Heart of Leona[completed]

Part-1

[Unicode]
ကြယ်စုနှစ် 2000ခုနှစ်။

အင်ပါယာထိပ်သီးခေါင်းဆောင် Alphaများနှင့် ပြည့်နှက်နေသော အစည်းအဝေးခန်းမကြီးထဲတွင် ထူးခြားစွာပင် Blue Falconဟု ရေးထိုးထားသည့် သိမ်းငှက်ပြာ၏ နေရာမှာ လူမရှိဘဲလွတ်နေခဲ့သည်။
အရေးပေါ်အခြေအနေတစ်ခုကြောင့် ဆေးရုံတက်နေရသည်ဟုသာ သိထားကြသည်။

အင်ပါယာတွင် ထိပ်တန်းတပ်သားများဖြင့် ဖွဲ့စည်းထားသည့်
Black Wolf (ဝံပုလွေနက်)၊
Blue Falcon (သိမ်းငှက်ပြာ) နှင့်
Red Shark (ငါးမန်းနီ) ဟူ၍ သုံးဖွဲ့ရှိ၏။

အင်ပါယာထိပ်သီးခေါင်းဆောင်များ အရေးပေါ် စည်းဝေးရခြင်းသည် ဝံပုလွေနက်အား ပြစ်ဒဏ်ချမှတ်ရန်သာဖြစ်သည်။ သိမ်းငှက်ပြာကလည်း တိုက်ပွဲတွင် အပြင်းအထန်ဒဏ်ရာရရှိခဲ့ပြီး ဆေးရုံကုတင်ထက်၌ သတိလစ်မေ့မျောကာ လှဲလျောင်းနေရသည်။

ဒီနှစ်အတွင်း အင်ပါယာက အတော်လေး ကမောက်ကမဖြစ်နေသည်ဟုပင် ပြောရမည်။

Black Wolfကလည်း သိသိသာသာကို ပြစ်မှုထင်ရှားနေသည်။ ထိုနေ့က အဖြစ်အပျက်ကို သူတို့အားလုံး ကိုယ်တိုင် မြင်တွေ့ခဲ့ရသည် မဟုတ်ပါလား။

"ဝံပုလွေနက်ကို ရာထူးကနေ ခေတ္တဆိုင်းငံ့ပြီး အတုအယောင်ကမ္ဘာပရောဂျက်မှာ ခြောက်လတိတိ စမ်းသပ်ဖို့ စေလွှတ်ရလိမ့်မယ်"

အကြီးအကဲ၏ စကားကြောင့် အစည်းအဝေးခန်းမအတွင်းရှိ လူများအားလုံး ပါးစပ်အဟောင်းသားဖြစ်ကုန်ရသည်။

စမ်းသပ်နေဆဲ ပရောဂျက်မှာ လူသားတစ်ယောက်ကို ထည့်သွင်းအသုံးပြုတာက လူအချို့အား အတွေးများစေသည်။ ထိုအတုအယောင်ကမ္ဘာထဲ ဝင်ရောက်လေ့လာရဲတဲ့လူ မရှိသေးတာမို့ ဝံပုလွေနက်ကို အပြစ်သားတစ်ယောက်အနေနဲ့ ငြင်းဆန်၍မရသည့်အခြေအနေတွင် အသုံးချလိုက်သည်ဟု အမျိုးမျိုးထင်ကြေးပေး‌ကြ၏။

"ဒီအတုအယောင်ကမ္ဘာထဲမှာ ဝံပုလွေနက်ရဲ့ လုံခြုံရေးကို အာမခံချက်မပေးနိုင်ပါဘူး၊ တကယ်လို့ ဒီကမ္ဘာထဲမှာ မတော်တဆ သေဆုံးသွားခဲ့ရင် သူ့အနေနဲ့ မူလကမ္ဘာကို ဘယ်တော့မှ ပြန်လာလို့ရမှာ မဟုတ်တော့ပါဘူး၊ မသေဘဲအသက်ရှင်လျက်ရှိနေခဲ့ရင်တောင် ပရောဂျက်ကို အပြီးမသတ်ရသေးမချင်း ပြန်လာလို့ရဦးမှာမဟုတ်ဘူး"