خليكي تقيلة

9 .

   العقل يمكن ينسى بس جسمك لمن يتعود علي حاجة بدون ما تحس وتركز بتلفي روحك بتعملها .

  كنت حاسة من جواي إنو اليوم دا انا ما كويسة وهسي إتذكرت لي ... في اليوم دا وقبل اربعة سنة أمي إتوفت وكنت بت عاق لدرجة كنت ببكي براي في اليوم دا كل سنة كنت ببكي براي وبدون زول يشوفني بدون زول يعرف ، وهسي حتي لو قلت لحسام ما حيعرف لانو هم متخيلين الموضوع دا حساس بالنسبة لي وما كانو بسألو عنو حتي جيمين البيعرف بموت أمي ما عارف إنو هي ماتت في اليوم دا بالتحديد .

كانت ثواني بس وحسام مستغرب أنا ببكي لي ما قادر يسألني ولا قادر يستنتج براهو وعشان ما اوترو أكتر من كدا قلت ليهو

   : أمبارح حضرت فيلم والبطل فيهو مات هسي إتذكرتو .

حسام قعد يستغفر ويسترجع و الصراحة قرب يكسر الجيتار في وشي ومن اللامكان جه عاصم وجيمين وإيان من وراهو عاصم قال بيتنرفز

   : الله لا يجيب باقيكي كنا متكيفين من الغنه حقكم قبل شوية ولمن بكيتي خلعتينا متخلين زول بتعرفيهو مات تقولي لي بطل فيلم لكن والله تصدقي أخير من سعاد دي ياخي بتبكي في الحشرة لو عفصناها بالغلط خليكي من أبطال الافلام والروايات والعجب الكوريين والكرتون ديل قصة براهم .

قسماً بالله ما قدرت أكتم ضحكتي وطلعت من جواي وعاصم لسع بيحكي سعاد عملت وسعاد فعلت وانا ما قادرة ارفع رأسي من الضحك هو الموضوع ما بيضحك للدرجة دي بس أنا بضحك ،  واول ما رفعتو لقيت إيان قاعد في الارض قصادي وبيضحك مغطي عيونو بيدو واليد التانية خاتيها في كراعو  الولد بسم الله مالو سمح كدا دايرة اديهو كف وادي روحي كف لانو حديهو كف .. دا شنو التعقيد دا ؟  ، جيمين قاعد جمبو وبيضحك بس ضحكة ميتة ما واصلة عيونو كانو بيحاول يجاملهم ، عيون جيمين وقعت في عيوني طوالي نزلت عيني منو ما عارفة لي بس حسيت إنو ما قادرة أعاين ليهو في عيونو حتي لحسام  وعاصم ما قادرة أعاين لزول في عيونو و يا ربي دا عشان كذبت ولا شنو ؟ بس طبيعي أنا بكذب زي دا الجديد شنو ؟

  في حاجة جواي بتقول لي أضحك واتونس معاهم واوريهم إني كويسة رغم إني نهاي ما كويسة بس خارج عن إرادتي لقيت نفسي متفاعلة معاهم وبضحكهم وبغني وراهم بأغاني اول مرة أسمعاها رغم كونها ما زوقي وما بحبها بس الليلة من بين كل الايام بقت لي سمحة وتستحق إنتباهي ليها ، الجيتار طلع بتاع صاحب عاصم كان خلاهو معاهو و صدف إنو حسام بيعرف يعزف فجابو ليهو وقعدو بره ولمن مشه هو وجيمين ينادو إيان انا كان طلعت  وجيت قعدتة جم حسام وهسي بطلنا غنه بالجيتار وبقينا ننكت بالدور ، إتخيلت إيان ما بيعرف يتكلم سوداني كويس وما حيفهم النكات الشعبية حقتنا لانو سعاد قالت ما بيعرف يقري إلا إنجليزي وفرنسي لانو عاش عمرو كلو في كندا صحي إنتو كندا دي مالها معاي ..