله - برضو ما علينا .
نرجع قلنا لشخصية ..
محمد - ما محمد الشاب من شلة نازك ..-
محمد والد زين .. و يجي واحد او وحدة تقول مالهم المحمدات كتار كدا خلصت الاسماء .. لا و الله ما خلصت لكن الاسم دا محشور في كل بيت الحمد لله و يستاهل - علية الصلاة و السلام - انو نسمي عليهو .. اهااا برضو ما موضوعنا .. ، بدون حرق احداث عارفين انو هو واحد مطلق و ارمل و عندو عيال .. غير انو خلاص كبر - طيب لي الكاتبة الخفيفة كاتبة فوق انو واحد من اوسم الشخصيات - اي مس بي كيفي - نقطة الكلام انتهي - ..
انا شخصياً مفروض كان يكون عندي دادي اشو - للترجمة كدا مشاكل ابوية - بس بعدها اتذكرت انو السودانيات كلهم كدا ما انا براي فعشان كدا احترم نفسي و اعتبر انو الشوق دادي دي مسألة عالمية ما انا و سعاد برانا فيها - طيب علاقة محمد بالموضوع شنو ؟ -
القصة و ما فيها انو محمد هو اكبر عتبة زين ما قادرة تتجاوزها ما لانو هو شخصية عملت كدا في زين ، لكن زين حكت لينا انو ابوها العامل مشكلة معاها ..
انا كقاضي مزاجي حقول كلامها صح دون اسمع زاتو للطرف التاني - عشان كدا البنات ما ينفعو كقضاة - ، طلعنا كتير من الموضوع بس خلاصة الدايرين نصل ليهو انو عبارة شوقر دادي دي ما تتقال لمحمد بل محمد التقول انو شوقر دادي و عن ثقة اقول ليكم محمد لو ما كان ابو زين كان بقة كراشها - خليكي تقيلة يا بت -

يلا بعد القلت ادب دي ..

شايفة في ناس عملت نادي معجبين لأيان .. بنات او اولاد .. روقو المنقة الاخ غير انو اجنبي و ابيض و سمح و شخصتو درعة و طويل و غني ما عندو شي مميز .. يمكن ..
-دي وجهة نظر سعاد مافي زول يهجم علي -